Արմինֆո.Անցյալ տարի աշնանացան ցորեն աճեցնող ֆերմերներին պետական աջակցության ծրագիրը բավական հաջող էր։ Այդ մասին օգոստոսի 24-ին լրագրողների հետ ճեպազրույցում հայտարարել է էկոնոմիկայի նախարար Վահան Քերոբյանը։
Ընդ որում, նա նշել է, որ անցած տարվա սեպտեմբերին տեղի ունեցած ռազմական գործողությունները թույլ չտվեցին, որպեսզի Գեղարքունիքի մարզի համայնքներում և Սյունիքի մարզի Սիսիան համայնքում ծրագիրը լիարժեք իրականացվի: Սակայն, այնուամենայնիվ, ինչպես հաղորդել է նախարարը, անցյալ տարի հաջողվել է մշակել 13 հազար հեկտարով ավելի ցանքատարածություններ, որոնց յուրաքանչյուր հեկտարը սուբսիդավորվել է պետության կողմից։
"Ֆերմերների հետ խոսակցությունները ցույց տվեցին, որ մեր աջակցությունը կրիտիկական նշանակություն ուներ, որպեսզի այդ գործով զբաղվող ֆերմերները եկամուտ ունենան", - ասել է Քերոբյանը:
Լրագրողների դիտարկմանը, թե գյուղացիներն իրենց ցորենը չեն կարողանում իրացնել գների անմրցունակության պատճառով, քանի որ ՌԴ-ից մեծ ծավալներով ներկրված ցորենն ավելի ցածր գին ունի, Քերոբյանը նշել է, որ նման խնդիրներ ֆերմերների կողմից չեն բարձրաձայնվել: "Չնայած գները նվազել են , ցորենի արտեր մշակող հայ ֆերմերները շահույթով են աշխատել", - վստահեցրել է նա:
Նշենք, որ Վիճակագրական կոմիտեի տվյալներով ՝ 2023 թվականի հունիսի 1-ի դրությամբ աշնանացան ցորենի ցանքատարածությունները կազմել են 72 857 հա, ինչը 25.2%-ով գերազանցում է մեկ տարվա վաղեմության ցուցանիշը: Մաքսային տվյալների համաձայն ՝ Հայաստանը 2022 թվականին ներմուծել է 364,7 հազար տոննա ցորեն, ինչը 34,4%-ով գերազանցում է մեկ տարվա վաղեմության ցուցանիշը, ընդ որում, մաքսային արժեքն աճել է 64% - ով ՝ մինչեւ 102,3 մլն դոլար։
Հայաստանը ցորեն է ներկրում, հիմնականում, ՌԴ-ից (99,9%)։
Հիշեցնենք, որ նախորդ տարի ՀՀ կառավարության կողմից հավանության էր արժանացել աշնանացան ցորենի արտադրության խթանման պետական աջակցության ծրագիրը: Ինչպես նշել է ՀՀ էկոնոմիկայի փոխնախարար Նարեկ Տերյանը, ծրագրի հիմնական նպատակն է աշնանացան ցորենի սերմերի գների սուբսիդավորման միջոցով նպաստել գյուղատնտեսական բարձր ցուցանիշներով սերմերի մատչելիության ապահովմանը, բերքատվության բարձրացմանը, ցանքատարածությունների ավելացմանը, այդ թվում ՝ չմշակվող հողերի ընդգրկման հաշվին: Այն նաև ուղղված է տնտեսվարող սուբյեկտների եկամուտների աճին։ Կառավարությունը մտադիր է փոխհատուցել տնտեսվարողների ծախսերը 120 հազար դրամի չափով դրամ մեկ հեկտարի համար, եթե ֆերմերները ցանքի համար օգտագործել են ցորենի էլիտար սերմերի սերտիֆիկացված տեսակներ: Իսկ չսերտիֆիկացված սերմացուի օգտագործման դեպքում նրանց կփոխհատուցվի 70 հազար դրամի չափով ծախս (կրկին մեկ հեկտարի հաշվարկով) ։
"Ընդհանուր առմամբ հատուցման ենթակա գումարը կկազմի շուրջ 2 մլրդ 425 մլն դրամ։ Սակայն այս տարի ևս նախատեսել ենք համայնքներին 72 մլն 750 հազար դրամի չափով հատկացում ՝ այս ծրագրով մոնիթորինգ իրականացնելու համար: Դրա համար պետբյուջեից հատկացվող միջոցների չափը կկազմի 2 մլրդ 497 մլն 750 հազար դրամ", - պարզաբանել է փոխնախարարը ։ Առաջին անգամ աշնանացան ցորենի արտադրության խթանման պետական աջակցության ծրագիրը մեկնարկել է դեռևս 2020 թվականի ամռանը ՝ կորոնավիրուսի համավարակի շրջանում ։ Ծրագրի շրջանակներում աշնանացան ցորենի արտադրությամբ զբաղվող և այդ մշակաբույսով 2-20 հեկտար դաշտեր ցանող ֆերմերներին կտրամադրվի պետական սուբսիդավորում կամ գնային փոխհատուցում էլիտար սորտերի բարձրորակ սերմերի գնման համար:
