Արմինֆո. ՀՀ կառավարությունը հավանության է արժանացրել «Միջազգային զարգացման ընկերակցության ռեսուրսների քսաներորդ համալրման շրջանակներում Հայաստանի Հանրապետության հանձնառության գործիքին հավանություն տալու մասին» ՀՀ կառավարության որոշման նախագիծը:
Միջազգային զարգացման ընկերակցությունը (ՄԶԸ) Համաշխարհային բանկի խմբի հիմնական կառույցներից է, որի գործունեության հիմնական նպատակը ծայրահեղ աղքատ երկրներին աջակցության տրամադրումն է՝ այդ թվում ի հաշիվ անդամ երկրների (դոնորների) կամավոր նվիրաբերումների:
Հայաստանի Հանրապետությունը 2014 թվականից չի հանդիսանում ՄԶԸ աջակցությունից օգտվող երկիր:
Ինչպես ասվում է ՀՀ Ֆինանսների նախարարության հաղորդագրությունում, նախագծով նախատեսվում է, որ Հայաստանը կմասնակցի ՄԶԸ ռեսուրսների համալրմանը` հանդես գալով որպես ՄԶԸ դոնոր:
ՄԶԸ ռեսուրսների համալրմանն ուղղված ՀՀ ներդրումը կկազմի 700,000 հատուկ փոխառության իրավունք (շուրջ մեկ միլիոն ԱՄՆ դոլար)։
«Այսպիսով, Հայաստանն իր համերաշխությունն է հայտնում աղքատության դեմ պայքարի ՀԲ քաղաքականությանը՝ աջակցելով Բանկի երկու հիմնական նպատակների՝ «մինչև 2030թ. ծայրահեղ աղքատության կրճատում» և «նպաստել երկրների ընդհանուր բարեկեցությանը և բարգավաճմանը» իրագործմանը», - նշված է հաղորդագրությունում:
1960թ. հիմնադրված ՄԶԸ-ի գործունեությունն ուղղված է աղքատության ծավալների կրճատմանը փոխառությունների (կոչվում է "վարկեր") եւ դրամաշնորհների տրամադրման միջոցով ' տնտեսական աճի արագացման, անհավասարության նվազեցման եւ բնակչության կենսապայմանների բարելավման ծրագրերի իրականացման համար: ՄԶԸ-ը նպատակ ունի նվազեցնել աղքատությունը' տրամադրելով ֆինանսավորում և խորհրդատվություն ռազմավարական հարցերի վերաբերյալ' տնտեսական աճի արագացմանն ուղղված ծրագրերի իրականացման, ցնցումների նկատմամբ կայունության բարձրացման և ամբողջ աշխարհում աղքատ բնակչության կենսապայմանների բարելավման նպատակով:
ՄԶԸ -ը գործում է Աֆրիկայի, Արևելյան Ասիայի և Խաղաղ օվկիանոսի 75 երկրներում, Հարավային Ասիայում, Եվրոպայում և Կենտրոնական Ասիայում, Լատինական Ամերիկայում և Կարիբյան ավազանում, Մերձավոր Արևելքում և Հյուսիսային Աֆրիկայում: ՄԶԸ-ի գործող հաճախորդ հանդիսացող երկրների կեսից ավելին արդեն ստանում է ՄԶԸ-ի իրենց հատկացված միջոցներն ամբողջությամբ կամ կիսով չափ ՝ դրամաշնորհների տեսքով։
Վերջին 62 տարիների ընթացքում ՄԶԸ–ն աշխարհի 114 երկիր է ուղարկել մոտ 458 մլրդ ԱՄՆ դոլարի ներդրում։ 2022 թվականի հունիսի 30-ին ավարտված ֆինանսական տարում ՄԶԸ-ի պարտավորությունները կազմել են, ընդհանուր առմամբ, 37,7 միլիարդ դոլար, որից 13,2 միլիարդ դոլարը դրամաշնորհ է: Աֆրիկյան տարածաշրջանը ստացել է ընդհանուր պարտավորությունների 73 տոկոսը: 1960 թվականից ի վեր ՄԶԸ -ն 496 միլիարդ ԱՄՆ դոլար է տրամադրել 114 երկրների: Տարեկան պարտավորությունները անշեղորեն աճել են և վերջին երեք տարիների ընթացքում (20-22 ֆինանսական տարիներ) կազմել են միջինը մոտ 34,7 միլիարդ ԱՄՆ դոլար:
Երեսունվեց Երկիր դուրս է եկել այդ ցուցակից, և նրանցից շատերը դարձել են ՄԶԸ դոնորներ, այդ թվում ՝ Չինաստանը, Չիլին, Հնդկաստանը, Հարավային Կորեան և Թուրքիան: