Արմինֆո.Հոկտեմբերի 20-ին ավարտվեց Կորպորատիվ Կառավարման Կենտրոնի նոր նախաձեռնությունը` երիտասարդ գործարարների համար նախատեսված առաջին ESG դպրոցը Հայաստանում:
Կենտրոնի տնօրեն Նարինե Մելիքյանի խոսքերով` Դպրոցի գաղափարը ծագել է՝ ժամանակակից գործարար աշխարհում ընկերությունների դերի վերաիմաստավորմամբ պայմանավորված: Ընկերությունները դադարում են լինել միայն տնտեսական սուբյեկտ: Կարևորվում է դրանց սոցիալական ու բնապահպանական ազդեցությունը և այն, թե ինչպես են դրանք փող վաստակում: Այս տեսանկյունից ընկերությունների շահերից է բխում որքան հնարավոր է շուտ համարժեք ուշադրություն դարձնել բնապահպանական, սոցիալական և լավ կառավարման (ESG) գործոններին, օրինակ` կլիմայի փոփոխությունների, ռեսուրսարդյունավետության, թափոնների կառավարմանը, աշխատանքային հարաբերություններում բազմազանության և ներառականության սկզբունքների ներդրմանը, մարդու հիմնարար իրավունքները հարգելուն, կորպորատիվ կառավարման և կորպորատիվ վարվելակերպի հիմնահարցերին: Այս հարցերը ներառելով բիզնես օրակարգ` ընկերությունները կերտում են իրենց երկարաժամկետ հաջողությունը: Սա չի վերաբերում միայն խոշոր ընկերություններին: Այն հրատապ է նաև փոքր ու միջին ձեռնարկությունների համար: Եթե խոշորների համար շեշտադրվում է ներդրողների համար գրավչության ձեռքբերումը, ՓՄՁ-ների դեպքում` դրանց կայացումը և աճի լրացուցիչ հնարավորությունները:
Կենտրոնի տնօրենը մանրամասնեց, որ ESG դպրոցը դիտարկվել է որպես կրթական հարթակ, որի առաքելությունն է նախապատրաստել նոր սերնդի գործարար առաջնորդներ, որոնք ունակ կլինեն ստանձնել Հայաստանի գործարար հատվածում տեղ գտած կարծրատիպերը հաղթահարելու պատասխանատվությունը և դառնալ դրական փոփոխություններն ուղղորդող ուժ: Ըստ նրա` սա հավակնոտ, սակայն իրագործելի առաքելություն է: Այս տեսանկյունից ամենևին էլ պատահական չէ երիտասարդ գործարարների կամ գործարար գաղափար ունեցող երիտասարդների թիրախավորումը, քանի որ նրանք բավականաչափ զգայուն են կայուն զարգացման հիմնախնդիրների նկատմամբ, ազատ են կարծրատիպերից, ճկուն են փոփոխությունների նկատմամբ, ունեն ստեղծագործական մտածելակերպ: Այս հատկանիշները հնարավորություն են տալիս մտածել, որ երիտասարդ գործարարներն ունակ են ստանձնել նոր գործարար մշակույթը կերտողի և տարածողի դժվարին դերը:
Նարինե Մելիքյանն ավելացրեց, որ ESG դպրոցը Կենտրոնի միանգամյա նախաձեռնությունը չէ: Այն կրկնվելու է կանոնավոր հիմունքներով: Բացի այդ, Դպրոցի շրջանավարտներն իրենց գիտելիքներն ու կարողությունները շարունակաբար զարգացնելու համար հնարավորություն կունենան մասնակցել Կենտրոնի այլ նախաձեռնություններին ու միջոցառումներին, իսկ լավագույնները կհրավիրվեն Կենտրոնի կողմից առաջնորդվող Բիզնեսի բարեվարքության ակումբ: Կենտրոնի տնօրենի կարծիքով` ESG դպրոցի շրջանավարտները կարող են նոր շունչ և ոգի հաղորդել Ակումբի գործունեությանը և միաժամանակ դասեր քաղել Ակումբի փորձառու մասնակիցների գործարար պրակտիկայից:
Անդրադառնելով ESG դպրոցի բովանդակությանը` Կենտրոնի տնօրենը նշեց, որ այն կազմակերպվել է կենսակայունության, ESG հիմնախնդիրների, լավ կառավարման տարբեր ասպեկտների վերաբերյալ մասնակիցների տեսական և գործնական գիտելիքներն ու կարողությունները զարգացնելու տրամաբանությամբ: Դպրոցում դասավանդել են ինչպես տեղական, այնպես էլ արտասահմանյան փորձառու մասնագետներ: ESG առաջին դպրոցն ավարտել է 22 անձ, որոնցից 5-ին տրվել է Ակումբին արտոնյալ` առանց մեկ տարվա վճարի, մասնակցության հնարավորություն:
Նարինե Մելիքյանը հույս հայտնեց, որ Դպրոցի շրջանավարտները կսկսեն իրենց ESG ճամփորդությունը, իսկ Կորպորատիվ Կառավարման Կենտրոնն ու Բիզնեսի բարեվարքության ակումբն նրանց կաջակցեն այդ հարցում:
Սարգիս Խաչատրյան. Մեր գործունեությունն ուղղված է լինելու հաճախորդների փորձառության բարելավմանը
Բիզնեսի թվայնացման հիմնախնդիրը, ո՞ր հանգրվանում է Հայաստանը
Գևորգ Մանթաշյան. Բարձր տեխնոլոգիական արդյունաբերության նախարարությունը հետևողական աշխատանք է տանում Հայաստանում ստարտափների կայացման ուղղությամբ
Bank of Georgia-ն հայտարարել է 303.6 մլն դոլարով "Ամերիաբանկի" ձեռք բերման շուրջ նախնական համաձայնության մասին