Երեթշաբթի, 28 Մարտի 2023 13:41

Արմինֆո. ՀՀ փոխվարչապետ Տիգրան Խաչատրյանի գլխավորությամբ տեղի է ունեցել Հյուսիս-հարավ ճանապարհային միջանցքի, Մ-6, Վանաձոր-Ալավերդի-Վրաստանի սահման միջպետական ավտոմոբիլային ճանապարհի վերականգնման եւ բարելավման, Քաղաքային Կայուն Զարգացման Ներդրումային եւ Հյուսիսային միջանցքի արդիականացման ծրագրերի կառավարման խորհրդի հերթական նիստը։
Նիստի ընթացքում քննարկվել են Քաջարանի շուրջ 7 կմ երկարությամբ թունելի կառուցման եւ մոտեցող ճանապարհների վերակառուցման ներդրումային ծրագրի իրականացման վերաբերյալ հարցերը։ Բարձրացվել են նաեւ Հյուսիս-հարավ ճանապարհային միջանցքի ներդրումային ծրագրի Տրանշ 3՝ Լանջիկ–Գյումրի հատվածի իրականացման առաջընթացը եւ առկա խնդիրները։ Հավանություն է տրվել դեպի Ակունք, Մաստարա եւ Լանջիկ բնակավայրեր լրացուցիչ մուտքեր կառուցելու առաջարկությանը։
Անդրադրաձ է արվել Տրանշ 4, Սիսիան-Քաջարան հատվածի կառուցման նպատակով օտարման եւ տարաբնակեցման գործընթացն իրականացնելու կարեւորությանը եւ այդ նպատակով մասնագիտական խումբ ներգրավելու անհրաժեշտությանը։ Հանձնարարվել է իրականացնել համապատասխան ծառայությունների գնման գործընթաց:
Դիտարկվել են նաեւ Մ-6, Վանաձոր-Ալավերդի-Վրաստանի սահման միջպետական ավտոմոբիլային ճանապարհի վերականգնման եւ բարելավման ծրագրի ավարտման փուլի վերաբերյալ հարցերը։ Աշխատանքների որակի երաշխիքային ժամկետում պատշաճ վերահսկողություն ապահովելու նպատակով քննարկվել է տեխնիկական հսկողի ծառայությունների ժամկետը երկարաձգելու անհրաժեշտությունը։

Հիշեցնենք, որ "Հյուսիս-Հարավ" նախագիծը թույլ կտա իրանական սահմանից մինչև վրացական սահման հեռավորությունը 556-ից կրճատել մինչև 490 կմ: Նախագիծը կապահովի ելք դեպի Սև ծով և եվրոպական երկրներ՝ Հայաստանի (Մեղրի-Կապան - Գորիս-Երևան - Աշտարակ-Գյումրի - Բավրա) և Վրաստանի տարածքով: Միջանցքի շինարարությունն ի սկզբանե նախատեսվում էր ավարտել 2019 թվականին։ Ծրագրի արժեքը մշտապես վերանայվել է դեպի բարձրացում։ Մինչդեռ 2012թ. սեպտեմբերին, երբ սկսվեց ավտոմայրուղու շինարարությունը, գումարը, որը նշում էին Հայաստանի կառավարության ներկայացուցիչները, մի քանի անգամ պակաս էր՝ 962 մլն դոլար։ Ասիական զարգացման բանկը 2009 թվականին արդեն ավտոմայրուղու կառուցման համար տրամադրել է ավելի քան կես միլիարդ ԱՄՆ դոլար:

Մ1 Երևան-Գյումրի-Վրաստանի սահման ավտոճանապարհի Թալին - Լանջիկ (Տրանշ -3) հատվածի վերակառուցումն իրականացվում է Ասիական զարգացման բանկի աջակցությամբ: "Հյուսիս-Հարավ" տրանսպորտային միջանցքի Տրանշ-3 ծրագրի (Թալին-Լանջիկ՝ 18,7 կմ, Լանջիկ-Գյումրի՝ 27,5 կմ, ընդհանուր երկարությունը ՝ մոտ 46,2 կմ) ավարտը նախատեսվում է կառավարության 2021-2026թթ. ծրագրի շրջանակում:

Ինչ վերաբերում Է Քաջարան-Ագարակ 32 կիլոմետրանոց հատվածի (Տրանշ-4) վերակառուցման նախագծին, ապա այն ֆինանսավորվում է Կայունացման և զարգացման եվրասիական հիմնադրամի կողմից, ինչպես նաև ՀՀ պետական բյուջեով: Վերակառուցվող 32 կմ երկարությամբ ճանապարհահատվածը կլինի երկրորդ տեխնիկական կատեգորիայի՝ 80 կմ/ժ հաշվարկային արագությամբ: ճանապարհահատվածը կներառի 18 կամուրջ, 3 թունել, որոնցից ամենաերկարը կկազմի 7,5 կմ: Մեծ բեռնատարները կունենան սեփական երթևեկելի գոտի, ինչը կհեշտացնի բեռների փոխադրումը:

Մ6 (Վանաձոր - Ալավերդի - Վրաստանի սահման) մայրուղու վերանորոգման աշխատանքներն իրականացվում են Ասիական զարգացման բանկի 50 մլն դոլար վարկային միջոցներով: Շինարարության արդյունքում Վանաձորից Վրաստանի սահման անցնելու ժամանակը կկրճատվի, ճանապարհի թողունակությունը կբարձրանա օրական մինչև 3500 մեքենա ՝ նախկին 2800-ի փոխարեն: Նախագիծը նախատեսվում էր ավարտել մինչև 2021 թվականի օգոստոսի վերջ, սակայն, ինչպես հաղորդվել է, աշխատանքների ժամկետները հետաձգվել են լրացուցիչ ջրահեռացման գծերի կառուցման, նոր կոյուղու խողովակների տեղադրման անհրաժեշտության, ինչպես նաև 2020 թվականի ճգնաժամային իրադարձությունների պատճառով։