Արմինֆո. Երևանի փայլաթիթեղագլանման ԱՐՄԵՆԱԼ գործարանը, որը աշխարհում ալյումին արտադրող խոշորագույն ընկերություներից մեկի՝ ՌՈՒՍԱԼ-ի կառույցում է, նշել է իր մասնագիտական տոնը՝ Մետալուրգի օրը։ Այդ մասին ասվում է ԱՐՄԵՆԱԼ-ի հաղորդագրությունում:
«Մեր ձեռնարկությունը չի ունեցել անհոգ շրջաններ։ Բայց ամեն անգամ ընդհանուր ջանքերով մենք գտել ենք լուծումներ, հաղթահարել դժվարությունները և մղվել դեպի առաջ։ Հավատում եմ, որ այդպես կլինի միշտ, քանի որ աշխատանքային կոլեկտիվը վերածվել է համախումբ հզոր օրգանիզմի, որի բոլոր ստորաբաժանումները գործում են համաժամանակյա», - հայտարարել է ԱՐՄԵՆԱԼ-ի գլխավոր տնօրեն Արթուր Զաքարյանը։
Մետալուրգի օրվա պատվին գործարանի լավագույն աշխատողների մի խումբ արժանացել է ոլորտային և գերատեսչական պարգևների։
Գլխավոր տնօրեն Արթուր Զաքարյանը հանձնել է ՌՈՒՍԱԼ-ի պատվոգրեր անձնակազմի գծով տնօրեն Սվետլանա Լևենին, գունավոր մետաղների ձուլող Արտակ Հովհաննիսյանին և կենտրոնական լաբորատորիայի լաբորանտ Սիրանուշ Իսրայելյանին։
Մետալուրգների և լեռնագործների հանրապետական արհմիության անունից գործարանի զարգացմանն ուղղված բազմամյա աշխատանքի համար հուշամեդալներով պարգևատրվել են գլխավոր մեխանիկի ծառայության վարպետ Արթուր Կարապետյանը, փաթթոցների վերափաթաթող Հովել Գրիգորյանը և մամլո քարտուղար Ալեքսանդր Մելքումյանը։
Տասնյակից ավելի ալյումինագործներ արժանացել են ՌՈՒՍԱԼ-ի Դաունսթրիմ դիվիզիոնի, ԱՐՄԵՆԱԼ գործարանի, Մետալուրգների և լեռնագործների հանրապետական արհմիության պատվոգրերի և շնորհակալագրերի։
Մետալուրգի օրվա առիթով ամփոփվել են «Տարվա բարելավումներ» մրցույթի գործարանային փուլի արդյունքները երեք անվանակարգերով։ Հաղթողները ստացել են պատվոգրեր և դրամական պարգևավճարներ։
