Կառավարությունը գերակատարել է 500 կմ ճանապարհ վերանորոգելու իր խոստումը. նախարար

Արմինֆո.500 կմ ճանապարհ նորոգելու քաղաքական խոստումը գերակատարված է: Այդ մասին Facebook-ի իր էջում հաղորդել է տարածքային կառավարման և ենթակառուցվածքների նախարար Գնել Սանոսյանը։

«ՀՀ կառավարությունը 2022 թվականի համար նախատեսել էր վերականգնել և նորոգել 500 կմ ճանապարհ։ Ցանկանում եմ տեղեկացնել, որ մենք արդեն իսկ ունենք 500 կմ գերազանցող ցուցանիշ (510-520 կմ)։ Ասֆալտապատված ճանապարհների մասով սա նախորդ բոլոր տարիների համեմատ ռեկորդային ցուցանիշ է, և դեռ այդ թվում ներառված չեն համայնքային միջոցներով, սուբվենցիոն ծրագրով կառուցված ճանապարհները։ Եվ եթե եղանակային պայմանները թույլ տան, ապա մինչև տարեվերջ հնարավոր կլինի այս թիվն ավելացնել։

Այս տարի իրականացվել է ավելի քան 288 կմ ճանապարհի հիմնանորոգում։ Միջին նորոգման է ենթարկվել միջպետական և հանրապետական նշանակության ավելի քան 145 կմ ճանապարհ։ Եվ աշխատանքները դեռ շարունակվում են։ Մեծ ծավալի ասֆալտապատման աշխատանքներ են իրականացվել Հյուսիս-հարավ ծրագրի Տրանշ-3-ի՝ Թալին-Գյումրի, Մ6՝ Վանաձոր-Ալավերդի-Վրաստանի սահման հատվածներում, ճանապարհներ են նորոգվել Կենսական նշանակության ճանապարհային ցանցի բարելավման ծրագրով։

Վստահ եմ, որ այս ցուցանիշն իր ազդեցությունն է ունենալու երկրի տնտեսական զարգացման և բնակչության կենսամակարդակի բարձրացման վրա», - գրել է Սանոսյանը։

Մեկ տարի առաջ հաղորդվել էր, որ 2022 թվականին Հայաստանի կառավարությունը նախատեսում է վերանորոգել շուրջ 500 կմ ճանապարհ։ Ընդ որում, նշված ծավալում հաշվի չեն առնվել այն ճանապարհները, որոնք կվերանորոգվեն սուբվենցիոն ծրագրերի շրջանակներում։ Կառավարության Facebook-ի էջում զետեղված տեղեկատվության  համաձայն, վերանորոգման աշխատանքների համար կհատկացվի շուրջ 47 մլրդ դրամ։ "Ճանապարհային դեպարտամենտ" հիմնադրամի ղեկավար Գոռ Ավետիսյանի խոսքով ՝ նշված գումարի զգալի մասը կտրամադրվի Սյունիքի մարզի ճանապարհները վերանորոգելու համար ։ Նախատեսվում էր, մասնավորապես, մոտ 200 կմ ճանապարհահատվածի միջին վերանորոգում, մնացած 300 կմ-ում կիրականացվի հիմնանորոգում ։ Արդեն 2023 թվականին նախատեսվում է իրականացնել 400 կմ ընդհանուր երկարությամբ շուրջ 50 ճանապարհների վերանորոգում: Ավելի վաղ ՀՀ տարածքային կառավարման և ենթակառուցվածքների նախարար Գնել Սանոսյանը տեղեկացրել էր, որ 2021 թվականին հաջողվել է իրականացնել 800 կմ երկարությամբ ճանապարհների շինարարական և վերանորոգման աշխատանքներ, որոնցից 218.5 կմ-ը վերանորոգվել է "Ճանապարհային դեպարտամենտ" հիմնադրամի կողմից, ինչին պետբյուջեից ուղղվել է 26 մլրդ դրամ: