Արմինֆո. Հայաստանի Ավտոապահովագրողների բյուրոն տեղեկացնում է, որ սույն թվականի ապրիլի 1-ին, տեխնիկական հնարավորությունների ներդրման ապահովմամբ պայմանավորված, ուժի մեջ կմտնեն Հայաստանի Ավտոապահովագրողների Բյուրոյի խորհրդի կողմից 2023թ-ի ապրիլի 25-ի թիվ 14-Լ որոշմամբ հաստատված և Հայաստանի Հանրապետության կենտրոնական բանկի կողմից 2023թ-ի հունիսի 27-ին գրանցված՝ «ԱՊՊԱ ընդհանուր պայմաններ» RL 1-001 կանոններում (այսուհետ՝ Կանոններ) կատարված փոփոխությունները։
«Կանոններում կատարված փոփոխություններով ԱՊՊԱ պայմանագրի կնքման համար ԱՊՊԱ վկայագրի «Հաշվեհամար» դաշտը սահմանվել է պարտադիր լրացման ենթակա: Համապատասխանաբար, սույն թվականի ապրիլի 1-ից սկսած՝ ԱՊՊԱ պայմանագրի կնքման համար ԱՊՊԱ վկայագրի «Հաշվեհամար» դաշտում անհրաժեշտ է լինելու պարտադիր լրացնել ապահովադրին պատկանող և Հայաստանի Հանրապետությունում գործող բանկում բացված բանկային հաշվեհամարը։ Ընդ որում, ԱՊՊԱ պայմանագիրն ապահովագրական ընկերության գլխամասային գրասենյակում կամ մասնաճյուղում կնքվելու և ԱՊՊԱ պայմանագրի շրջանակներում ապահովադրին վճարման ենթակա գումարներն ստանալու լիազորություններ պարունակող՝ նոտարական կարգով վավերացված լիազորագիր ներկայացվելու դեպքում պայմանագրում կարող է ապահովադրի փոխարեն լրացվել նրա կողմից լիազորված անձի բանկային հաշվեհամարը։
Հաշվի առնելով վերոգրյալը՝ հորդորում ենք բոլոր ավտոսեփականատերերին բանկային հաշիվ չունենալու դեպքում մինչև ԱՊՊԱ պայմանագրի կնքումը Հայաստանի Հանրապետությունում գործող որևէ բանկում բացել բանկային հաշիվ։
Տեղեկացնում ենք նաև, որ Կանոնների համապատասխան փոփոխություններն ուժի մեջ մտնելուց հետո դրա ինկորպորացված տարբերակը կտեղադրվի Բյուրոյի ինտերնետային կայքի «Իրավական ակտեր» բաժնի «Բյուրոյի կանոններ» ենթաբաժնում», - ասվում է Ավտոապահովագրողների բյուրոյի հաղորդագրությունում։
Մինչդեռ, հայտնի է, որ վերջին շրջանում հաճախակի են դարձել ապահովագրական ընկերությունների կողմից ԱՊՊԱ պայմանագրերի (ապահովագրական հատուցումների) կատարումից հրաժարվելու դեպքերը, եթե խոսքը Հայաստան մուտք գործող ոչ ռեզիդենտների մասին է, որոնք երկիր մուտք գործելիս ապահովագրերը ձեռք են բերել արտասահմանյան բանկային քարտերով: Ինչպես ԱրմԻնֆո-ին հաղորդել են ապահովագրական ընկերություններից մեկում, նման դեպքեր հաճախ չեն լինում և, ամենայն հավանականությամբ, կապված չեն հատուցման վճարման տեխնիկական խնդրի հետ: Քանի դեռ ոչ ռեզիդենտների վերաբերյալ որոշում չի կայացվել, ապահովագրողները կպահպանեն հին կանոնները նրանց հետ աշխատելիս, եթե խոսքը վերաբերում է արտասահմանյան համարանիշերով տրանսպորտային միջոցներին: Ապահովագրողների բյուրոյից ԱրմԻնֆո-ին հաղորդել են, որ ոչ ռեզիդենտների հետ ԱՊՊԱ ապահովագրերի ձևակերպման խնդիրը առայժմ քննարկվում է, կա որոշման նախագիծ, որի վրա դեռ աշխատում են:
Այդ կարգը, ինչպես ԱրմԻնֆո-ին հաղորդել են ընկերություններից մեկում, ընդունվել է, առաջին հերթին, կապված երկրում ընդունված կանխիկ հաշվարկների սահմանափակման մասին օրենքի հետ, և, երկրորդ, ապահովագրական վճարումներ իրականացնելիս բանկային հաշիվներին առնչվող խառնաշփոթից խուսափելու նպատակով:
Նշենք, որ Ավտոապահովագրողների բյուրոյի տվյալներով՝ 2023 թվականի արդյունքներով Հայաստանում կար 667,402 հազար ԱՊՊԱ պայմանագիր ունեցող տրանսպորտային միջոց, որոնց թիվը տարվա ընթացքում ավելացել է 10%-ով կամ 60,806 հազարով: Իսկ 2023 թվականին կնքված ԱՊՊԱ պայմանագրերի թիվը գերազանցել է 1,3 մլն հատը ՝ տարեկան 12% աճով: Այս պայմանագրերով հավաքագրվել է 27.2 մլրդ դրամի ապահովագրավճար ՝ տարեկան 2.6% աճով։
Հարկ է նշել, որ պայմանագրերի քանակի գերազանցումը մեքենաների քանակի նկատմամբ բացատրվում է եռամսյակային (կարճաժամկետ) պայմանագրերի մեծ թվով: Կնքված ԱՊՊԱ պայմանագրերի ընդհանուր թվում E-ապահովագրերի մասնաբաժինը տարվա ընթացքում աճել է 24%-ից մինչեւ 25%: