ՄԱԶԾ-ը տվեց Հայաստանում նորարարական համայնքի ստեղծման մեկնարկը

Արմինֆո.Երևանում կայացել է ՄԱԶԾ-ի (ՄԱԿ-ի Զարգացման ծրագիր) կողմից ԵՄ-ի ֆինանսավորմամբ "Քաղաքապետերը հանուն տնտեսական աճի" ծրագրի շրջանակներում կազմակերպված "Նորարարությունը գործնականում. փոփոխությունների և փոխակերպման խթանում" II համաժողովը:

Երկրորդ տարին անընդմեջ համաժողովը մեկ հարթակում է հավաքում պետական, մասնավոր հատվածների, քաղաքացիական հասարակության, միջազգային կազմակերպությունների և դեսպանությունների ներկայացուցիչներին:

Միջոցառման հարթակներում լրագրողների հետ զրույցում ՄԱԶԾ նորարարության և ֆինանսների պորտֆելի ղեկավար Տիգրան Ճորոխյանը նշել է, որ այսօր համաժողովի շրջանակներում հայտարարվել է Հայաստանում նորարարության համայնքի ստեղծման մասին, որտեղ կմշակվեն նորարարական մեթոդներ, որոնք թույլ կտան առավել ինտենսիվ իրականացնել հանրային կառավարման ոլորտի բարեփոխումները: Այլ կերպ ասած՝ դա թույլ կտա ավելի արդյունավետ որոշումներ կայացնել, հաղթահարել մարտահրավերները և կատարել տնտեսության փոխակերպում՝ այն դարձնելով ավելի մրցունակ։

Պատասխանելով ԱրմԻնֆո-ի թղթակցի հաարցին՝ նա նշել է, որ համայնքի ստեղծման համար գլխավոր բաղադրիչներից մեկը լինելու է նորարարությունների էկոհամակարգի ձևավորումը, քանի որ այսօր նորարարական զարգացման ուղղությամբ ջանքեր գործադրողներն  հատվածական են: Այդ առնչությամբ ՄԱԶԾ ներկայացուցիչը վկայակոչել է Հայաստանի դիրքը նորարարությունների գլոբալ ինդեքսում (Global Innovation Index): Ճորոխյանի խոսքով, Հայաստանն այդ ինդեքսում զբաղեցնում է 82-րդ տեղն աշխարհի 132 երկրների շարքում, աստիճանաբար վատթարացնելով իր դիրքերը, սկսած 2013 թվականից, երբ զբաղեցնում էր 62-րդ տեղը:

Ինդեքսի վայրընթաց գրաֆիկը, ինչպես նշել է նա, կապված է մարդկային կապիտալի ցածր որակի հետ։ "Սա նշանակում է, որ մենք պետք է ավելի մեծ ուշադրություն դարձնենք մարդկային կապիտալի զարգացմանը, նրանց գիտելիքներին ու հմտություններին, ձգտումներին, ճկունությանը, հետաքրքրվածությանը, վճռականությանը", - ասել է Ճորոխյանը:

Նա նաև նշել է, որ ստեղծված իրավիճակը պայմանավորված չէ բացթողումներով, թերություններով, այլ կապված է, առաջին հերթին, այն բանի հետ, որ ժամանակին չի ձևավորվել նորարարությունների էկոհամակարգը: Ուստի, այսօր ՄԱԶԾ-ն փորձելու է ստեղծել, ըստ Ճորոխյանի, համապատասխան միջավայր և էկոհամակարգ, որտեղ յուրաքանչյուրը կարող է առավելագույնս դրսևորել իր ներուժն ու նորարարական միտքը՝ խնդիրների լուծման համար:

Նորարարական համայնք և էկոհամակարգ ստեղծելու այս ծրագիրը կիրականացվի ՄԱԶԾ-ի և գործընկերների կողմից՝ 10 տարվա ընթացքում: Ճորոխյանը հրաժարվել է խոսել ծրագրի բյուջեի մասին, նշելով, որ դեռ բանակցություններ են ընթանում տարբեր գործընկերների հետ՝ ֆինանսավորման շուրջ։ "Հուսով եմ, որ մոտ ժամանակներս մենք կներկայացնենք գործընկերների լայն ցանկ", - եզրափակել է նա:

Նշենք, որ "Քաղաքապետերը հանուն տնտեսական աճի" ծրագիրը ԵՄ Արևելյան գործընկերության շրջանակում ստեղծված նախաձեռնություն է և ուղղված է համայնքների կայուն զարգացմանը: Նախաձեռնությունը հիմնադրվել է 2017թ. հունվարին՝ տեղական ինքնակառավարման մարմինների տնտեսական հնարավորությունների ընդլայնման նպատակով, ինչն օգնում է նրանց պլանավորել և իրականացնել արդյունավետ փոփոխություններ ոլորտում: Գործողությունների ծրագրերի ընտրությունից հետո քաղաքապետարանների կողմից մշակված նախագծերն իրականացվում են ԵՄ ֆինանսական աջակցությամբ: