Հինգշաբթի, 17 Նոյեմբերի 2022 21:53

Արմինֆո. Հայաստան է ժամանել նավթի և գազի խոշորագույն ընկերություններից մեկի՝ բրիտանա-հոլանդական «Shell» ընկերության պատվիրակությունը: Ընկերության ղեկավար կազմի ներկայացուցիչները հանդիպել են Հայաստանի էկոնոմիկայի նախարար Վահան Քերոբյանի հհետ:

 

«Հանդիպմանը վերահաստատել եմ Հայաստանի Կառավարության պատրաստակամությունը աջակցելու «Shell» ընկերության մուտքին հայաստանյան շուկա։  Կարծում եմ այս քայլը կարևոր ազդակ կլինի համաշխարհային այլ ընկերությունների համար ևս», - «Ֆեյսբուքի» իր էջում գրել է նախարարը։

 

Թե ինչ ծրագրեր ունի Հայաստանում բրիտանա-հոլանդական նավթային ընկերությունը, հստակ հայտնի չէ ։ Էկոնոմիկայի նախարարությունն այդ տեղեկատվությունը չի հրապարակում։ Արդյոք խոսքը վառելիքի մատակարարման մասին է, թե շարժիչային յուղերի արտադրության հնարավորության մասին, հայտնի չէ:

Նշենք, որ սա ընկերության ներկայացուցիչների առաջին այցը չէ Հայաստան։ Հայկական շուկայի նկատմամբ Shell-ի հետաքրքրության մասին երկրի էկոնոմիկայի նախարարն առաջին անգամ հայտարարել է այս տարվա գարնանը՝ կառավարության նիստում։

 

Նշենք, որ Shell-ը ստեղծվել է 1907 թվականին Royal Dutch Petroleum Company-ի և The Shell Transport and Trading Company Ltd-ի միավորման միջոցով։ 2018թ. Shell-ը աշխարհի խոշորագույն նավթագազային և 11-րդ խոշորագույն հանրային ընկերությունն է ՝ համաձայն Forbes Global 2000-ի վարկանիշի և Fortune Global 500-ի 5-րդ վարկանիշի: Գլխամասային գրասենյակը գտնվում է Լոնդոնում։ Shell-ը նավթի և գազի երկրաբանական հետախուզում և արդյունահանում է իրականացնում աշխարհի ավելի քան 70 երկրներում: 2021 թվականին ընկերության շրջանառությունը կազմել է 261.5 մլրդ, զուտ շահույթը՝ 20.1 մլրդ, ակտիվներ՝ 404.4 մլրդ, և սեփական կապիտալը՝ 175.3 մլրդ: