Ուրբաթ, 3 Փետրվարի 2023 15:46

Արմինֆո. Արդյունաբերական կոոպերացիոն նախագծերը կարող են աշխատել միայն այն բանից հետո, երբ սկսի գործել ֆինանսավորման նոր ձեւաչափը։ Այդ մասին հայտարարել է Եվրասիական տնտեսական հանձնաժողովի (ԵՏՀ) նախագահի օգնական Իյա Մալկինան Եվրասիական միջկառավարական խորհրդի նիստի ավարտին կայացած ճեպազրույցում՝ պատասխանելով ԵԱՏՄ-ում արդյունաբերական կոոպերացիայի նախագծերի անբավարարության վերաբերյալ ԱրմԻնֆո-ի հարցին: Այս համատեքստում նա նշել է, որ նախագծերը կիրականացվեն 2024 թվականից ոչ շուտ։

 

Գլոբալ առումով, Մալկինայի խոսքով, աշխատանքը դեռ սկզբնական փուլում է։ Արդյունաբերական կոոպերացիոն նախագծերի ստեղծման շրջանակներում անդամ պետությունների հետ աշխատանքը, նրա խոսքով, իրականացվում է միայն որակավորման պահանջների և պայմանների մշակման ուղղությամբ, որոնց դեպքում նախագիծը կվերցվի միության հանձնաժողովի խնամակալության տակ, և, համապատասխանաբար, կտրամադրվի արտոնյալ ֆինանսավորում։

 

Միաժամանակ, նա բարձր է գնահատել Հայաստանի Հանրապետության ներուժը մշակող արդյունաբերության ոլորտում, նշելով, որ հայկական կողմը մեծ թվով հետաքրքիր առաջարկներ ունի համատեղ նախագծերի իրականացման համատեքստում։ Սակայն ավելի որոշակի այդ մասին կարելի կլինի խոսել միայն ընթացիկ տարվա ամռանը՝ Եվրասիական միջկառավարական խորհրդի հերթական նիստի և Եվրասիական ցուցահանդեսի շրջանակներում։ Անդրադառնալով վերջինիս՝ Մալկինան հավելել է, որ ցուցահանդեսի շրջանակներում կներկայացվեն ոչ միայն համատեղ նախագծերի մասնակից ձեռնարկությունները, այլեւ կհայտարարվի որոշակի պայմանավորվածությունների մասին։

 

Հիշեցնենք, որ 2022 թվականի դեկտեմբերին ԵԱՏՄ-ն ընդունել է արդյունաբերական կոոպերացիայի նախագծերի ֆինանսավորման նոր ձևաչափ, որոնք նախատեսում են միության բյուջեից սուբսիդավորել վերջիններիս իրականացման համար տրված վարկերի և փոխառությունների տոկոսադրույքները։ Մեխանիզմը նախատեսված է հինգ տարվա համար ՝ երկարաձգման հնարավորությամբ։

 

Ըստ նախնական հաշվարկների՝ կձևավորվի տարեկան շուրջ 20 մլն ԱՄՆ դոլարի հիմնադրամ։ Դա թույլ կտա աջակցել նախագծերին տարեկան մոտ 16-17 մլրդ ռուսական ռուբլի գումարով։