Արմինֆո. Հայաստանում Ֆրանսիայի դեսպան Օլիվիե Դըկոտինյին այցելել է Վեդիի ջրամբարի կառուցման վայր, որտեղ ծանոթացել է կատարված աշխատանքներին: Այդ մասին ասվում է Հայաստանում Ֆրանսիայի դեսպանատան հաղորդագրությունում:
«Զարգացման ֆրանսիական գործակալության (ԶՖԳ) տրամադրած վարկով ֆինանսավորված ծրագիրը հնարավորություն է ընձեռում ոռոգել 3000 հա տարածք, խնայել ջուր և էլեկտրաէներգիա, ամրապնդել գյուղատնտեսական արտադրությունը Հայաստանի ամենաբերրի հարթավայրում։ Դեսպան Օլիվիե Դըկոտինյին ԶՖԳ-ի հետ միասին տեղում քննարկել են Վեդիի ջրամբարի շինարարության ընթացքը», - ասվում է հաղորդագրությունում։
Նշենք, որ ջրամբարը նախատեսվում է շահագործման հանձնել մինչև տարեվերջ: 2016 թվականի հունվարի 26 - ին Վեդիի ջրամբարի կառուցման ֆինանսավորման նպատակով Զարգացման ֆրանսիական գործակալությունը Հայաստանի Հանրապետությանը հատկացրել է 75 մլն եվրո վարկ (ՀՀ կառավարության համաֆինանսավորումը կազմել է 15 մլն եվրո), որի շրջանակներում նախատեսվում է կառուցել 29,4 մլն խմ ծավալով և 120 հա ջրային մակերեսով ջրամբար: Ջրի աղբյուր կդառնան Արարատի մարզի Վեդի և Խոսրով գետերը: Ծրագրի ամբողջական իրականացումը հնարավորություն կտա մեղմել Արարատյան դաշտի ջրի դեֆիցիտը, ինչպես նաև մեխանիկական ոռոգումից անցնել ինքնահոս ոռոգման համակարգի, ինչն էլ, իր հերթին, կհանգեցնի էլեկտրաէներգիայի խնայողության: Ծրագրի իրականացման արդյունքում Սևանա լճից ջրառը կկրճատվի 19 մլն խմ - ով, իսկ ոռոգելի հողատարածքների մակերեսը կավելանա մոտ 300 հա-ով: Ջրամբարը շահագործման հանձնելուց հետո կանջատվեն 11 պոմպակայաններ, ևս 3-ը ՝ մասնակի, տարեկան կտրվածքով տնտեսումը կկազմի մոտ 1 մլրդ դրամ կամ 19 մլն կվտ/ժամ էլեկտրաէներգիա: Ներցանցային տնտեսությունների կորուստները կկրճատվեն 20-25 տոկոսով։ Ծրագիրն ի սկզբանե նախատեսվում էր ավարտել չորս տարվա ընթացքում:
Ջրամբարի կառուցումը Հայաստանի համար ռազմավարական կարևոր նշանակություն ունի։ Թուրքիան ավելի վաղ հայտարարել էր Արաքսի վրա խոշոր ջրամբարներ կառուցելու իր ծրագրերի մասին, ինչը հայկական կողմի համար ռիսկեր է պարունակում՝ ոռոգման ջրի դեֆիցիտի տեսքով: Հայաստանը չի կարող լիովին չեզոքացնել նման ռիսկերը, սակայն Վեդիի ջրամբարը թույլ կտա մեղմել թուրքական ջրային էքսպանսիայի հետեւանքները
Շաքարի ներմուծումը Հայաստան 2025թ. առաջին կիսամյակում կրճատվել է 66%-ով
ATI.SU․ Հայաստանում միջազգային բեռնափոխադրումների պահանջարկը 30%- ով աճել է
ՔՊ-ը Կենտրոնական բանկի խորհրդի անդամի պաշտոնի համար առաջադրել է Արմեն Քթոյանի թեկնածությունը
Հայաստանն ու Ֆրանսիան դիտարկում են տեխնոլոգիական ոլորտում համագործակցության ընդլայնման հեռանկարները