Արմինֆո.Տնտեսական արդիականացման ծրագրի ներքո 2022 թվականին կնքվել է 901 գործարք՝ ընդհանուր ավելի քան 56 միլիարդ դրամ գումարի։ Այդ մասին Facebook-ի իր էջում հաղորդել է ՀՀ էկոնոմիկայի նախարար Վահան Քերոբյանը։
«Միայն դեկտեմբեր ամսին կնքվել է 223 պայմանագիր՝ ավելի քան 11 միլիարդ գումարի։ Այս ծրագրում Կառավարությունը սուբսիդավորում է մի շարք ոլորտների ընկերությունների ձեռք բերած սարքավորումների վարկերի և լիզինգների տոկոսային ծախսերի զգալի մասը։ Վստահորեն կարելի է ասել, որ այս ծրագրի արդյունքում մենք էականորեն արագացնում ենք աշխատանքի արտադրողականության աճը, որը մեր ընկերությունների մրցունակության գլխավոր գրավականն է», - գրել է նախարարը։
Հիշեցնենք, որ տնտեսության արդիականացման ծրագիրը մեկնարկել է 2022 թվականի սկզբին։ Ծրագրի առաջին բաղադրիչը ենթադրում է ընկերությունների ֆինանսական ծախսերի փոխհատուցում, լիզինգի զարգացում, հիմնական միջոցների, այդ թվում ՝ արտադրական գծերի արդիականացման գծով վարկերի տոկոսների սուբսիդավորում։ Ծրագրի շրջանակներում վարկային համաձայնագրի դեպքում պետությունը սուբսիդավորում է 7%-ը՝ դրամով, 6% - ը' արտարժույթով, լիզինգային պայմանագրերի դեպքում' դրամով սուբսիդավորումը կազմում է 10%, արտարժույթով' 8%:
Ծրագրից կարող են օգտվել հետևյալ ոլորտների տնտեսվարող սուբյեկտները. ագրոարդյունաբերական համալիր, հանքարդյունաբերություն, շինարարություն, հեռահաղորդակցություն, մասնագիտական, գիտական և գիտատեխնիկական գործունեություն, առողջապահություն և այլն:
