Հինգշաբթի, 29 Սեպտեմբերի 2022 12:23

Արմինֆո.Հայաստանը 2022 թվականը կփակի 11-12 տոկոս տնտեսական աճով՝ պետբյուջեում ամրագրված 7 տոկոսի փոխարեն։ Այդ մասին սեպտեմբերի 29-ին կառավարության նիստում հայտարարել է ֆինանսների նախարար Տիգրան Խաչատրյանը՝ ներկայացնելով 2023 թվականի պետական բյուջեի նախագիծը։

 

Խաչատրյանը հիշեցրել է, որ 2022 թվականի 8 ամիսներին տնտեսական ակտիվությունն աճել է 13.9 տոկոսով, ինչի արդյունքում պետբյուջեով սկզբնապես սահմանված հարկային եկամուտների պլանը գերակատարվում է: Դա թույլ է տալիս ոչ միայն պահանջված ամբողջ ծավալով ֆինանսավորել այս տարվա բյուջեով սահմանված ծախսային ծրագրերը, միջոցառումները, այլև լրացուցիչ ֆինանսական միջոցներ հատկացնել անվտանգային, տնտեսական և սոցիալական նոր նախաձեռնությունների իրագործման համար:

 

«Ներկա տնտեսական զարգացումները հուշում են, որ 2022 թվականը կամփոփվի 11-12 տոկոս տնտեսական աճով: Այս փաստն ինքնին շատ դրական է, բայց գալիք տարվա 7 տոկոս տնտեսական աճն ապահովելու նպատակով պահանջվում է նաև, որ արագացնենք այն բարեփոխումները, որոնք պետք է բարելավեն տնտեսության մասնավոր հատվածի պայմանները, ինչպես նաև բարձրացնել պետբյուջեով ֆինանսավորվող տնտեսական և սոցիալական ծրագրերի իրականացման արդյունավետությունը», - ասել է նախարարը:

 

Վիճակագրական տվյալների համաձայն, Հայաստանում տնտեսական ակտիվությունը երկնիշ աճի տեմպերի է հասել 2022թ. փետրվարին՝ հունվար-օգոստոս ամիսների արդյյունքներով դրանք արագացնելով մինչեւ տարեկան 13,9 տոկոս, սակայն, ընդսմին, սննդամթերքի շուկայում գնաճն արդեն հասել է 13 տոկոսի:

 

Վերակառուցման և զարգացման եվրոպական բանկը (EBRD) բարելավել է Հայաստանի 2022թ. ՀՆԱ-ի աճի կանխատեսումը՝ նախկին 4,5%-ից մինչև նորացված 8%՝ դրանով իսկ ակնկալելով ավելի կայուն աճ: Համաշխարհային բանկի եւ Արժույթի միջազգային հիմնադրամի 2022 թվականի հունիսյան կանխատեսումներում Հայաստանի ՀՆԱ-ի ակնկալվող աճը բարելավվել է, համապատասխանաբար, մինչեւ 3,5 տոկոս եւ 5 տոկոս (նախկին 1,2-1,3 տոկոսից): Իսկ Fitch Ratings միջազգային վարկանիշային գործակալությունը, որը շատ ավելի ուշ (սեպտեմբերի սկզբին) թարմացրեց Հայաստանի ՀՆԱ-ի աճի իր կանխատեսումը 2022 թվականի համար, հնչեցրել է շատ ավելի բարձր նշաձող՝ 6,4 տոկոս (նախկին 1,3 տոկոսի դիմաց):