Երեթշաբթի, 5 Սեպտեմբերի 2023 20:04

Արմինֆո. Վերակառուցման և զարգացման եվրոպական բանկը (EBRD) և ԵՄ-ին առընթեր European Fund for Sustainable Development Plus-ը (EFSD+) ֆինանսական մատչելիության երաշխավորման ծրագրի շրջանակներում առաջին վարկն են ստորագրել  ԱԿԲԱ բանկի հետ:

Ինչպես ասվում է Վերակառուցման եւ զարգացման եվրոպական բանկի պաշտոնական հաղորդագրության մեջ, այդ համագործակցության շրջանակներում ՎԶԵԲ-ը կտրամադրի 15 մլն դոլարին համարժեք դրամի վարկ, որպեսզի օգնի ԱԿԲԱ բանկին ընդգրկել ավելի շատ ձեռնարկություններ, հատկապես՝ գյուղական վայրերում գտնվող: Ֆինանսավորումը կուղղվի նաև ազգային արժույթով երկարաժամկետ ֆինանսավորման աճող պահանջարկի բավարարմանը:

ԵՄ աջակցությամբ նախագիծը գործում է Կայուն զարգացման եվրոպական հիմնադրամի պլյուս (EFSD +) երաշխիքային ծրագրի շրջանակում: Այս նախաձեռնության շրջանակում ներդրվում է առաջին կորստի ռիսկերի ապահովագրության նորարարական համակարգ, որը ներկայումս հասանելի է Հարավային և Արևելյան Միջերկրական ծովի տարածաշրջանում և Արևելյան Եվրոպայի ու Կովկասի երկրներում: EFSD + ֆինանսական ծառայությունների հասանելիության ընդլայնման ծրագիրը նպատակ ունի ընդլայնել ՄՓՄՁ-ների կարողությունները, բարձրացնել դրանց մրցունակությունն ու աճը: Առաջարկելով արդյունավետ ֆինանսական գործիքներ և փորձ ՝ ծրագիրն ուղղված է զարգացման խթանմանը և աշխատատեղերի ստեղծմանը:

Վարկային համաձայնագրի պաշտոնական ստորագրումը տեղի է ունեցել Երևանում: Համաձայնագիրը ստորագրել են ԱԿԲԱ բանկի գլխավոր տնօրեն Հակոբ Անդրեասյանը եւ տարածաշրջանային այցով Երեւանում գտնվող ՎԶԵԲ-ի առաջին փոխնախագահ Յուրգեն Ռիգտերինկը (Jurgen Rigterink):

"Մենք ուրախ ենք մեր ֆինանսական և ինստիտուցիոնալ գործընկերների հետ միասին հզորացնել մեր աջակցությունը Հայաստանում մանր, փոքր և միջին ձեռնարկատիրությանը ։ Ուժեղ մասնավոր հատվածը ՎԶԵԲ-ի առաջնահերթություններից մեկն է երկրում, եւ ֆինանսավորումը կաջակցի ավելի շատ մասնավոր ձեռնարկությունների գյուղական վայրերում: Իսկ դրամով ֆինանսավորման տրամադրումը վարկառուներին կպաշտպանի արժութային ռիսկերից", - նշել է ՎԶԵԲ փոխնախագահը։

Եվրոպական հանձնաժողովի Արևելյան հարևանության և ինստիտուցիոնալ շինարարության գծով տնօրեն Լոուրենս Մերեդիթն, իր հերթին, ողջունել է ԵՄ-ի կողմից աջակցվող այս վարկային համաձայնագիրը, որը նոր հնարավորություններ կընձեռի ՄՓՄՁ-ների համար ողջ երկրում և, հատկապես, գյուղական վայրերում: "Կայուն, նորարարական և մրցունակ տնտեսությանն աջակցությունը Հայաստանում ԵՄ տնտեսական և ներդրումային ծրագրի առաջատար նախաձեռնությունների հնգյակում է։ Քանի որ մենք բավարարում ենք տեղական արժույթով ընդլայնված ֆինանսավորման հրատապ անհրաժեշտությունը, մենք ճանապարհ ենք հարթում դեպի ավելի կայուն և նորարարական ապագա Հայաստանի բիզնես էկոհամակարգի համար", - ասել է նա։

ԱԿԲԱ բանկի ղեկավար Հակոբ Անդրեասյանը նշել է, որ բանկը ՎԶԵԲ-ի հետ գործընկերության հարուստ պատմություն ունի՝ սկսած 2003 թվականից: "Մեր գործընկերությունը տարիների ընթացքում շարունակաբար ընդլայնվել է Հայաստանի տնտեսությանն աջակցելուն ուղղված տարբեր ծրագրերի շնորհիվ, հատկապես՝ տնտեսական ցնցումների կամ անկումների ժամանակ: ՎԶԵԲ - ը միշտ նորարար է եղել իր ծրագրերում։ Մենք ուրախ ենք կրկին միավորել մեր ջանքերը մեր գործընկերների՝ ՎԶԵԲ - ի եւ ԵՄ - ի հետ, որպեսզի շարունակենք աջակցել տեղական բիզնեսին ՝ իրացվելիության եւ երկարաժամկետ ներդրումների ներկայիս պահանջների տեսանկյունից, հատկապես՝ Հայաստանի գյուղական շրջաններում", - ասել է Անդրեասյանը։

Ինչպես նշված է ՎԶԵԲ-ի հաղորդագրության մեջ, այդ նախագիծը նաեւ նպաստում է Արեւելյան գործընկերության երկրներում ԵՄ տնտեսական եւ ներդրումային ծրագրի (EIP) իրականացմանը: Հայաստանի համար EIP-ի առանցքային առաջատար գերակայություններից է կայուն, նորարարական և մրցունակ տնտեսության խթանումը՝ երկրում մինչև 30 000 փոքր և միջին ձեռնարկություններին (ՓՄՁ) ուղղակի աջակցության միջոցով:

Նշենք, որ ԱԿԲԱ բանկը ՎԶԵԲ-ի վաղեմի գործընկերն է՝ 2003 թվականից, հանդիսանում է Հայաստանի առաջատար բանկերից մեկը, որն ամուր դիրքեր է զբաղեցնում գյուղատնտեսության և ՄՓՄՁ-ների վարկավորման ոլորտում, հատկապես՝ գյուղական վայրերում: Ունենալով 64 մասնաճյուղերից բաղկացած ցանց Հայաստանի բոլոր մարզերում՝ բանկը կարող է ընդգրկել բազմաթիվ հաճախորդների տարբեր հատվածներում:

ՎԶԵԲ-ը Հայաստանում առաջատար ինստիտուցիոնալ ներդրող է: Մինչ օրս բանկը մոտ 2 մլրդ եվրո է ներդրել երկրում՝ 206 նախագծերում, որտեղ աջակցում է մասնավոր հատվածի զարգացմանը եւ կայուն, կանաչ տնտեսության անցմանը:

ԱրմԻնֆո-ի պատրաստած Հայաստանի բանկերի  ֆինանսական վարկանիշի 30.06.2023 թ. տվյալներով, ԱԿԲԱ Բանկը հանդիսանում է ագրոհատվածի վարկավորման անփոփոխ առաջատարը ՝ 122 մլրդ դրամ (316 մլն դոլար)՝ դրանով իսկ ընդգրկելով շուկայի ընդհանուր ծավալի ավելի քան 44% - ը։ Բանկի վարկային պորտֆելում ագրովարկերին բաժին է ընկնում մոտ 26%: ԱԿԲԱ Բանկի առաջատար է նաև ՓՄՁ ոլորտի վարկավորման գծով' 225 մլրդ դրամ ($583 մլն)' ապահովելով ծավալի տարեկան 57,1% աճ: Բանկի վարկային պորտֆելում ՓՄՁ վարկերին բաժին է ընկնում ավելի քան 47%, իսկ շուկայի ընդհանուր ծավալում բանկի մասնաբաժինը հասնում է 20% - ի: Ընդհանուր վարկային ներդրումներով ԱԿԲԱ Բանկն ընդգրկվել է առաջատար հնգյակում՝ 476.2 մլրդ դրամ կամ 1.2 մլրդ դոլար ծավալով՝ ապահովելով այդ ցուցանիշի տարեկան 17% աճ: