Արմինֆո.ՀՀ կառավարությունն օգոստոսի 31 - ին հավանություն է տվել "Հայաստանի Հանրապետության կառավարության և Կորեայի Հանրապետության կառավարության միջև տնտեսական, արդյունաբերական և գիտատեխնիկական համագործակցության մասին" համաձայնագիր կնքելու առաջարկությանը:
Ինչպես ասվում է փաստաթղթին կից պարզաբանման մեջ, համաձայնագիրը հնարավորություն կստեղծի ամրապնդելու տնտեսական կապերը երկու պետությունների միջև, ընդլայնելու համագործակցությունը կազմակերպությունների, այդ թվում ՝ փոքր և միջին ձեռնարկությունների միջև ՝ բարենպաստ միջավայր ստեղծելով ներդրումների համար:
Համաձայնագիրը հարթակ կծառայի երկու պետությունների միջև տնտեսական, արդյունաբերական, զբոսաշրջային, գյուղատնտեսական և գիտատեխնիկական համագործակցության ամրապնդման և ընդլայնման, առևտրաշրջանառության ակտիվացման և փոխգործակցության զարգացման համար: Վերջինս նաև հնարավորություն է տալիս դյուրացնել երկու երկրների շփումներն իրենց պետական հաստատությունների միջև, ինչպես նաև ընդլայնել կապերը կազմակերպությունների, պալատների և ասոցիացիաների միջև, նպաստել այցերին, շփումներին, ինչպես նաև կազմակերպել տոնավաճառներ, ցուցահանդեսներ, սեմինարներ և այլ միջոցառումներ՝ երկու երկրների ներկայացուցիչների մասնակցությամբ:
Համաձայնագրով նախատեսվում է ձևավորել տնտեսական, արդյունաբերական և գիտատեխնիկական հարցերով հայ-կորեական միջկառավարական հանձնաժողով, որի նիստերն անցկացվելու են ըստ անհրաժեշտության, բայց ոչ պակաս, քան երկու տարին մեկ, հաջորդաբար Հայաստանի Հանրապետությունում և Կորեայի Հանրապետությունում:
"Սույն Համաձայնագրի ստորագրումը կնպաստի երկու երկրների միջեւ փոխշահավետ համագործակցության զարգացմանը, առեւտրի ծավալների ավելացմանը, տնտեսական կապերի ընդլայնման համար բարենպաստ պայմանների ստեղծմանը, գործարար ակտիվության բարձրացմանը, երկու կողմերի առկա ներուժի օգտագործմանը", - ասված է փաստաթղթում:
