Արմինֆո. Բելգիա-Հայաստան առևտրի պալատի աջակցությամբ Վալոնիայի արտահանման և ներդրումային գործակալության (AWEX) հրավերով հոկտեմբերի 18-ին և 19-ին բելգիական ընկերությունների պատվիրակությունը կժամանի Երևան: AWEX-ը հանդես է գալիս որպես միջոցառման գլխավոր հովանավոր։ Գործակալության նախաձեռնությամբ հոկտեմբերի 19-ին կկայանա պաշտոնական ընդունելություն, ինչպես նաև բելգիական ընկերությունների ներկայացուցիչների անհատական հանդիպումներ:
Հայաստանը Բելգիայի 121-րդ ներմուծող երկիրն է (86 մլն եվրո արժողությամբ բելգիական ապրանք է արտահանվել Հայաստան) և 94-րդ մատակարարը (2022 թվականին Բելգիա է արտահանվել 136,2 մլն եվրոյի հայկական ապրանք): 2020 թվականից ի վեր Բելգիայի և Հայաստանի միջև առևտուրը գրեթե եռապատկվել է և ակնկալվում է, որ 2023 թվականին կգերազանցի 300 մլն եվրոն։ Վերջին մի քանի տարիների ընթացքում առևտրային հաշվեկշիռը Հայաստանի օգտին էր։ Առևտրում գերակշռում են թանկարժեք քարերն ու մետաղները, քիմիական նյութերն ու դեղագործական ապրանքները։ Այս առաքելության համար գրանցվել են հինգ բելգիական ընկերություններ. Buzon: Շինանյութերի արտադրություն; Lotronic : լուսաձայնային սարքավորումներ; Medaro (www.medaro.be): անուշաբույր և բուժիչ խոտաբույսեր; JGI Hydrometal : գունավոր մետաղների թափոնների վերամշակում; Citadel Real Estate: անշարժ գույքի զարգացում:
Հիշեցնենք, որ վերջերս Հայաստանի Հանրապետության նախագահ Վահագն Խաչատուրյանին հավատարմագրերն է հանձնել Հայաստանի Հանրապետությունում Բելգիայի Թագավորության առաջին ռեզիդենտ դեսպան նշանակված Էրիկ դե Մունկը:
ՀՀ վիճակագրական կոմիտեի տվյալներով՝ Հայաստանի և Բելգիայի միջև արտաքին առևտրաշրջանառությունը 2023 թվականի հունվար-օգոստոսին աճել է 5,6%-ով՝ կազմելով 96 մլն դոլար։ Միաժամանակ արտահանումն աճել է 7,3%-ով և կազմել 57 մլն դոլար, իսկ ներմուծումն աճել է 3,1%-ով և կազմել 39 մլն դոլար։
