Արմինֆո. Առևտրատարանցիկ համագործակցության զարգացումը չի կարող տարածաշրջանում աշխարհաքաղաքական փոփոխությունների արդարացում լինել։ Այդ մասին հայտարարել է Իրանի ԱԳՆ պաշտոնական ներկայացուցիչ Նասեր Քանանին՝ մեկնաբանելով ՀՀ Սյունիքի մարզով միջանցք ստեղծելու վերաբերյալ Թուրքիայի տրանսպորտի նախարարի հայտարարությունը։
Իրանի ԱԳՆ ներկայացուցիչը նշել է, որ ծանոթ չէ թուրք պաշտոնյայի ճշգրիտ հայտարարությանը: Սակայն, ըստ նրա, Թեհրանը հստակ դիրքորոշում ունի տարածաշրջանում, հատկապես, Կովկասում տիրող իրավիճակի վերաբերյալ՝ խաղաղության և կայունության հաստատման, ինչպես նաև միջանցքների և տարանցիկ ուղիների վերաբերյալ: "Մենք միշտ ընդգծում ենք տարածաշրջանային համագործակցության ընդլայնման կարևորությունը խաղաղության և կայունության, տնտեսական և առևտրային համագործակցության, հաղորդակցության և տարանցման ստեղծման համար։ Եվ մենք ընդգծել ենք, որ Հարավային Կովկասում տարանցիկ համագործակցության զարգացումը չի կարող հիմք հանդիսանալ աշխարհաքաղաքական փոփոխությունների եւ երկրների տարածքային ամբողջականության ու ինքնիշխանության խախտման համար, եւ խախտում է այդ սկզբունքները", - հավելել է Քանանին, հաղորդում Է Mehr-ը:
Նշենք, որ նախօրեին Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն հայտարարել էր, որ Անկարան ակնկալում է մինչև 2029 թվականը իրականացնել, այսպես կոչված, "Զանգեզուրի միջանցքի" ստեղծման նախագիծը: "Միջանցքի ադրբեջանական հատվածը, որը սկսվում է Բաքվից մինչև Հորադիզ, մոտենում է ավարտին։ Միջանցքի թուրքական հատվածի երկարությունը կազմում է 224 կմ: Ընդհանուր առմամբ, այդ միջանցքի ստեղծման ողջ գործընթացը կտեւի հինգ տարի: Այսինքն, կարծում եմ, որ 2028 թվականին մենք ամբողջությամբ կավարտենք բոլոր աշխատանքները", - ասել է Ուրալօղլուն՝ թուրքական tvnet հեռուստաալիքի հարցազրույցում։ Թուրք նախարարը հավելել է, որ շինարարական աշխատանքները շարունակվում են Հորադիզից մինչև Օրդուբադ հատվածում (Ադրբեջանի Նախիջևանի Ինքնավար Հանրապետություն)՝ բացառությամբ Հայաստանի տարածքով անցնող հատվածի:
"Կպահանջվի ՆԻՀ-ը Թուրքիային կապող գոյություն ունեցող ճանապարհի վերակառուցում՝ մոտ 100 կմ երկարությամբ: Դրա շարունակությունը կդառնա Իգդիր-Կարս երկաթուղին, որով մրցութային ընթացակարգերն արդեն իրականացվել են, շինարարությունը սկսում ենք այս տարի", - հայտարարել է Ուրալօղլուն:
Անդրադառնալով "Զանգեզուրի միջանցքի" վերաբերյալ Երևանի դիրքորոշմանը՝ թուրք նախարարն ընդգծել է, որ երբ առաջին անգամ նման նախաձեռնություն առաջ քաշվեց, հայկական կողմը բացասական էր արձագանքում, չնայած այն հանգամանքին, որ խոսվում էր նաև այդ նախագծից Հայաստանի շահի մասին։
"Սակայն վերջին շրջանում Փաշինյանի կողմից դրական ուղերձներ են հնչել այդ միջանցքի վերաբերյալ։ "Զանգեզուրի միջանցքի" հայկական հատվածի երկարությունը կազմում է շուրջ 43 կմ: Նրանք պետք է իրականացնեն պլանավորում և հայտամրցույթներ, որպեսզի միջանցքն ամբողջությամբ ավարտված համարվի: Դրանով իսկ Թուրքիան ուղիղ և ավելի պարզ ելք կստանա դեպի թյուրքական աշխարհի, Կենտրոնական Ասիայի երկրներ", - ասել է նա։
Թուրք նախարարը նաև նշել է, որ Իրանն իր կողմից առաջ է քաշել ճանապարհի կառուցման նախաձեռնություն, որն իր տարածքով կկապի Ադրբեջանը Թուրքիայի հետ: "Մենք իրականացնելու ենք "Զանգեզուրի միջանցքի " նախագիծը, բայց դեմ չենք, որ Իրանը ևս դառնա Թուրքիայի և Ադրբեջանի միջև այդ կապի մի մասը՝ իր տարածքով։ Իրանական կողմի հետ բանակցություններն ու հանդիպումները շարունակվում են: Մենք ակնկալում ենք, որ այդ նախագիծն էլ ժամանակին կիրաագործվի", - ասել է նա։