Երկուշաբթի, 8 Մայիսի 2023 15:54

Արմինֆո. ՀՀ հանրային ծառայությունները կարգավորող հանձնաժողովն իրականացրել և ավարտել է 700ՄՀց և 800ՄՀց ռադիոհաճախականությունների հատվածների օգտագործման թույլտվություններ տրամադրելու նպատակով մրցույթները։

 

ՀԾԿՀ հաղորդագրության համաձայն, նշված մրցույթների արդյունքում 700ՄՀց ռադիոհաճախականությունների տիրույթի 2x20ՄՀց հատվածի հաղթող է ճանաչվել «Տելեկոմ Արմենիա» ԲԲԸ-ն, իսկ 800ՄՀց ռադիոհաճախականությունների տիրույթի 2x10ՄՀց հատվածի հաղթող՝ «ՄՏՍ Հայաստան» ՓԲԸ-ն։

 

«Տրամադրված թույլտվություններով սահմանված պարտավորությունների կատարման արդյունքում 2 տարվա ընթացքում հանրապետության խոշոր քաղաքներում՝ Երևանում, Գյումրիում, Վանաձորում կգործարկվի շարժական լայնաշերտ կապի 5G տեխնոլոգիայի ցանց՝ առավելապես «իրերի ինտերնետ»/IoT տեխնոլոգիայի ներդրմամբ: Կբարելավվի փակ (ներտնային) տարածքներում շարժական լայնաշերտ կապի ծածկույթի հասանելիության որակը, կբարձրացվի կապի ցանցերի հուսալիության և անվտանգության մակարդակն ու կարդիականացվեն անվտանգության համակարգերը, ՀՀ պաշտպանունակության ամրապնդման նպատակով կզարգացվեն (կընդլայնվեն) կապի առկա ենթակառուցվածքները, ինչպես նաև հեռահաղորդակցության բնագավառի մասնագիտությունների կրթական ծրագրերով մասնագիտացված ՀՀ պետական բարձրագույն ուսումնական հաստատությունում կհիմնվի էլեկտրոնային հաղորդակցության շարժական կապի ծառայություններ մատուցելու հնարավորությամբ ուսումնական լաբորատորիա, որը կնպաստի նշված մասնագիտությունների կրթական ծրագրերով մասնագիտացվող՝ ոլորտի համար անհրաժեշտ որակյալ կադրերի պատրաստմանը։

 

Մրցութային հիմունքներով նշված ռադիոհաճախականությունների տրամադրմամբ ապահովվել են 2,250 մլրդ դրամի միանվագ (տրամադրման մասով), իսկ հետագայում նաև 1,176 մլրդ դրամ տարեկան (օգտագործման մասով) պետական բյուջեի լրացուցիչ մուտքեր, ռադիոհաճախականությունների օգտագործման պարտադիր վճարների մասով ներկայումս տարեկան շուրջ 8 մլրդ դրամի պետական բյուջեի մուտքերը հասցնելով ավելի քան 9,5 մլրդ դրամի», - ավսում է հաղորդագրությունում։

 

Հիշեցնենք, որ 2023 թվականի մարտին Team Telecom Armenia-ի գլխավոր տնօրեն Հայկ Եսայանը հաղորդել էր, որ ընկերությունը հնարավորություն է ստանում տեղակայել 5G հինգերորդ սերնդի ցանց: Նրա խոսքով ՝ Team Telekom Armenia-ն առաջինն է Հայաստանի կապի օպերատորների շարքում, որը դիմել է 700 ՄՀց տիրույթ ստանալու համար, որն ընկերությունն օգտագործում է 5G ցանցը հասանելի դարձնելու համար: Պատասխանելով ԱրմԻնֆո-ի թղթակցի հարցին՝ Team Telecom Armenia-ի ղեկավարը նշել է, որ սպառողն այսօր 5G-ի կարիք չունի, քանի որ իր մոդուլյացիայով տվյալ ցանցն այնքան էլ չի տարբերվում եղածից, և դա ավելի շատ մարքեթինգային քայլ է: <Բայց եթե այսօր այդ հաճախականությունը չվերցնենք, ապա հետո հետ կմնանք։ Ինչու՞ մենք առաջինը չլինենք> ,- նշել էր Հայկ Եսայանը։