Լեռնային Ղարաբաղից բռնի տեղահանված անձանց համար 100 հազար դրամ միանվագ օգնության ծրագիրն ավարտվել է

Արմինֆո. Լեռնային Ղարաբաղից բռնի տեղահանված անձանց  անհետաձգելի կարիքների համար 100 հազար դրամ միանվագ օգնության ծրագիրը փակվել է. գումարը վճարվել է 108 հազար 360 քաղաքացու: Այդ մասին նոյեմբերի 23-ին կառավարության նիստի ժամանակ հաղորդել է աշխատանքի եւ սոցիալական հարցերի նախարար Նարեկ Մկրտչյանը:

Նա տեղեկացրել է, որ կառավարության այսօրվա որոշմամբ 2 մլրդ դրամ կհատկացվի Լեռնային Ղարաբաղից բռնի տեղահանվածներին 50 հազար դրամի չափով ֆինանսական աջակցություն հատկացնելու համար ՝ նոյեմբեր եւ դեկտեմբեր ամիսներին առաջնային սպառողական ծախսերը հոգալու համար: Այսօրվա դրությամբ ծրագրի շահառու է համարվում 40 հազար մարդ։

Ծրագիրը կառավարության հավանությանն է արժանացել նոյեմբերի 9-ին և ենթադրում է լրացուցիչ օգնություն տրամադրել "100 հազար դրամ" ծրագրի շահառուներին՝ որոշ բացառություններով: Շահառու չեն հանդիսանում հյուրանոցներում կամ հյուրատներում ժամանակավորապես բնակվող անձինք, Հայաստանի հանրապետությունում չգտնվող և բանկային հաշիվներում 2 մլն դրամից ավելի դրամական միջոցներ ունեցող աանձինք: Դիմելու էլեկտրոնային հարթակը գործարկվել է նոյեմբերի 17-ին։ Ծրագրից օգտվելու համար դիմողը պետք է գրավոր համաձայնություն տա իր հաշիվները ստուգելու համար, որպեսզի Կենտրոնական բանկը հավաստիանա, որ օգնություն ստանում են նրանք, ում հաշվին կա 2 մլն դրամից պակաս գումար: Ֆինանսական աջակցություն ստանալու համար էլեկտրոնային դիմումները հնարավոր կլինի ուղղել գործարկված հարթակի միջոցով, իսկ միջոցները կտրամադրվեն անկանխիկ։ Այդ նպատակով պահուստային ֆոնդից կհատկացվի շուրջ 10 մլրդ դրամ։

Հոկտեմբեր ամսվա բնակարանային ծախսերի ֆինանսական աջակցության ծրագրի շրջանակներում 50 հազար դրամի չափով գումար է վճարվել 99 820 արցախցու: Հոկտեմբերյան վճարումների համար հատկացվել է 4,95 մլրդ դրամ, նոյեմբերին ծրագրի շահառուների թիվը կկրճատվի մինչեւ 20 հազար, պարզաբանել է Մկրտչյանը։ Այսօրվա որոշմամբ իշխանությունները 1 մլրդ դրամ կուղղեն վճարումների իրականացմանը։

Ծրագիրը գործում է 2023 թվականի հոկտեմբերից մինչև 2024 թվականի մարտը՝ ներառյալ, և ընդգրկում է բոլոր տեղահանված քաղաքացիներին՝ անկախ տարիքից, բացառությամբ հատուկ կենտրոններում գտնվողների և նրանց, ովքեր չեն գտնվում Հայաստանի տարածքում: Ընդ որում, Հայաստանում անշարժ գույքի սեփականատերերը 10 հազար դրամ կստանան կոմունալ ծառայությունների վճարման համար։ Ծրագրի ընդհանուր ծախսերը կկազմեն 30 մլրդ դրամ։

Փոխվարչապետ Տիգրան Խաչատրյանն, իր հերթին, նշել է, որ ս. թ. նոյեմբերից միջազգային գործընկերները, որոնք աջակցություն են ցուցաբերում բռնի տեղահանվածների հումանիտար հարցերի լուծմանը՝ ոչ թե բյուջեի ֆինանսական աջակցության միջոցով, այլ՝ ուղղակիորեն, նրանք իրենց կազմակերպությունների հաշիվներից գումար կվճարեն քաղաքացիների որոշակի խմբի: