Երեթշաբթի, 30 Օգոստոսի 2022 17:18

Արմինֆո. Orion Worldwide Innovations-ը Նյու Յորքի BAJ Accelerator-ի հետ համատեղ սեպտեմբերի 18-23-ը գործարկում են սթարթափների աճի արագացման 9-րդ խմբի ծրագիր: Նախորդ 8 խմբերին մասնակցել են 94 սթարթափներ, որից 53-ը՝ հայկական (գործող Հայաստանում կամ այլ երկրներում):

 

Անցյալ տարի, ինչպես հաղորդում է Orion-ի մամուլի ծառայությունը, հայաստանյան 3 սթարթափներին հաջողվել է ստանալ 27 մլն դոլարի ներդրում:

 

Մասնակցությունը ծրագրին, Orion Worldwide Innovations-ի հիմնադիր տնօրեն և BAJ Accelerator-ի համահիմնադիր Էմմա Առաքելյանի խոսքով, սթարթափներին հնարավորություն կընձեռի շտկել բացերը, զարգացնել հմտությունները, պատրաստվել ներկայանալու աշխարհի խոշոր վենչուրային ընկերություններին, ներդրողներին, հրեշտակ ներդրողներին և ընտանեկան գրասենյակներին։

 

Հիշեցնենք, որ BAJ Accelerator-ն աճն արագացնող ծրագիր է, որը նախատեսված է «Pre Seed» -ից «Series A+» փուլերի սթարթափների համար: BAJ Accelerator-ը աշխարհում առաջինն է, որն արագացնում է տեխնոլոգիաների զարգացումը, հասունացնում սթարթափները դարձնելով ներդրումների ենթակա: Ծրագրին մասնակցելու հայտ կարելի է ներկայացնել մինչև սեպտեմբերի 8-ը ՝ լրացնելով հայտը հետևյալ հղումով.  https://www.bajaccelerator.com/apply:

 

Նշենք, որ «Օրիոնը»  (Orion Worldwide Innovations) հիմնադրվել է 2017 թ., ԱՄՆ-ում։ Ընկերությունը գրասենյակներ ունի Նյու Յորքում և Երևանում, համագործակցում է աշխարհի տարբեր երկրներում գործող ընկերությունների և ներդրողների ցանցերի հետ: «Օրիոնը» սթարթափների աճի և փոխկապակցված էկոհամակարգի զարգացման հանգույց է, որն առաջարկում է ծառայությունների ամբողջական փաթեթ: «Օրիոնը» ներդրումների ենթակա ընկերությունների համար ստեղծում է ԱՄՆ մուտք գործելու հնարավորություններ, բարելավում այդ ընկերությունների՝ հաճախորդներ ձեռք բերելու ռազմավարությունները, օգնում մնալ մրցունակ և պաշտպանում իրենց նորարարությունները։