«Ռոսսելխոզնադզոր»-ը հայտարարում է Հայաստանի սննդամթերքի անվտանգության տեսչական մարմնի կողմից վերահսկողության նվազեցման մասին

Արմինֆո.«Ռոսսելխոզնադզոր»-ն իր մտահոգությունն է հայտնում Հայաստանից բուսական արտադրանքի մատակարարման ժամանակ հաճախակի դարձած խախտումների կապակցությամբ:

Մասնավորապես, ինչպես ասվում է գերատեսչության կայքում, 2023 թվականին «Ռոսսելխոզնադզոր»-ի տարածքային վարչությունները հայտնաբերել են Հայաստանի Հանրապետությունից ստացված ծաղկի և պտուղ-բանջարեղենի արտադրանքներում կարանտինային վնասակար օրգանիզմների հայտնաբերման 72 դեպք։ Ընդ որում, նոյեմբերին արձանագրվել է խախտումների կտրուկ աճ. միայն նոյեմբերի 24-26-ն ընկած ժամանակահատվածում հայտնաբերվել է վարակված ծաղիկների, վարունգի, չրերի, խաղողի, ծաղկակաղամբի, լոլիկի, պղպեղի, սմբուկի, խնձորի, տանձի ներկրման 36 փաստ, որոնք ստացվել են ՀՀ Սննդամթերքի անվտանգության տեսչական մարմնի կողմից տրված բուսասանիտարական հավաստագրերի ուղեկցությամբ:

Բուսական արտադրանքներում հայտնաբերվել են ԵԱՏՄ անդամ երկրների համար կարանտինային օբյեկտներ: Բացի այդ, նոյեմբերին հայտնաբերվել է Հայաստանից ստացված լոլիկի, ելակի, խնձորի և խաղողի մեջ պեստիցիդների մնացորդային պարունակության առավելագույն թույլատրելի մակարդակը գերազանցելու 5 դեպք, ինչը կարող է վկայել արտադրողների կողմից պեստիցիդների կիրառման կանոնակարգերի խախտման մասին: <Նշվածը վկայում է ՀՀ Սննդամթերքի անվտանգության տեսչական մարմնի կողմից վերահսկողության նվազման մասին և սպառնալիք է ստեղծում Ռուսաստանի բուսասանիտարական բարեկեցության համար: "Ռոսսելխոզնադզոր"-ը բոլոր խախտումների մասին տեղեկացրել է Հայաստանի իրավասու գերատեսչությանը, սակայն իրականացված հետաքննությունների մասին տեղեկատվություն ծառայության հասցեին մինչ օրս չի ստացվել", - ասված է հաղորդագրության մեջ:

Հաշվի առնելով այս իրավիճակը՝ "Ռոսսելխոզնադզոր"-ը պաշտոնական նամակ է ուղարկել Հայաստան ՝ խնդրելով անհապաղ սպառիչ միջոցներ ձեռնարկել Ռուսաստան վարակված արտադրանքի ուղարկումը կանխելու համար և ռուսական գերատեսչությանը տեղեկացնել այդ մասով իրականացված աշխատանքների մասին:

Դրա հետ մեկտեղ բուսասանիտարական հսկողությունը սահմանին իրականացվում է բնականոն ռեժիմով, Հայաստանից մեկնող բեռների զննման եւ ձեւակերպման կանոնները չեն փոխվել ։

Հիշեցնենք, որ վերջին օրերին հայ փոխադրողները, բացի եղանակային պայմաններից, վրաց-ռուսական սահմանին բախվել են Երեւանի եւ Մոսկվայի միջեւ հարաբերությունների սառեցման արձագանքներին: Գյուղմթերք, ծաղիկներ և տարբեր տեսակի սննդամթերք փոխադրող բեռնատարները մի քանի օր կանգնած են  ռուս-վրացական սահմանին։ Մասնավորապես, չնայած այն հանգամանքին, որ հայկական կողմին՝ ի դեմս առևտրային կցորդին, հավաստիացրել են, որ ուժեղացված լաբորատոր հսկողության են ենթակա ՌԴ բոլոր ներկրողները՝ հայտնաբերված բուսասանիտարական նորմերի խախտումների պատճառով, հայ արտահանողները նշել են "հատուկ վերաբերմունք" իրենց նկատմամբ. մոտ 20 բեռնատար արդեն վերադարձվել է Հայաստան, ևս 15 բեռնատարի վերաբերյալ բացասական որոշում է կայացվել, ևս 5-ը սպասում են փորձաքննության արդյունքներին: