Ուրբաթ, 16 Փետրվարի 2024 13:05

Արմինֆո. Արմենիան Քարդ ընկերությունը, հանդիսանալով ԱրՔա ազգային վճարային համակարգի օպերատոր, ինչպես նաև միասնական պրոցեսինգային կենտրոն հայաստանյան բանկերի մեծ մասի համար, որոշում է կայացրել 2024 թվականի ապրիլի 15-ից arca.am հավելվածով  գործառնությունները դադարեցնելու մասին: Ընկերությունը կենտրոնանալու է իր ծառայությունների անմիջական շահառու հանդիսացող ֆինանսական կազմակերպություններին տեխնոլոգիական լուծումներ մատուցելու վրա։ Այդ մասին ասվում է ընկերության պաշտոնական հայտարարությունում։

 

«Մենք ունենք ապագայի մեծ պլաններ, շուտով ներկայացնելու ենք նոր, ժամանակակից պրոդուկտներ մեր գործընկեր բանկերի համար՝ շարունակելով զարգացնել վճարումների և փոխանցումների ոլորտը Հայաստանում։ Մենք ձեր հետ կլինենք միշտ, երբ դուք քարտով, հեռախոսով, սմարտ ժամացույցով և այլ միջոցներով ֆիզիկական կամ վիրտուալ միջավայրում կկատարեք վճարում կամ փոխանցում», - նշել են ընկերությունում։

 

 «Ըստ էության, arca.am հավելվածը դարձավ նախատիպ և խթան՝ բանկերի կողմից սեփական հավելվածների մշակման և զարգացման համար, և դրանով իսկ մենք կարող ենք հաջողված համարել մեր առաքելությունը։

 Այս պահին շուկայում առկա են բազմաթիվ լուծումներ, որոնք ծածկում են, որոշ առումներով նույնիսկ գերազանցում են ծառայությունների շրջանակը, որն առկա է մեր հավելվածում», - նշված է հայտարարությունում։

 

Ընկերությունում պարզաբանել են, որ այժմ, անհրաժեշտության դեպքում, կարելի է պահպանել  վճարումների տվյալները, արտահանելով դրանք arca.am կաբինետի WEB տարբերակի համապատասխան բաժիններից, ինչպես նաև դուրս գրել պարբերական վճարների / փոխանցումների, շահառուների տվյալները՝ այլ հարթակներում դրանք հետագայում գրանցելու նպատակով։

 

Հիշեցնենք, որ օրերս ԱրմԻնֆո-ի հետ հարցազրույցում "Արմենիան Քարդ" ՓԲԸ տնօրեն Իշխան Մխիթարյանը հաղորդել էր, որ այժմ ընկերությունն աշխատում է ArCa քարտերի թոքենիզացման ուղղությամբ: Այդ նախագծի շնորհիվ Android օպերացիոն համակարգով սմարթֆոնների տերերը հնարավորություն կունենան օգտվել հեռախոսից տեղական ArCa քարտերով ապրանքների և ծառայությունների դիմաց վճարելու համար: «Այս գործառույթը կգործարկվի բանկերի բջջային հավելվածներում։ Մենք գտնվում ենք այս նախագծի մշակման վերջին փուլերում և առաջիկա ամիսների ընթացքում տեխնոլոգիական լուծումները կփոխանցենք բանկերին», - ասել էր նա:

 

Բացի այդ, ընկերությունը այս տարվա ապրիլին կգործարկի ArCaPay համակարգը։ Մխիթարյանի ասելով, դա պարզ նույնացուցիչների միջոցով փոխանցումների և վճարումների համակարգ է՝ օգտագործելով բանկերի բջջային հավելվածները: «Այսինքն, երկու բանկերի միջև մեկ հաշվից մյուսին փոխանցում կատարելու համար բավական կլինի մուտքագրել միայն ստացողի հեռախոսահամարը։ Անհրաժեշտ չի լինի իմանալ ոչ նրա հաշվի համարը, ոչ անունն ու ազգանունը, ոչ էլ բանկային տվյալները, որոնք այսօր պահանջվում է լրացնել միջոցների փոխանցման համար: Հասկանալի է, որ դրա համար աշխատում է նույնականացման մի ողջ համակարգ, բայց դու, որպես ուղարկող, մուտքագրում ես միայն փոխանցման համար հեռախոսահամարը։ Սա, այսպես կոչված, արագ /ակնթարթային վճարման համակարգ է (Instant Payment System): Առաջին փուլում այդ համակարգը կաշխատի ֆիզիկական անձանց միջև փոխանցումներ իրականացնելու համար, հեռանկարում դրանք կարող են լինել B2B փոխանցումներ, կարող են լինել փոխանցումներ պետությունից ֆիզիկական անձանց, և՝ հակառակը, ինչպես նաև ֆիզիկական և վիրտուալ միջավայրում ապրանքների և ծառայությունների դիմաց վճարում», - նշել էր նա:

 

Ընկերությունը հիշեցնում է, որ arca.am հավելվածը մուտք գործեց շուկա 2019 սկզբին՝ որպես մինչ այդ գործող «Վիրտուալ քարտերով» վճարումների համակարգի զարգացման հաջորդ փուլ, և այն ժամանակ շուկայի կողմից սպասված և պահանջված լուծում էր, որն ապահովում էր շուկայում նոր կիրառական փորձառություն և  ծառայությունների մի շրջանակ, որն այդ պահին քիչ թվով մասնակիցներին էր հասանելի։