Սեպտեմբերյան անկանխիկ գնումների 10% հետվճարը կարող է գերազանցել միլիարդ դրամը

Արմինֆո.Ս.թ. սեպտեմբերին կատարված անկանխիկ գնումների դիմաց թոշակառուների եւ նպաստառու անձանց համար հետվճարը կարող է գերազանցել մեկ միլիարդ դրամը: Այդ մասին սեպտեմբերի 29-ին կառավարության նիստում հայտարարել է աշխատանքի եւ սոցիալական հարցերի նախարար Նարեկ Մկրտչյանը։

Նրա խոսքով, եթե հուլիսի արդյունքներով ծրագրի շրջանակներում վերադարձը կկազմի շուրջ 400 մլն դրամ, օգոստոսին՝ արդեն 800 մլն դրամ է, ապա սեպտեմբերին ծրագրին 4-րդ օպերատորի միանալու արդյունքում գումարը, ամենայն հավանականությամբ, կգերազանցի մեկ միլիարդ դրամը: Ընդ որում, ինչպես նշել է նախարարը, մինչեւ հուլիս թոշակառուների անկանխիկ գնումները մոտ էին զրոյի։

Հիշեցնենք, որ հուլիսի 1-ից Հայաստանում մեկնարկել է անկանխիկ գործառնությունների համար կենսաթոշակների եւ նպաստների վերադարձման ծրագիրը: ՀՀ տարածքում գործող առևտրային կետերում և ծառայություններ մատուցողների միջոցով վճարային քարտերով և վճարային սարքերով անկանխիկ գործառնություններ իրականացնող կենսաթոշակառուներին կամ նպաստառու անձանց փոխհատուցվում է անկանխիկ գործառնությունների գումարի 10%-ը՝ մինչև հաջորդ ամսվա 25-ը, բայց ոչ ավելի, քան 5000 դրամ: Վերադարձը տարածվում է նաև կոմունալ վճարումների վրա։ Մեխանիզմը տարածվում է ոչ միայն բանկոմատների, այլեւ էլեկտրոնային (բջջային բանկինգ) բանկի հավելվածի միջոցով կոմունալ վճարումների վրա: Այս պահին ծրագրին արդեն միացել են ՎՏԲ-Հայաստան Բանկը, Արդշինբանկը և Հայբիզնեսբանկը: Սեպտեմբերին ACBA Bank-ը պաշտոնապես դարձավ չորրորդ բանկը, որը միացել է պետական ծրագրին:

Բոլոր այն քաղաքացիները, ովքեր ցանկանում են փոխել իրենց կենսաթոշակ կամ նպաստ տրամադրող ֆինանսական կազմակերպությունը, կարող են դիմել միասնական սոցիալական ծառայության տարածքային կենտրոն:

Ծրագիրը ներդրվել է պիլոտային ռեժիմով ՝ 6 ամիս ժամկետով, որից հետո կքննարկվեն դրա թերությունները և դրանց վերացման ուղիները։