Կարգավորիչը մերժել է "ՄՏՍ Հայաստան" ՓԲԸ-ի նկատմամբ վերահսկողության փոխանցումը

Արմինֆո.Հայաստանի Հանրային ծառայությունները կարգավորող հանձնաժողովը (ՀԾԿՀ) հունվարի 17-ի նիստում համաձայնություն չի տվել "ՄՏՍ Հայաստան" ՓԲԸ-ի նկատմամբ վերահսկողության փոխանցման գործարքի կնքմանը:

Ավելի վաղ ԱրմԻնֆո-ն հաղորդել էր, որ "ՄՏՍ-Հայաստան" ընկերության փաստացի վերահսկող բաժնետեր հանդիսացող ռուսական  "Մոբիլնիե ՏելեՍիստեմի" կորպորացիան դիմել է ՀԾԿՀ' Կիպրոսում գրանցված Aramayo Investments Limited-ից (որը մտնում է "ՄՏՍ Հայաստան" - ի բաժնետերերի շղթայի մեջ) "ՄՏՍ Հայաստանի" 100% բաժնետոմսերը ձեռք բերելու խնդրանքով:

Հունվարի 15-ին "ՄՏՍ Հայաստան" ՓԲԸ-ը հանդես էր եկել պարզաբանմամբ, նշելով, որ դիմել է "ՄՏՍ Հայաստան "ՓԲԸ-ի անուղղակի բաժնետիրոջ կողմից ընկերության ուղղակի բաժնետեր "Aramayo Investments Limited-ից" ՄՏՍ Հայաստան" ՓԲԸ-ի 100% բաժնետոմսերի ձեռք բերման գործարքի կնքմանը համաձայնություն ստանալու համար: "Նախատեսվում է, որ գործարքի արդյունքում "ՄՏՍ Հայաստան" ընկերության բաժնետերերի շղթան կկրճատվի, ինչը կապահովի ՄՏՍ-ի և "ՄՏՍ Հայաստան" ՓԲԸ-ի առավել արդյունավետ փոխգործակցությունը: Ընկերությունը կշարունակի մնալ ՄՏՍ խմբի անդամ և կվերահսկվի ՄՏՍ-ի կողմից", - ասվում էր ընկերության հաղորդագրությունում: "ՄՏՍ Հայաստան"-ում նաև պարզաբանել էին, որ այդ գործարքն ընդհանուր ոչինչ չունի կիպրական Fedilco Group Limited-ի կողմից "ՄՏՍ Հայաստան"-ի միակ բաժնետեր "Aramayo Investments Limited" - ից բաժնետոմսերի 100% - ը ձեռք բերելու համաձայնության վերաբերյալ 2023 թվականի նոյեմբերին ՀԾԿՀ ներկայացված հայտի հետ։

Այդ հայտը բավարարվել էր միայն երկրորդ փորձից (ապրիլին ՀԾԿՀ-ն մերժել էր հայտը, պատճառաբանելով, որ այն կարող է վնաս հասցնել Հայաստանի պետական շահերին և անվտանգությանը)։ Միաժամանակ նշվում էր, որ գործարքի կնքումից հետո "ՄՏՍ Հայաստանը" կդադարի լինել ՄՏՍ՝ ռուսական հեռահաղորդակցության օպերատոր "Մոբիլնիե Տելեսիստեմի" խմբի անդամ: Գործարքը պետք է փակվի վերջնական որոշման հրապարակման օրվանից անց վեց ամսվա ընթացքում:

Այսօրվա որոշման նախագծում նշվում է, որ Հայաստանի Բարձր տեխնոլոգիական արդյունաբերության նախարարությունը 2023 թվականի դեկտեմբերի 27-ին դեմ է արտահայտվել դրան՝ այն հիմքով, որ արդեն իսկ հավանություն է տվել "ՄՏՍ Հայաստանի" բաժնետոմսերի մեկ այլ հայտի շրջանակներում վաճառքի հայտին, ինչպես նաև՝ "ելնելով պետական շահերից"։

Ինչպես ՀԾԿՀ  նիստում նշել Է կարգավորիչի ղեկավար Գարեգին Բաղրամյանը, հայտը մերժվել է հենց այն հիմքով, որ " ՄՏՍ"-ն առանց այդ էլ պատրաստվում է վաճառել իր հայկական ընկերությունը, ուստի իմաստ չունի թույլ տալ նրան վերակազմակերպում: Միևնույն ժամանակ, նրա խոսքով, վերակազմակերպման հարցին հնարավոր կլինի վերադառնալ, եթե ՄՏՍ-ը և Fedilco Group Limited-ը հրաժարվեն գործարքից:

Նշենք, որ "ՄՏՍ Հայաստան" հեռահաղորդակցային ընկերությունը (VivaCell - MTS ապրանքանիշը Հայաստանի հեռահաղորդակցության շուկա է մտել 2005 թվականին) առաջատար է Հայաստանի կապի օպերատորների շրջանում խոշորագույն հարկատուների ցանկում: ՀՀ պետական եկամուտների կոմիտեի տվյալներով՝ 2023 թվականի հունվար-սեպտեմբեր ամիսներին "ՄՏՍ Հայաստանը" պետական գանձարան է վճարել 12.6 մլրդ դրամ, որից 4.3 մլրդ դրամը ՝ ուղղակի հարկերի (այդ թվում ՝ շահութահարկ, եկամտահարկ) և 5.2 մլրդ դրամը ՝ ԱԱՀ գծով։