Մհեր Գրիգորյանը կարևորել է ՎԶԵԲ-ի հետ Հայաստանի համար առանցքային նշանակություն ունեցող ոլորտներում իրականացվող ծրագրերը

Արմինֆո. Փոխվարչապետ Մհեր Գրիգորյանն ընդունել է Վերակառուցման և զարգացման եվրոպական բանկի (ՎԶԵԲ) Կովկասի, Մոլդովայի և Բելառուսի տարածաշրջանային ղեկավար Կատարինա Բյորլին Հանսենին:

Ինչպես հաղորդել է փոխվարչապետի գրասենյակը, Գրիգորյանը կարևորել է ՎԶԵԲ-ի հետ Հայաստանի համար առանցքային նշանակություն ունեցող ոլորտներում իրականացվող ծրագրերը:

Հանդիպման ընթացքում քննարկվել են ենթակառուցվածքների զարգացման ծրագրերը, մասնավորապես ընդգծվել է Հյուսիս-հարավ մայրուղու Սիսիան-Քաջարան ճանապարհահատվածի կառուցման ուղղությամբ նախապատրաստական աշխատանքների կարևորությունը: Այս համատեքստում քննարկվել են ՎԶԵԲ կողմից իրականացված տեխնիկատնտեսական ուսումնասիրության արդյունքները:

Անդրադարձ է կատարվել նաև ԵՄ տնտեսական և ներդրումային պլանի ներքո ուղենիշ 1-ի շրջանակներում ՀՀ առևտրային բանկերի հետ ՎԶԵԲ կողմից իրականացվող ՓՄՁ աջակցության ծրագրերին: Մտքեր են փոխանակվել համատեղ ծրագրերի նոր հնարավոր ուղղությունների շուրջ, կարևորվել են հատկապես տարածաշրջանային նշանակություն ունեցող նախագծերը:

Նշենք, որ ՎԶԵԲ-ը 1992 թվականին Կովկասում իր գործունեության մեկնարկից ի վեր ավելի քան 10.64 մլրդ եվրո է ներդրել տարածաշրջանի ֆինանսական, կորպորատիվ, ենթակառուցվածքային եւ էներգետիկ ոլորտներում 652 նախագծերում, ընդ որում, այդ ներդրումների մեծ մասը բաժին է ընկնում մասնավոր հատվածին: ՎԶԵԲ-ը, որպես Հայաստանում առաջատար ինստիտուցիոնալ ներդրող, որը գործում է տնտեսության բոլոր ոլորտներում, երկրի տնտեսության մեջ ներդրել է մոտ 1.9 մլրդ եվրո ֆինանսական, կորպորատիվ, ենթակառուցվածքային և էներգետիկ ոլորտների 200 նախագծերում, ընդ որում, ներդրումների 91% - ը բաժին է ընկնում մասնավոր հատվածին: Այսօրվա դրությամբ ՎԶԵԲ - ը հանդիսանում է միայն մեկ հայկական բանկի' Ամերիաբանկի բաժնետեր (17,73%): Ավելի վաղ (մի քանի տարի առաջ) նա մասնակցել է առնվազն հինգ հայկական բանկերի կապիտալին, սակայն առաքելության ավարտից հետո որդեգրել է դուրս գալու ռազմավարություն։ Այս պահին բանկը վարկային ծրագրեր է իրականացնում ԱԿԲԱ Բանկի, ԱՐԱՐԱՏԲԱՆԿԻ, Evocabank-ի, Ինեկոբանկի, Ամերիաբանկի, IDBANK-ի եւ Արմսվիսբանկի հետ: ՎԶԵԲ-ը մասնակցում է "Մասրիկ-1" արդյունաբերական նշանակության արեւային էլեկտրակայանի եւ Հայաստանի հեռահաղորդակցության խոշորագույն օպերատոր Team Telecom Armenia-ի համաֆինանսավորմանը' 20 մլն դոլարի չափով: ՎԶԵԲ-ն իրականացնում է նաեւ մի շարք մունիցիպալ ծրագրերի վարկավորում, որոնց թվում է Երեւանի մետրոպոլիտենի արդիականացումը: Եվս 35 մլն դոլար է ուղղվել Երեւան եւ Գյումրի քաղաքներում էլեկտրաբաշխիչ ենթակառուցվածքների արդիականացմանը ("Կանաչ քաղաքներ" ծրագիր): Հայաստանում կարեւոր գործոն է համարվում ՎԶԵԲ-ի մասնակցությունը ԵՄ-ի հետ համատեղ Իրանի հետ սահմանակից "Մեղրի" հսկիչ-անցագրային կետի արդիականացմանը, որի համար բանկը հատկացրել է 10.6 մլն եվրո: