Երեթշաբթի, 24 Հունվարի 2023 17:06

Արմինֆո.Orion Worldwide Innovations-ի աջակցությամբ հայկական ստարտափներում 2020-2022 թվականներին ներդրումների ծավալը հասել է 48 միլիոն դոլարի: Անցած տարվա ներդրումները կազմել են 21 միլիոն դոլար:

 

Orion Worldwide-ի հաղորդագրության համաձայն, ներդրումներն ուղղվել են BAJ Accelerator ծրագիրն ավարտած ստարտափներին: Ծրագիրն անցել է ավելի քան 104 ստարտափ, որոնք գտնվում են նախնականից մինչեւ A+ փուլերում:

Մինչեւ ֆոնդհայթայթումը, ընկերությունները նախ անցնում են BAJ Accelerator 6-օրյա վերապատրաստման ծրագիրը, որը հիմնել են Օրիոնը, Բալթյան-ամերիկյան առեւտրային պալատը եւ Ջեյքոբս Թեքնիոն-Քորնել Ինստիտուտը: Հիմնական ներդրումները ներգրավվել են վենչուրային, կորպորատիվ վենչուրային ֆոնդերից, հրեշտակ ներդրողներից ու ընտանեկան գրասենյակներից:

 

«Ներդրումներ ստացած ստարտափները գործում են ֆինտեխ, անվտանգության, առողջապահության, ռոբոտաշինության, ծրագրային ապահովման ոլորտներում: Այս տարի հունիսին Նյու Յորքում անցկացվելիք Orion Summit 2023-ը ստարտափների համար յուրահատուկ հնարավորություն է միջազգային փորձ եւ պոտենցիալ ներդրողների հետ նոր կապեր ձեռք բերելու համար»,- նշել է Orion Worldwide Innovations-ի հիմնադիր, BAJ Accelerator ծրագրի համահիմնադիր տնօրեն Էմմա Առաքելյանը:

BAJ Accelerator ծրագրի հաջորդ խմբի վերապատրաստումը կմեկնարկի մայիսի 14-19-ին: Ցանկացողները մասնակցության համար կարող են լրացնել հետևյալ ձևաթուղթը. https://www.bajaccelerator.com/founder-application:.

 

Նշենք, որ Orion Worldwide Innovations-ը հիմնադրվել է 2017 թվականին ԱՄՆ-ում։ Ընկերությունը գրասենյակներ ունի Նյու Յորքում և Երևանում, համագործակցում է աշխարհի տարբեր երկրներում գործող ընկերությունների և ներդրողների ցանցերի հետ։ Ընկերության գործունեությունն ուղղված է սթարթափերի զարգացմանը, ԱՄՆ շուկա մուտք գործելիս նրանց օգնություն ցուցաբերելուն, հաճախորդների ներգրավման ռազմավարության կատարելագործմանը, մրցունակության պահպանմանը աջակցելուն և այլն:

 

Հիշեցնենք, որ BAJ Accelerator-ն աճի արագացուցիչ ծրագիր է, որը նախատեսված է Pre Seed-ից մինչև a+Series փուլում գտնվող ստարտափների համար: BAJ-ն աշխարհում առաջին արագացուցիչն է, որի գործունեությունն ուղղված է եղել տեխնոլոգիաների զարգացման արագացմանը, ստարտափների մշակմանն ու ներդրումային գրավչության բարձրացմանը։