Արմինֆո.Փոխվարչապետ Տիգրան Խաչատրյանն աշխատանքային հանդիպում է ունեցել Արժույթի միջազգային հիմնադրամի (ԱՄՀ) հայաստանյան առաքելության ղեկավար Իվա Պետրովայի եւ Հայաստանում ԱՄՀ մշտական ներկայացուցիչ Մեհդի Ռաիսսի հետ:
Կառավարության հաղորդագրության համաձայն, հանդիպման սկզբում փոխվարչապետ Խաչատրյանը, ողջունելով հյուրերին, բարձր է գնահատել ԱՄՀ պատրաստակամությունը մշտապես աջակցելու ՀՀ կառավարության բարեփոխումների ծրագրերին:
Իվա Պետրովան, շնորհակալություն է հայտնել ընդունելության համար եւ ընդգծել Հայաստանի կառավարության հետ ունեցած գործընկերային բարձր հարաբերությունները՝ վստահություն հայտնելով, որ արդյունավետ փոխգործակցությունը հետագայում եւս շարունակական կլինի:
Կողմերը քննարկել են երկուստեք հետաքրքրություն ներկայացնող հարցերի լայն շրջանակ, մասնավորապես՝ անդրադարձել են մակրոտնտեսական վերջին զարգացումներին, կապիտալ ծախսերին եւ հարկային քաղաքականությանն առնչվող թեմաներին:
Հանդիպման ավարտին ձեռք են բերվել մի շարք պայմանավորվածություններ առաջիկայում աշխատանքային ձեւաչափով շարունակելու ընթացիկ ծրագրերի քննարկումները:
Նշենք, որ ԱՄՀ-ում ակնկալում են Հայաստանի տնտեսության 4,5 տոկոս աճ 2023 թվականին:
Հիշեցնենք, որ Արժույթի միջազգային հիմնադրամը (ԱՄՀ) 2022թ. դեկտեմբերի 13-ին հաստատել է Հայաստանի պահուստային վարկավորման եռամյա ծրագիրը ՝ շուրջ $171.1 մլն (128.8 մլն SDR) գումարի չափով։ ԱրմԻնֆո-ի հետ հարցազրույցում Հայաստանում ԱՄՀ մշտական ներկայացուցիչ Մեհդի Ռաիսսին (Mehdi Raissi) նշել է, որ ԱՄՀ-ի և Հայաստանի միջև ձեռք բերված պայմանավորվածության համաձայն, հիմնադրամի աշխատանքը միտված կլինի աջակցելու Հայաստանի իշխանությունների ջանքերին ՝ ուղղված մակրոտնտեսական կայունության պահպանմանը, ապագայում ներդրումներ կատարելուն, ներառական տնտեսական աճին ձգտելուն և բացասական ռիսկերից անվտանգության բարձիկ ապահովելուն:
RUB | 4.37 | -0.01 |
USD | 401.96 | -0.67 |
EUR | 438.10 | -0.36 |
GBP | 511.98 | -1.33 |
CAD | 296.82 | -0.70 |
JPY | 26.96 | -0.10 |
CNY | 55.84 | -0.11 |
CHF | 455.17 | -0.60 |