ՀՀ ԿԲ. Արտաքին հատվածից Հայաստանի տնտեսության վրա թույլ գնանկումային ազդեցությունը կպահպանվի

Արմինֆո.Արտաքին հատվածից թույլ գնանկումային ազդեցությունը Հայաստանի տնտեսության վրա կպահպանվի։ Նման կանխատեսում է ներկայացրել ՀՀ Կենտրոնական բանկի նախագահ Մարտին Գալստյանը՝ հոկտեմբերի 31-ին վերաֆինանսավորման տոկոսադրույքը 9.75% - ից մինչեւ 9.5% նվազեցման առնչությամբ հրավիրված մամուլի ասուլիսի ժամանակ:

"Վերջին ամիսներին Հայաստանի հիմնական գործընկեր երկրներում նկատվում է ներքին պահանջարկի որոշակի արագացում։ Միևնույն ժամանակ, աշխարհաքաղաքական իրադարձությունների պատճառով մեծացել է համաշխարհային տնտեսության աճի անորոշությունը, և ուժեղացել է անկայունությունը միջազգային ապրանքահումքային շուկաներում ։ Գործընկեր երկրներում տարեկան գնաճը շարունակում է գերազանցել նպատակային մակարդակը ։ Այս պայմաններում այդ երկրների կենտրոնական բանկերը մոտ ապագայում կշարունակեն զսպող դրամավարկային քաղաքականություն վարել", - պարզաբանել է ԿԲ ղեկավարը։

Ընդ որում, նա նշել է, որ Հայաստանում պաշտոնական տարեկան գնաճը ս.թ. սեպտեմբերին նվազել է մինչեւ 0,1 տոկոս (մեկ տարի առաջվա 9,9 տոկոսից), իսկ բազային ցուցանիշը գնանկումային է եղել 0,1 տոկոսի մակարդակում (մեկ տարի առաջվա 10,5 տոկոսի դիմաց):

Վերջին ամիսներին Հայաստանում նկատվում է սպասվածից ավելի բարձր տնտեսական ակտիվություն, որը շարունակում է պահպանվել շինարարության և ծառայությունների ոլորտում աճի բարձր տեմպերով: Զուգահեռաբար տնտեսության մեջ շարունակում է ընդլայնվել ներքին պահանջարկը ։ Արտաքին հատվածից թույլ գնանկումային ազդեցության և իրականացվող զսպող դրամավարկային քաղաքականության պայմաններում պահպանվում է ցածր գնաճային միջավայր, ինչն արտացոլվում է աշխատաշուկայում աշխատավարձերի աճի դանդաղումով:

Ստեղծված իրավիճակում ԿԲ խորհուրդը նպատակահարմար է գտել հերթական անգամ իջեցնել վերաֆինանսավորման տոկոսադրույքը՝ այս անգամ 0.25 տոկոսային կետով: ԿԲ խորհուրդն այսուհետ ևս հետևողականորեն կձեռնարկի անհրաժեշտ քայլեր՝ պահանջարկի ճշգրտման ապահովման և գնաճային սպասումների կայունացման ուղղությամբ: Դրամավարկային քաղաքականության շարադրված սցենարում տարեկան գնաճը մոտ ապագայում կպահպանվի նպատակային շեմից ցածր մակարդակում, բայց հետո միջնաժամկետ հեռանկարում աստիճանաբար կբարձրանա և կկայունանա թիրախավորվող 4 տոկոսին մոտ:

ԿԲ խորհրդի գնահատմամբ, նախատեսված հետագծից գնաճի շեղման ռիսկերը, հիմնականում, հավասարակշռված են, սակայն ցանկացած ուղղվածության ռիսկերի ի հայտ գալու դեպքում ԿԲ-ը պատշաճ կերպով կարձագանքի՝ գների կայունությունն ապահովելու նպատակով: