Արմինֆո.Ռուսաստանը, արգելելով կաթնամթերքի ներմուծումը Հայաստանից, փորձում է «դեմո պատժամիջոցների» տեսքով պատկերավոր կերպով ցույց տալ, թե ինչ կարող է լինել մեր տնտեսության հետ։ Այդպիսի կարծիք է հայտնել Modex խորհրդատվական ընկերության տնօրեն Հայկազ Ֆանյանը:
Մարտի 31-ին հաղորդվել էր, որ "Ռոսսելխոզնադզորը" Հայաստանին խնդրում է 2023 թվականի ապրիլի 5-ից դադարեցնել կաթնամթերքի մատակարարումը Ռուսաստան։ Նշվել է, որ Հայաստանի կաթի վերամշակման ձեռնարկություններն օգտագործում են Իրանի Իսլամական Հանրապետության ձեռնարկությունների արտադրած հումքը, որոնց նկատմամբ "Ռոսսելխոզնադզորը" սահմանափակող միջոցներ է կիրառել: Հայտնաբերված խախտումների բնույթը վկայում է նաև պետական անասնաբուժական ծառայության կողմից կաթի վերամշակման ձեռնարկությունների գործունեության նկատմամբ պատշաճ վերահսկողության բացակայության մասին, ինչի առնչությամբ ծագում են անորակ և անապահով ապրանքների Ռուսաստան ներմուծման ռիսկեր: "Ռոսսելխոզնադզորի հատուկ մտահոգությունն են առաջացնում երրորդ երկրների ձեռնարկությունները Մաքսային միության գրանցամատյաններում ներառելու դեպքերը ՝ առանց ռուսական կողմի հետ համաձայնեցման կամ ի հեճուկս պաշտոնական մերժման, որն ուղղված է ԵԱՏՄ անդամ երկրների իրավասու ծառայությունների հասցեին",-ասվում է գերատեսչության հաղորդագրության մեջ:
Ինչպես նշվում է Modex-ի ֆեյսբուքյան էջում, 2021-2022 թթ. Հայաստանից Ռուսաստան է արտահանվել 15.3 մլն-ի և 30.1 մլն-ի կաթնամթերք, որը կազմում է Հայաստանից Ռուսաստան արտահանման, համապատասխանաբար, 1.9%-ը և 1.3%-ը։
Այս ապրանքային խմբում Հայաստանից Ռուսաստան, հիմնականում, արտահանվում է պանիր (89.8%, 2021թ.), իսկ 2022 թվին կարագի և կաթնային յուղերի կտրուկ աճը, թերևս, վերաարտահանման արդյունք է (առավելապես Իրանից)։
«Մեր «ինքնիշխանության» կամ մեր շահերի պաշտպանության (ՄՔԴ-ին միանալու) գինը այն վնասներն են, որ կկրի մեր տնտեսությունը այս և նմանատիպ այլ որոշումներից։ Հայաստանի կառավարությունը և մասնավոր ընկերությունները օր առաջ պետք է քայլեր ձեռնարկեն արտահանման դիվերսիֆիկացման ուղղությամբ, այդ թվում՝ (1) ձևավորեն արտահանման խթանման կարողություններ Enterprise Armenia-ի անձրևանոցի տակ կամ առանձին գործակալության տեսքով, (2) կտրուկ ավելացնեն արտահանման դիվերսիֆիկացման խթանման ծախսերը (փող կա)... Պի՛նդ լինենք!!!», - «Ֆեյսբուքի» իր էջում գրել է Ֆանյանը:
