Արմինֆո. ՀՀ Կենտրոնական բանկի խորհուրդը, շարունակելով խստացնել դրամավարկային պայմանները, նոյեմբերի 1-ից բարձրացրել է վերաֆինանսավորման տոկոսադրույքը 0.5 տոկոսային կետով՝ 10%- ից մինչեւ 10.5%: Այս որոշման հիմնավորումը ՀՀ ԿԲ նախագահ Մարտին Գալստյանը ներկայացրել է դրան նվիրված մամուլի ասուլիսում:
Նա նշել է, որ համաշխարհային տնտեսությունում դիտարկվում են տնտեսական ակտիվության դանդաղման միտումներ: Զարգացած երկրների կենտրոնական բանկերը շարունակում են էականորեն խստացնել դրամավարկային պայմանները: Սա արտահայտվում է միջազգային ապրանքահումքային շուկաներում գների որոշակի նվազմամբ, սակայն ընդհանուր գնաճը Հայաստանի հիմնական գործընկեր երկրներում դեռևս պահպանվում է բարձր: Չնայած առաջարկի արժեշղթաների որոշակի վերականգնմանը՝ առանձին շուկաներում դրանց խաթարումների հետ կապված ռիսկերը պահպանվում են: Արդյունքում՝ համաշխարհային տնտեսությունից Հայաստանի տնտեսության վրա ակնկալվում են թույլ գնաճային ազդեցություններ:
Ընդ որում, նա ուշադրություն է հրավիրել այն հանգամանքի վրա, որ 2022թ. երրորդ եռամսյակում Հայաստանի տնտեսությունում բարձր ակտիվության միտումները պահպանվում են: Տնտեսական աճը գերազանցապես կրում է արտաքին պահանջարկի դրական ազդեցությունը՝ արտահայտվելով ծառայությունների ոլորտի էական ավելացմամբ: Պահանջարկի ընդլայնմանը նպաստում է միջազգային այցելուների և ՌԴ-ից դրամական փոխանցումների ներհոսքի շարունակական աճը: Սա միաժամանակ արտահայտվում է Հայաստանի արտաքին հաշվեկշռվածության դիրքի բարելավմամբ և դրամի փոխարժեքի արժևորմամբ: Բարձր պահանջարկը նպաստում է աշխատուժի շուկայի տաքացմանը, ընդհանուր գնաճային միջավայրի ընդլայնմանը և բարձր գնաճային սպասումների պահպանմանը: Նման իրավիճակում կարևորվում է հարկաբյուջետային և դրամավարկային կոորդինացված զսպող քաղաքականության իրականացումը:
ԿԲ խորհուրդը նպատակահարմար է համարում բարձրացնել վերաֆինանսավորման տոկոսադրույքը, քանի որ համեմատաբար խստացված դրամավարկային պայմաններն ու հայկական դրամի արժևորումը աստիճանաբար կնպաստեն պահանջարկի զսպմանը և գնաճային սպասումների նվազմանը: Կենտրոնական բանկի խորհուրդը հետեւողականորեն կձեռնարկի պատշաճ գործողություններ՝ գնաճը կայունացնելու եւ գնաճային սպասումները խոչընդոտելու ցանկացած ռիսկ չեզոքացնելու համար: Դրամավարկային քաղաքականության նախանշված սցենարի համաձայն ՝ տարեկան գնաճն աստիճանաբար կնվազի և միջնաժամկետ հեռանկարում կկայունանա նպատակային 4% շեմի մոտ։ Վերջին տվյալներով ՝ 2022թ. սեպտեմբերին տարեկան պաշտոնական գնաճը բարձրացել է մինչև 9,9%, իսկ բազային տարեկան գնաճը հասել Է 10,5% - ի, մինչդեռ, մեկ տարի առաջ նույն ժամանակահատվածում (2021թ.սեպտեմբեր), չնայած արդեն իսկ նախանշվող աճին, համադրելի ցուցանիշներն ավելի ցածր են եղել. տարեկան պաշտոնական և բազային գնաճը կազմել է, համապատասխանաբար, 8,9% և 8% (2020թ. սեպտեմբերին տարեկան 1,4% և 1,3%-ի դիմաց):
ՀՀ ԿԲ խորհրդի գնահատմամբ' գնաճի թույլատրելի հետագծից շեղման ռիսկերը, հիմնականում, հավասարակշռված են: Ցանկացած ուղղությամբ ռիսկերի առաջացման դեպքում ԿԲ խորհուրդը կարձագանքի համապատասխան ձևով՝ գների կայունության ապահովման նպատակով։
