Արմինֆո. Երևանի զարգացումն առաջիկա մի քանի տարիներին կապահովվի դեկտեմբերի 26-ին ավագանու հաստատած հնգամյա ծրագրի շրջանակում: Այդ մասին ասվում է Երևանի քաղաքապետարանի հաղորդագրությունում։
Նիստում, բացի հնգամյա ծրագրից, հաստատվել է նաև մայրաքաղաքի 2024 թվականի բյուջեն: Եկամուտների ընդհանուր ծավալը նախատեսված է 124 մլրդ 639 մլն դրամի չափով։ Ընդ որում, քաղաքային գանձարանի սեփական եկամուտները կկազմեն 61 մլրդ 514 մլն դրամ, իսկ երկրի պետբյուջեից դոտացիաների ծավալները նախատեսված են 14 մլրդ 136 մլն դրամի սահմաններում, այսինքն, 2023 թվականի հաստատված ցուցանիշից 706 մլն դրամով ավելի։ Երևան քաղաքի 2024 թվականի բյուջեի նախագծի ծախսային մասը նախատեսված է 124 մլրդ 917 մլն դրամի չափով, որի 85.5%-ը բաժին է ընկնելու ընթացիկ ծախսերին:
Երևանի հաջորդ տարվա բյուջեով Աջափնյակ վարչական շրջանում մետրոյի կայարանի կառուցման համար նախատեսվում է հատկացնել 4 մլրդ դրամ, իսկ մայրաքաղաքի մետրոպոլիտենի ենթակառուցվածքների վերանորոգման համար ՝ 879 մլն դրամ: Միջոցներ կհատկացվեն նաև հանգստի գոտիների, զբոսայգիների դրենաժային կոմունիկացիոն ցանցերի իրականացման, թեքահարթակների կառուցման, նախադպրոցական հաստատությունների հիմնանորոգման և մի շարք այլ նախագծերի համար: Մասնավորապես, նախատեսվում է վերանորոգել Երևանի 271 կմ երկարությամբ ճանապարհային ամբողջ ցանցը։ Ամբողջությամբ կներդրվի հասարակական տրանսպորտի նոր երթուղային ցանց և միասնական տրանսպորտային համակարգ, ինչը ենթադրում է նոր ժամանակակից շարժակազմի ձեռքբերում, միասնական տոմսային համակարգի ներդրում, "խելացի" լուծումներով ավտոբուսային կանգառների կահավորում: Նախատեսվում է գնել 8,5 մետր երկարությամբ 171 ավտոբուս։ Քաղաքային իշխանությունները մտադիր են նաև ձեռք բերել 30 նոր տրոլեյբուս, տեղադրել 420 լիցքավորման կայան Էլեկտրամոբիլների համար, փոխարինել 600 վերելակ: 2024-2028 թթ. քաղաքային համայնքի զարգացման ծրագրի շրջանակում նախատեսվում է դեպի "Զվարթնոց" օդանավակայան այլընտրանքային ճանապարհի կառուցում, Երեւանի քաղաքապետարանի ծրագրերի մեջ է մտնում նաեւ Հրազդանի կիրճի վրայով նոր կամրջի կառուցումը:
Նախատեսված միջոցառումների իրականացման արդյունքում Երևանում այլևս չեն լինի վթարային վերելակներ և վերանորոգման կամ հիմնանորոգման կարիք ունեցող հանրային մանկապարտեզներ, վարչական շրջաններում կկառուցվեն 14 նոր համալիր մարզադպրոցներ: Դալմայի այգիների ավելի քան 230 հեկտարի վրա կկառուցվի նոր քաղաքային զբոսայգի, Նորքի նախկին այգիների 10 հեկտարի վրա կտնկվի անտառ, կվերականգնվի և կարդիականացվի Երևանի ոռոգման համակարգի կեսից ավելին: Ավարտին կհասցվի մոտ 120 կմ երկարությամբ նոր ճանապարհային ցանցի շինարարությունը: Երևանի նոր գլխավոր հատակագծի մշակման ընթացքում կկառուցվեն մի շարք այլընտրանքային ճանապարհներ՝ կենտրոնը բեռնաթափելու նպատակով:
Բացի այդ, քաղաքացիներին մատուցվող ծառայությունների որակը բարձրացնելու նպատակով կներդրվի միասնական էլեկտրոնային հարթակ և հարմարավետ բջջային հավելված՝ ավելի քան 150 ծառայությունների համար:
Երևանի ավագանու որոշմամբ սահմանվել են 2024 թվականի տեղական տուրքերի և հարկերի դրույքաչափերը: Մայրաքաղաքի կենտրոնում երթևեկության բեռնաթափման նախագծի շրջանակներում ավագանու կողմից կայանատեղիների վճարի վերաբերյալ փոփոխություններ են կատարվել: Միևնույն ժամանակ, ավագանին որոշ տեղական տուրքերից ազատում է սահմանել։