"ՄՏՍ Հայաստան"-ի վաճառքի գործարքը կմերժվի՝ ելնելով ազգային անվտանգության նկատառումներից

Արմինֆո. "ՄՏՍ Հայաստան" հեռահաղորդակցական ընկերությունը չի կարող վաճառվել, քանի որ Հայաստանի Հանրային ծառայությունները կարգավորող հանձնաժողովը (ՀԾԿՀ) մտադիր է մերժել կապի օպերատորի նկատմամբ վերահսկողության փոխանցման գործարքի կնքման թույլտվություն ստանալու վերաբերյալ ընկերության հայտը:

Ինչպես նշվում է կարգավորիչի կայքում, այդ հարցով հանձնաժողովի նիստը նշանակված է ապրիլի 12-ին: Որոշման նախագծում ասվում է, որ 2023 թվականի հունվարի 26-ին "ՄՏՍ Հայաստան" ՓԲԸ-ն հայտ է ներկայացրել ՀԾԿՀ, ըստ որի, "Ֆեդիլկո Գրուպ Լիմիթեդ" ՍՊԸ-ն (գրանցված է Կիպրոսում) ցանկանում է "Ալեգրետտո Հոլդինգ" ՍՊԸ-ից (գրանցված Է Լյուքսեմբուրգում) ձեռք բերել նրան պատկանող "Արամայո Ինվեսթմենթ Լիմիթեդ" ՍՊԸ-ի 100% բաժնեմասը (գրանցված է Կիպրոսում)։ Նշվում է նաև, թե, հաշվի առնելով այն հանգամանքը, որ "Ալեգրետտո Հոլդինգ" ՍՊԸ-ն պատկանում է ռուսաստանյան հեռահաղորդակցության օպերատոր "Մոբիլնիե տելեսիստեմի" ՀԲԸ-ին (գրանցված Է ՌԴ-ում), ապա տվյալ գործարքի արդյունքում ընկերությունը կդադարի լինել ՄՏՍ խմբի անդամ:

Սակայն Բարձր տեխնոլոգիական արդյունաբերության նախարարությունը, ի պատասխան ՀԾԿՀ-ի ս.թ. փետրվարի 2-ի հարցմանը, մարտի 30-ին հայտարարել է, որ հարցը քննարկվել է ՀՀ շահագրգիռ գերատեսչությունների հետ, ինչի արդյունքում նախարարությունը, իրեն վերապահված լիազորությունների շրջանակում, առարկում է "էլեկտրոնային հաղորդակցության մասին" ՀՀ օրենքի 14-րդ հոդվածի, 3-րդ մասի հիման վրա գործարքի իրականացմանը: "Գործարքի համաձայնեցումը կարող է մերժվել ներկայացված փաստաթղթերի' ՀԾԿՀ պահանջներին չհամապատասխանելու դեպքում, կամ՝ եթե կարգավորիչը գտնում է, որ գործարքը սպառնում է Հայաստանի Հանրապետության ազգային անվտանգությանը կամ պետական շահերին", - պարզաբանել են ՀԾԿՀ-ում:

Հաշվի առնելով վերը շշարադրվածը՝ ՀԾԿՀ-ն որոշել է մերժել "ՄՏՍ Հայաստանի" նկատմամբ վերահսկողությունը մեկ այլ ընկերության փոխանցելու գործարքի իրականացման հայտը:

Կարգավորիչի որոշումը կարող է վիճարկվել հենց հանձնաժողովի կողմից՝ դրա ուժի մեջ մտնելու օրվանից 30 օրվա ընթացքում, կամ՝ 2 ամսվա ընթացքում Վարչական դատարանում: Որոշման բողոքարկումը չի կասեցնում դրա գործողությունը կամ կատարումը:

Հիշեցնենք, որ մարտի 30-ին ՀՀ Հանրային ծառայությունները կարգավորող հանձնաժողովի նախագահ Գարեգին Բաղրամյանը, առևտրային գաղտնիքի պատճառով հրաժարվելով նշել գնորդին, հավելել էր, որ գործարքը կարող է ամբողջությամբ ավարտվել մինչև ապրիլի 10-ը: Ընդ որում, նրա խոսքով, երկրում գործող օպերատորներից մեկի կողմից "ՄՏՍ Հայաստան" - ի ձեռքբերման մասին խոսք չի գնում, քանի որ այդ դեպքում կարող է տեղի ունենալ շուկայի կենտրոնացում:

Նշենք, որ "ՄՏՍ Հայաստան" հեռահաղորդակցային ընկերությունը (VivaCell - MTS ապրանքանիշ) Հայաստանի հեռահաղորդակցության օպերատորների շրջանում պահպանում է առաջատար դիրքը խոշորագույն հարկատուների ցանկում: ՀՀ պետական եկամուտների կոմիտեի տվյալներով՝ 2022 թվականին "ՄՏՍ Հայաստան" -ը պետական գանձարան է վճարել 15.9 մլրդ դրամ (10-րդ տեղը ՝ նախորդ տարվա 8-րդի դիմաց), որից 13.7 մլն դրամը՝ մաքսատուրքերի, 5.6 մլրդ դրամը՝ ուղղակի հարկերի (այդ թվում ՝ շահութահարկ, եկամտահարկ), ավելի քան 6.9 մլրդ դրամը՝ ԱԱՀ-ի գծով։

ՎիվաՍել-ՄՏՍ-ը Հայաստանի հեռահաղորդակցության շուկա է մտել 2005թ.: Այդ պահից ի վեր ընկերությունը Հայաստանի պետբյուջե է վճարել 258 մլրդ դրամի հարկեր։ Աշխատակիցների թիվը կազմում են ավելի քան 1200 մարդ:

ՎիվաՍել - ՄՏՍ-ի բաժանորդների թիվը, ըստ ընկերության տվյալների, գերազանցում է 2 միլիոնը: Ընկերությունը բջջային կապի շուկայում զբաղեցնում է առաջին տեղը։ Այժմ ընկերության հիմնական բաժնետերը ռուսական ՄՏՍ-ն է, որը պատկանում է Վլադիմիր Եվտուշենկովին: