Գնել Սանոսյան. ԶՊՄԿ-ի գործարքը լավ օրինակ է մյուս ընդերքօգտագործողների համար

Արմինֆո.Զանգեզուրի պղնձամոլիբդենային կոմբինատի աշխատանքի ցուցանիշները տպավորիչ են։ Այդ մասին ապրիլի 20-ին ԱԺ արտահերթ նիստում հայտարարել է տարածքային կառավարման եւ ենթակառուցվածքների նախարար Գնել Սանոսյանը։

Նրա խոսքով ՝ միայն անցյալ տարի ԶՊՄԿ-ը շուրջ 144 մլրդ դրամի հարկ է վճարել։ Համեմատության համար նախարարը ներկայացրել է 2021 թվականին ընկերության հարկային հատկացումների ծավալները, որոնք կազմել են ընդամենը 48 մլրդ դրամ։ Նման էական աճը, ինչպես նշել է նախարարը, կապված է ԶՊՄԿ-ի կանոնադրական կապիտալում կառավարության մասնակցության հետ։ "Համատեղ ջանքերով բարելավվել է կոմբինատի կառավարման որակը, շատ հարցերում կառավարությունն աջակցություն է ցուցաբերում ձեռնարկությանը", - ընդգծել է Սանոսյանը, հավելելով, որ ԶՊՄԿ-ի կառավարման ներկայիս մոդելն իրեն արդարացնում է:

Միևնույն ժամանակ, նա նշել է մետաղների համաշխարհային գների աճը։ "Հուսով եմ, որ ապագայում կառավարման մոդելը մշտապես կբարելավվի, իսկ համաշխարհային գներն այնպիսի մակարդակում կլինեն, որ ընկերությունը մեծ շահույթ կստանա եւ լայնածավալ հարկային հատկացումներ կիրականացնի երկրի բյուջե", - ասել է Սանոսյանը:

Նա հավելել է, որ ԶՊՄԿ-ին առնչվող գործարքը լավ օրինակ էր մյուս ընդերքօգտագործող ընկերությունների համար, որոնք տեսան, թե ինչպես պետությունը, ճկուն քաղաքականություն իրականացնելով, կարող է նպաստել ընկերությունների և, ընդհանրապես, ոլորտի զարգացմանը:

Արդեն կան այնպիսի ընկերություններ, որոնք պետությանն առաջարկում են բաժնետոմսերի մի մասը, հույս ունենալով, որ կառավարությունն իրենց կաջակցի մի շարք հարցերում։ Դրա վառ օրինակն է Ամուլսարի ոսկու հանքավայրը յուրացնող "Լիդիան" ընկերության հետ վերջերս ստորագրված հուշագիրը, որի համաձայն, կառավարությունը կստանա ընկերության բաժնետոմսերի 12,5 տոկոսը:

Հիշեցնենք, որ Հայաստանում ավելի քան 15 տարի գործող "Գեոպրոմայնինգ" ընկերության հետ փոխկապակցված "Արդյունաբերական ընկերություն" ԲԸ-ն ձեռք է բերել ԶՊՄԿ-ի բաժնետոմսերի 60% - ը և 2021 թվականի սեպտեմբերի 30-ին իր բաժնեմասի 25% - ը նվիրաբերել է Հայաստանի կառավարությանը։ 2022 թվականի մարտի 24-ին կառավարությունը նվիրատվությամբ ստացել է բաժնետոմսերի ևս 6,875%-ը՝ այդպիսով դառնալով կոմբինատի բաժնետոմսերի 21,875%-ի կամ բաժնեմասի 1/5-ի սեփականատերը։