ՀԾԿՀ ղեկավար. Ջրամատակարարման համակարգը մաշված է

Արմինֆո. Եկեք ընդունենք, որ մեր ջրամատակարարման համակարգը մաշված է և մեծ ծավալի ներդրումներ է պահանջում։ Այդ մասին օգոստոսի 17-ին լրագրողների հետ ճեպազրույցում հայտարարել է Հանրային ծառայությունները կարգավորող հանձնաժողովի նախագահ Գարեգին Բաղրամյանը՝ պատասխանելով մայրաքաղաքում ջրամատակարարման հաճախակի ընդհատումների վերաբերյալ հարցին։

"Ըստ այն բանի, թե պետությունն ինչ ներդրումներ կարող է իրեն թույլ տալ, այդպիսի որակական  փոփոխություններ էլ պետք է ակնկալել", - ասել է նա:

Բաղրամյանը նշել է, որ "Վեոլիա Ջուր" ընկերությունը (ջրամատակարարման և ջրահեռացման օպերատոր Երևանում և մի շարք մարզերում) ունի կոնկրետ պարտավորություններ, որոնք կատարում է սահմանափակ ներդրումների դեպքում: Այդ առնչությամբ նա ընդգծել է, որ ամեն տարի ընկերությանը հատկացվում է շուրջ 3 մլրդ դրամ ՝ նման ծավալն անվանելով "կաթիլ ծովում" հանրապետության ողջ մասշտաբով ։ "Այդ միջոցները կարելի է ուղղել միայն առավել մաշված հատվածների փոխարինմանը", - ասել է ՀԾԿՀ նախագահը:

Նա ընդգծել է, որ ամառային սեզոնին ջրի նկատմամբ պահանջարկն ավելանում է, ինչի պատճառով բարձրանում է ճնշումը համակարգում, սակայն վերջինիս մաշվածության պատճառով վթարները հաճախակիանում են:

Միաժամանակ, Բաղրամյանը նշել է, որ ջրի մատակարարման երկարատև ընդհատումների դեպքում օպերատորը ստանում է որոշակի տուգանքներ:

Նշենք, որ վերջին շրջանում անոմալ շոգի պայմաններում, երբ ցերեկային ժամերին օդի ջերմաստիճանը գերազանցում է 40 աստիճանը, մայրաքաղաքում հաճախակի են դարձել վթարային ջրանջատումների դեպքերը: Բացի այդ, Երևանի որոշ շրջաններում ջուրն անջատվել է մեկ օր և ավելի ։ Ջրի հետ կապված իրավիճակը շարունակում է անկայուն մնալ։

Հիշեցնենք, որ "Վեոլիա Ջուր" ՓԲԸ-ն (ֆրանսիական"Veolia Generale des Eaux" - ի դուստր ձեռնարկությունը) հանդիսանում է Երևանում և Հայաստանի մի շարք մարզերում ջրամատակարարման և ջրահեռացման միասնական օպերատոր: 2017 թվականի հունվարի 1-ից "Վեոլիա Ջուր" - ին է անցել հինգ ընկերությունների՝ "Երևան Ջուր", "Հայջրմուղկոյուղի", "Շիրակ ջրմուղկոյուղի", "Լոռի ջրմուղկոյուղի" և "Նոր Ակունք" ընկերությունների գույքի կառավարումը: