Հարավկորեական SK Group խոշոր հոլդինգը հետաքրքրված է Հայաստանում գործունեությամբ

Արմինֆո.ՀՀ բարձր տեխնոլոգիական արդյունաբերության նախարարի առաջին տեղակալ Գևորգ Մանթաշյանը սեպտեմբերի 6-ին ընդունել է հարավկորեական «SK Group» հոլդինգի պատվիրակությանը՝ SK Telecom ընկերության փոխնախագահ Ում Յոնգվանի գլխավորությամբ:

Ողջունելով պատվիրակության այցը ԲՏԱ նախարարություն՝ Գևորգ Մանթաշյանը նշել է, որ բարձր է գնահատում հայ-կորեական բարեկամական կապերի զարգացումը, ընդգծել, որ համագործակցության համար նպաստավոր նախադրյալներ կան հատկապես տեղեկատվական տեխնոլոգիաների, արհեստական բանականության և թվայնացման ոլորտներում։

ԲՏԱՆ հաղորդագրության համաձայն, նախարարի առաջին տեղակալը հյուրերին է ներկայացրել բարձր տեխնոլոգիական ոլորտի ներկա վիճակը, առկա ներուժը, զարգացման միտումներն ու իրականացվող աշխատանքները: Գևորգ Մանթաշյանը ընդգծել է, որ Հայաստանում այժմ գործունեություն են ծավալում ՏՏ ոլորտի համաշխարհային մի շարք խոշոր ընկերություններ և համոզմունք հայտնել, որ «SK Group»-ը կարող է դառնալ դրանցից մեկը:

«SK Group»-ի պատվիրակությունը ևս հետաքրքրվածություն է ցուցաբերել Հայաստանում  գործունեություն ծավալելու հարցում, և այդ համատեքստում, ներկայացրել է հոլդինգի նպատակները, իրականացվող ծրագրերը:

Ոլորտում իրականացվող աշխատանքներին, տեղական կազմակերպությունների գործունեությանն առավել հանգամանալից ծանոթանալու նպատակով՝ պատվիրակության անդամները նախարարությունում տեղի ունեցած հանդիպումից հետո այցելել են «Ինժեներական քաղաք», ԵՊՀ-ում գործող «ISTC» կենտրոն, «Թումո» ստեղծարար տեխնոլոգիաների կենտրոն, «Picsart» ընկերության գրասենյակ:

Նշենք, որ ավելի քան 60 տարի առաջ հիմնադրված «SK Group» հոլդինգը կազմված է 186 դուստր ձեռնարկություններից և մասնաճյուղերից, որոնք գործում են էներգետիկայի, հեռահաղորդակցության և կիսահաղորդչային արդյունաբերության ոլորտներում:

Հիշեցնենք, որ ս. թ. օգոստոսի վերջին հայտնի դարձավ, որ Հայաստանի և Հարավային Կորեայի կառավարությունները նախատեսում են ստորագրել տնտեսական, արդյունաբերական և գիտատեխնիկական համագործակցության շուրջ համաձայնագիր: "Համաձայնագիրը հարթակ կծառայի երկու պետությունների միջև տնտեսական, արդյունաբերական, զբոսաշրջային, գյուղատնտեսական և գիտատեխնիկական համագործակցության ամրապնդման և ընդլայնման, առևտրաշրջանառության ակտիվացման և փոխգործակցության խթանման համար", - ասվում էր կառավարության հաղորդագրության մեջ:

Հրակ է նաև նշել, որ սեպտեմբերի 14-ին Երևանում տեղի կունենա հայ-կորեական տնտեսական համագործակցության համաժողով ՝ Հայաստանի և Կորեայի միջև տնտեսական համագործակցության խթանման ու ընդլայնման նպատակով:

Ըստ ՀՀ վիճակագրական կոմիտեի տվյալների ՝ Հայաստանի Հանրապետության և Կորեայի Հանրապետության միջև առևտրաշրջանառությունը 2023 թվականի հունվար-հուլիս ամիսներին աճել է 2.8 անգամ ՝ կազմելով 111.1 մլն դոլար ։ Ընդ որում, արտահանումը 164.7 հազար դոլարից աճել է մինչև 16.7 մլն դոլար, իսկ ներմուծումը՝ 2.4 անգամ ՝ մինչև 94.4 մլն դոլար։