Չորեքշաբթի, 22 Նոյեմբերի 2023 18:05

Արմինֆո.Այսօր հայ-իրաքյան հարաբերություններում առանձնահատուկ դինամիկա է նկատվում: Երկկողմ օրակարգը բավականին ընդգրկուն է և ներառում է համագործակցության բազմաթիվ ոլորտներ՝ առևտրային և տնտեսական հարաբերություններից մինչև կրթամշակութային, հումանիտար, տեղեկատվական տեխնոլոգիաների ոլորտներ: Այդ մասին հայտարարել է  Հայաստանի նախագահ Վահագն Խաչատուրյանը՝ Իրաքի Հանրապետության նախագահ Աբդ Ալ Լատիֆ Ջամալ Ռաշիդի հետ համատեղ ճեպազրույցում:

 

ՀՀ նախագահի աշխատակազմի հաղորդագրության համաձայն,  Վահագն Խաչատուրյանը, մասնավորապես, նշել է, որ մեծ պատիվ է այսօր Երևանում հյուրընկալել Իրաքի նախագահի գլխավորած պատվիրակությանը: «Ձեր այցը հիրավի պատմական է, քանզի դիվանագիտական հարաբերությունների հաստատումից ի վեր Դուք Իրաքի առաջին նախագահն եք, ով պաշտոնական այց է կատարում Հայաստան: Վստահ եմ, որ Ձեր այցը նոր էջ կբացի հայ-իրաքյան հարաբերություններում, ինչպես նաև խորացման ու ընդլայնման հզոր լիցք կհաղորդի բարեկամ պետությունների միջև բազմոլորտ համագործակցությանը», - նշել է Հայաստանի նախագահը:

Նա գոհունակությամբ  արձանագրել է, որ Հայաստանի անկախությունից ի վեր արաբական երկրների հետ հարաբերությունները զարգանում են փոխվստահության և ջերմ բարեկամության մթնոլորտում։ «Մեր երկրների միջև հարաբերությունների դինամիկ զարգացման համար հաստատուն հիմք են հանդիսանում ինչպես հայ-արաբական պատմամշակութային առնչությունների հարուստ անցյալն, այնպես էլ Իրաքում դարերի պատմություն ունեցող հայ համայնքի առկայությունը։ Հայ ժողովուրդը երախտապարտ է Իրաքի բարեկամ ժողովրդին, հատկապես՝ Հայոց ցեղասպանությունից փրկված հայ գաղթականներին հյուրընկալելու, ապաստան տրամադրելու համար: Ցանկանում եմ անկեղծ երախտագիտությունս հայտնել բարեկամ Իրաքի իշխանություններին՝ իրաքահայերի նկատմամբ հոգատար վերաբերմունք ցուցաբերելու և կյանքի ու բնականոն կենսագործունեության համար բոլոր պայմաններն ապահովելու համար:

Իրաքը հանդիսանում է մերձավորարևելյան տարածաշրջանում Հայաստանի կարևոր և վստահելի գործընկերը: Հայաստանը մեծապես հետաքրքրված է Իրաքի հետ երկկողմ օրակարգի զարգացմամբ, մասնավորապես՝ առևտրատնտեսական ոլորտում:

Արդյունավետ եմ գնահատում պարոն նախագահի հետ ունեցած բանակցությունները, որոնց ընթացքում մտքեր փոխանակեցինք երկկողմ հետաքրքրություն ներկայացնող մի շարք հարցերի շուրջ։ Իմ հարգարժան գործընկերոջ հետ փոխըմբռնման մթնոլորտում հանգամանալից քննարկեցինք հայ-իրաքյան հարաբերությունների ընթացիկ վիճակն ու հեռանկարները:

Գոհունակությամբ ընդգծեցինք վերջին տարիներին Իրաքի հետ ապրանքաշրջանառության ծավալների նկատելի աճը: Միևնույն ժամանակ վստահություն հայտնեցինք, որ այս ցուցանիշները կարող են էլ ավելի աճել: Բարձր գնահատեցինք Բաղդադում ս.թ. սեպտեմբերի 12-ից 13-ը կայացած տնտեսական համագործակցության հարցերով հայ-իրաքյան միջկառավարական համատեղ հանձնաժողովի հերթական նիստի անցկացումը. երկուստեք կարևորվեց նիստի արդյունքում ձեռքբերված պայմանավորվածությունների շուտափույթ կյանքի կոչումը:

Հանդիպմանը հանգամանալից անդրադարձ կատարվեց գյուղատնտեսության, վերականգնվող էներգիայի արտադրության, ենթակառուցվածքների զարգացման և վերականգնման, սննդի և թեթև արդյունաբերության, կրթության, գիտության, մշակույթի բնագավառներին՝ որպես առավել հեռանկարային ուղղություններ:

Առանձնահատուկ ընդգծվեց բարձր տեխնոլոգիաների և թվայնացման ոլորտում երկկողմ շահավետ համագործակցության զգալի ներուժը: Այս առնչությամբ նշեցի, որ Հայաստանը պատրաստ է իրաքյան կողմին փոխանցել այս ոլորտում տարիների ընթացքում կուտակված իր հաջող փորձը:

Վերահաստատեցինք միջպետական հարաբերությունները խորացնելու երկու կողմերի պատրաստակամությունը:

Երկկողմ օրակարգից զատ քննարկեցինք տարածաշրջանային և միջազգային խնդիրների շուրջ փոխգործակցության՝ փոխադարձ հետաքրքրություն ներկայացնող արդիական հարցեր: Շեշտեցինք տարածաշրջանային անվտանգային մթնոլորտի շուրջ երկխոսության, միջազգային ասպարեզում տեղի ունեցող գործընթացների և դրանից բխող մարտահրավերների պայմաններում երկու երկրների ջանքերի համադրման անհրաժեշտությունը:

Իմ հարգարժան գործընկերոջը ներկայացրեցի Հայաստանի կողմից առաջ քաշված «Խաղաղության խաչմերուկ» հայեցակարգը, որը միտված է Հայաստանը դարձնել Հյուսիսից Հարավ և Արևմուտքից Արևելք ձգվող առկա և ապագա կապուղիների տարանցման կենտրոն, որը ենթադրում է մեր բոլոր հարևանների հետ բնականոն կապի վերականգնումը: Հայեցակարգի իրացումը հնարավորություն կտա տարանցում ապահովել նաև մի կողմից՝ Միջին Արևելքի և Ասիայի, մյուս կողմից՝ Եվրոպական ու Եվրասիական շուկաների միջև: Հայաստանը շահագրգռված է տարածաշրջանային տնտեսական և տրանսպորտային կապերի ապաշրջափակմամբ՝ հարգելով պետական ինքնիշխանությունը, իրավասությունը և իրավահավասարության ու փոխադարձության սկզբունքները և պատրաստ է դա իրականացնել որքան հնարավոր է շուտ, ինչն, իր հերթին, կապահովի տարածաշրջանում անվտանգությունն ու կայունությունը։

Կարևորվեց նաև միջազգային ահաբեկչության բոլոր դրսևորումների դեմ պայքարի շրջանակներում համագործակցության ամրապնդումն, ինչպես նաև անօրինական միգրացիայի հակազդեցության ուղղությամբ համատեղ ջանքերի գործադրումը:

Հանդիպման ավարտին հարգարժան գործընկերոջս հետ ընդունեցինք համատեղ հայտարարություն, որն արտացոլում է երկկողմ հարաբերությունների առանցքային գրեթե բոլոր ուղղություններով համագործակցություն ծավալելու երկուստեք առկա ցանկությունը», - ամփոփել է ՀՀ նախագահը: