Արմինֆո. Fly Arna ազգային ավիափոխադրողը լրացուցիչ ֆինանսավորման կարիք ունի: Այդ մասին դեկտեմբերի 1-ին ճեպազրույցում հայտարարել է ՀՀ էկոնոմիկայի նախարար Վահան Քերոբյանը՝ պատասխանելով Հայաստանում ավիաընկերության կողմից չվերթների հնարավոր դադարեցման մասին հարցին։
"Ես նման տեղեկություն չունեմ։ Ես գիտեմ, որ ընկերությունը լրացուցիչ ֆինանսավորման կարիք ունի, և այդ հարցն այժմ քննարկվում է։ Կարծում եմ՝ կգտնվեն համապատասխան լուծումներ։ Մենք աշխատում ենք ընկերության հետ", - նշել է նախարարը։ Ընդ որում, նա չի հստակեցրել, թե ինչ լուծումների մասին է խոսքը։
Հիշեցնենք, որ ընթացիկ տարվա դեկտեմբերին ավիափոխադրումների հայկական շուկայից հեռանալու եւ Fly Arna համատեղ ավիաձեռնարկության կանոնադրական կապիտալից դուրս գալու "Air Arabia"–ի մտադրությունների վերաբերյալ շրջանառվող լուրերի մասին ԱրմԻնֆո-ի հարցմանն ի պատասխան՝ ՀՀ տարածքային կառավարման և ենթակառուցվածքների նախարարության Քաղաքացիական ավիացիայի կոմիտեն նշել էր, որ հայկական շուկայից "Air Arabia"-ի հնարավոր հեռանալու մասին տվյալների չի տիրապետում: Ինչպես ԱրմԻնֆո-ին հաղորդել են արաբական ավիաընկերությանը մոտ աղբյուրները, նման մտադրության պատճառը հայկական կողմից մի շարք պայմանավորվածություններ չկատարելն է:
Հիշեցնենք, որ 2021 թվականի դեկտեմբերի 10-ին "Հայկական ազգային ավիաուղիներ" ՓԲԸ-ն ստացել է պետական գրանցում եւ սկսել է գործել Հայաստանում Fly Arna - ARmenian National Airlines
առեւտրային ապրանքանիշի ներքո: Նոր ավիաընկերության ստեղծման նախագծի մասին հայտնի դարձավ 2020 թվականի հուլիսին, երբ Հայաստանի պետական հետաքրքրությունների հիմնադրամի (ԱՆԻՖ) գործադիր տնօրեն Դավիթ Փափազյանը և Շարժայում տեղակայված արաբական բյուջետային "Air Arabia" ավիաընկերության գլխավոր գործադիր տնօրեն Ալի ալ Ալին համաձայնագիր ստորագրեցին։ Ի սկզբանե հայտնի էր, որ նորաստեղծ ընկերությունն աշխատելու է բյուջետային բիզնեսի մոդելով, այլ կերպ ասած, լինելու է հայկական ավիափոխադրող-լոուքոսթեր։
RUB | 4.21 | -0.05 |
USD | 388.01 | 0.28 |
EUR | 417.11 | -0.44 |
GBP | 484.90 | -1.43 |
CAD | 282.27 | -1.16 |
JPY | 24.97 | -0.13 |
CNY | 53.69 | -0.03 |
CHF | 426.99 | -0.40 |