Երեթշաբթի, 10 Հունվարի 2023 17:29

Արմինֆո. Կան բոլոր հիմքերը՝ մտածելու, որ 2023 թվականին Հայաստանը կապահովի ՀՆԱ-ի առնվազն 7 տոկոս աճ: Այդ մասին հունվարի 10-ին մամուլի ասուլիսի ժամանակ հայտարարել է ՀՀ վարչապետ Նիկոլ Փաշինյանը։

 

Վարչապետի ասելով՝ 2022 թվականի արդյունքներով Հայաստանի տնտեսության աճը, ամենայն հավանականությամբ, կկազմի 12,5-13 տոկոս ՝ նախատեսված 7 տոկոսի դեպքում (նոյեմբերին վարչապետը խոսում էր 2022 թվականը 14 տոկոս աճով փակելու հնարավորության մասին - խմբ.)։ Փաշինյանը չի վիճարկում ռուսաստանյան ռելոկանտների դերը այս ցուցանիշի ապահովման գործում, միաժամանակ, նշում է, որ Հայաստանում ներկայումս շինարարական բում է արձանագրվում, աճում են ծառայությունների ոլորտն ու արդյունաբերության հատվածը, էներգետիկ շուկայի ազատականացման արդյունքում դրական տեղաշարժեր կան նաև այս ուղղությամբ:

 

Կառավարության ղեկավարն ընդունում է 2023 թվականի պետական բյուջեում ամրագրված 7 տոկոս տնտեսական աճի ապահովման հարցում տարբեր տեսակի ռիսկերի առկայությունը՝ անվտանգային և այլ։ Սակայն, ինչպես նշել է նա, ինքնիշխան Հայաստանի նկատմամբ Ադրբեջանի սեպտեմբերյան ագրեսիան ցույց տվեց, որ դա կարող է այդքան բացասական ազդեցություն չունենալ ՀՆԱ-ի աճի վրա։

 

Բացի այդ, ինչպես նշել է վարչապետը, կառավարությունը մի շարք բարեփոխումներ է իրականացրել,

աջակցել է որոշ ուղղությունների, մասնավորապես, ՏՏ ոլորտին աջակցությունը կազմել է մոտ 10 մլրդ դրամ։ Այս ամենը, ըստ կառավարության ղեկավարի, հիմք է տալիս ենթադրելու, որ, նույնիսկ, հաշվի առնելով նախորդ տարվա բարձր հիմքը, 2023 թվականին Հայաստանը կկարողանա ապահովել ՀՆԱ-ի, առնվազն, 7 տոկոս աճ։

 

Նշենք, որ ըստ վիճակագրական տվյալների, Հայաստանում տնտեսական ակտիվության աճը 2022թ. հունվար-նոյեմբերին արագացել է մինչև տարեկան 14,4% (2021թ. նույն ժամանակահատվածի 5,2% - ից) ՝ անհամեմատ գերազանցելով նաև 2019թ. 11 ամիսների նախաքովիդյան 7,5% աճը։ Դա ուղեկցվել է արտահանման և ներմուծման տպավորիչ աճով։ 2022թ. հունվար-նոյեմբեր ամիսների տնտեսական ակտիվության աճը մեծապես պայմանավորել է ծառայությունների ոլորտը՝ 28,2% - ով, իսկ ավելի պակաս՝ էներգահամալիրը՝ 16,8% - ով, առևտրի ոլորտը՝ 16,2% - ով, շինարարության ոլորտը՝ 13,9% - ով, և արդյունաբերական ոլորտը՝ 8,4% - ով։ Ագրոհատվածի վերաբերյալ տվյալները հրապարակվում են միայն եռամսյակային կտրվածքով։ Մեկ տարի առաջ՝ 2021թ. հունվար-նոյեմբերին, անկման մեջ էր միայն էներգահամալիրը՝ 2% - ով, իսկ մնացած բոլոր ոլորտները, ինչպես և հիմա, աճ էին ցուցաբերում, բայց համեմատաբար համեստ. առևտրի հատվածը՝ 7,9% - ով, ծառայությունների ոլորտը՝ 7,3% - ով, շինարարության ոլորտը՝ 6,9% - ով, արդյունաբերության հատվածը՝ 2,7% - ով։