Ուրբաթ, 31 Մարտի 2023 19:44

Արմինֆո. Ամերիաբանկը ճանաչվել է 2023թ. Հայաստանի Լավագույն բանկը Global Finance հեղինակավոր ամսագրի կողմից։ Ինչպես ԱրմԻնֆո-ին հաղորդել են բանկի մամուլի ծառայությունից, մրցանակը հայտարարվել է ամսագրի կողմից անցկացվող աշխարհի լավագույն բանկերի 30-րդ ամենամյա մրցանակաբաշխության շրջանակում։ 
Աշխարհի առաջատար բանկերն ընտրելիս Global Finance-ը դիտարկել է այնպիսի չափորոշիչներ, ինչպիսիք են ակտիվների աճը, եկամտաբերությունը, աշխարհագրական ծածկույթը, ռազմավարական հարաբերությունները, նոր բիզնեսի զարգացումն ու պրոդուկտների նորարարությունը։ Ընտրության համար հիմք են հանդիսացել կապիտալի և վարկանիշային վերլուծաբանների, բանկային խորհրդատուների, ինչպես նաև համաշխարհային ֆինանսական ոլորտում ներգրավված այլ մասնագետների կարծիքները: Այս տարվա մրցանակակիրներն այն բանկերն են, որոնք խնդրահարույց շուկաներում դրսևորել են հոգատարություն,  արձագանքել են իրենց հաճախորդների կարիքներին և լավ արդյունքներ արձանագրել` հիմք դնելով հետագա հաջողության համար:

«Քանի որ բանկային ճգնաժամը տարածվում է ԱՄՆ-ից դեպի այլ տարածաշրջաններ, ծառայությունների, կայունության և ինստիտուցիոնալ գիտելիքների տեսանկյունից լավագույն բանկերին բացահայտելն այժմ ավելի կարևոր է, քան երբևէ, - նշել է Global Finance ամսագրի հրատարակիչ և գլխավոր խմբագիր Ջոզեֆ Դ. Ջիարապուտոն: - Այս տարվա «Լավագույն բանկ» մրցանակը շնորհվում է այն ֆինանսական հաստատություններին, որոնք առաջարկում են ծառայությունների ամենալայն շրջանակը, ինչպես նաև ապահովում են երկարաժամկետ ֆինանսական հարաբերությունների համար պահանջվող հուսալիությունը»:

Ամերիաբանկի Տնօրինության նախագահ-գլխավոր տնօրեն Արտակ Հանեսյանը նշել է. «Շատ ուրախ ենք ստանալ «Լավագույն բանկ» մրցանակը Global Finance ամսագրի կողմից, ինչը վկայում է անցած տարվա ընթացքում բիզնեսի բոլոր ուղղություններով մեր կայուն աճի մասին: Քանի որ այս հեղինակավոր մրցանակն արդեն իններորդ անգամ է մեզ շնորհվում, այն այլևս ընդամենը մեկ տարվա ֆինանսական արդյունքների մասին չէ: Սա ավելի քան մեկ տասնամյակ մեր գրանցած կայուն ցուցանիշների ճանաչումն է, որը նաև արտացոլում է մեր երկարաժամկետ ռազմավարության ճկունությունն ու կայունությունը: Ընդունելով  և ողջունելով այս ճանաչումը՝ մենք վերահաստատում ենք մեր հանձնառությունը՝ բավարարելու մեր հաճախորդների փոփոխվող կարիքները և նորարարություն ներմուծելու ֆինանսական ծառայություններում՝ առանձնահատուկ ուշադրություն դարձնելով թվայնացմանը, ֆինանսական պատասխանատվությանը և երկարաժամկետ կայունությանը»: Նշենք, որ Ամերիաբանկը «Հայաստանի լավագույն բանկ» մրցանակին արժանանում է 9-րդ անգամ և երրորդ տարին անընդմեջ։  Հրակ է հիշեցնել, որ օրեր առաջ նույն հեղինակավոր Global Finance պարբերականի վարկածով Ամերիաբանկը ճանաչվել էր Հայաստանի 2023 թվականի լավագույն ներդրումային բանկ: Այս կոչմանը բանկն արժանանում է ութերորդ տարին անընդմեջ։

Նշենք, որ Ամերիաբանկը, հանդիսանալով առաջատար ֆինանսա-տեխնոլոգիական կազմակերպություն, կարևոր դեր է խաղում Հայաստանի տնտեսության մեջ: Ամերիաբանկի ակտիվների ծավալը գերազանցում է 1 տրիլիոն դրամը: Ընթանալով թվայնացման ուղով՝ բանկը ներդրել է մի շարք նորարարական ծրագրեր և հարթակներ, շարունակելով կատարելագործել դրանք, ձևավորելով դինամիկ զարգացող ֆինանսատեխնոլոգիական միջավայր ՝ ուղղված մարդու տարբեր պահանջմունքների բավարարմանը: Ամերիան առաջինն է Հայաստանում ստեղծել էկոհամակարգեր ՓՄՁ-ների և մասնավոր անձանց համար ՝ ապահովելով "մեկ պատուհանի" սկզբունքով մի շարք բանկային և ոչ բանկային ծառայությունների հասանելիություն. Estate.ameriabank.am, Automarket.ameriabank.am, Business.ameriabank.am. Ամերիան, լինելով հաճախորդամետ, ձգտում է ապահովել սպասարկման բարձր որակ ժամանակակից թվային աշխարհում ՝ առաջարկելով հուսալի և անվտանգ միջավայրում կյանքի որակի բարելավման համալիր լուծումներ: