ԱԶԲ ներկայացուցիչները Երևանում քննարկել են ջրամբարների, դպրոցների կառուցմանը և կոշտ թափոնների կառավարմանն առնչվող նախագծեր

Արմինֆո. ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանը հանդիպել է Ասիական զարգացման բանկի (ԱԶԲ) հայաստանյան գրասենյակի տնօրեն Դոն Լամբերտի գլխավորած պատվիրակությանը: 

ՏԿԵՆ հաղորդագրության համաձայն, ԱԶԲ հայաստանյան գրասենյակի տնօրենը տեղեկացրել է, որ այցի նպատակն է քննարկել ջրամբարաշինության և ոռոգման համակարգերի, դպրոցաշինության, կոշտ կենցաղային թափոնների կառավարման և Սևանա լճի ջրի որակի բարելավմանն ուղղված ծրագրերին վերաբերող հարցեր: 

Խոսելով ջրամբարաշինության ծրագրերի և հատկապես Կապսի ջրամաբարի ծրագրի մասին՝ Տերտերյանը կարևորել է ԱԶԲ-ի ակտիվ և արդյունավետ համագործակցության հնարավորությունը ծրագրի մեջ ներգրավված միջազգային մյուս գործընկեր կառույցների հետ: Զրուցակիցները կարևորել են նաև ոռոգման համակարգերի կառուցման, վերակառուցման անհրաժեշտությունը։ 

Դպրոցաշինության ծրագրերին անդրադարձ կատարելով՝ ԱԶԲ-ի ներկայացուցիչները խոսել են իրենց մոտեցումների, առաջիկա ծրագրերի, կարևորել կառուցվող դպրոցների ծախսարդյունավետ լինելը և կառուցումից հետո շինության հետագա պահմանման հարցերը: 

Դպրոցաշինության մասով Տերտերյանը նշել է, որ գործընթացը ՀՀ կառավարության ռազմավարական առաջնահերթություններից է և առաջարկել է հետագա քննարկումններին ներգրավվել շահագրգիռ մյուս գերատեսչություններին նույնպես: Սևանա լճի ջրի որակի բարելավման վերաբերյալ բանկի ներկայացուցիչները նշել են, որ առկա է հնարավորություն երեք մեխանիկական մաքրման կայանները դարձնել կենսաբանական մաքրման կայաններ: 

Նախարարի տեղակալը կարևորելով մաքրման կայանների առկայությունը՝ միաժանակ ընդգծել է այդ կայանների արդյունավետ, ճիշտ կառավարման և շահագործման անհրաժեշտությունը: Խոսելով կոշտ կենցաղային թափոնների կառավարման մասին՝ Վաչե Տերտերյանը կարևորել է կառավարման արդյունավետ մոդելների ուսումնասիրության և հիմնավորման կարևորությունը։ Հանդիպման ընթացքում քննարկվել են երկուստեք կարևորություն ունեցող այլ հարցեր ևս:

Հիշեցնենք, որ Կապսի ջրամբարի կառուցման նախագծի արժեքը կազմում է 60 մլն եվրո։ Այն նախատեսվում է իրականացնել գերմանական KfW բանկի հետ համագործակցությամբ։ ԱԶԲ-ի մասնակցությունն այդ նախագծին թույլ կտա ներգրավել լրացուցիչ ֆինանսական ռեսուրսներ։

Ինչ վերաբերում է դպրոցաշինության նախագծին, ապա ավելի վաղ ԱԶԲ-ն այդ նպատակով հատկացրել էր 66,1 մլն եվրո:

ԱԶԲ-ը Հայաստանի կառավարության հետ համագործակցում է 2005 թվականից: Այս ընթացքում հաստատվել է 38 սուվերեն և ոչ սուվերեն վարկ, ինչպես նաև՝ հատուկ աջակցության դրամաշնորհ։ Մինչ օրս ներդրումների ընդհանուր ծավալը կազմում է 1,74 մլրդ դոլար: Հայաստանին տրամադրվել է նաև  տեխնիկական աջակցության 48 դրամաշնորհ՝ 25,9 մլն դոլար ընդհանուր արժեքով: