ՊԵԿ-ն առաջարկել է չհարկել տարեկան մինչև 12 մլն դրամ եկամուտ ունեցող աշխատանքային միգրանտներին

Արմինֆո. Հայաստանի իշխանությունները, հնարավոր է, չհարկեն արտերկիր սեզոնային աշխատանքի մեկնող քաղաքացիների եկամուտները, եթե նրանց տարեկան եկամուտը չի գերազանցում 12 մլն դրամը (ընթացիկ փոխարժեքով մոտ 29 հազար դոլար)։ ՀՀ ՊԵԿ-ի օրենսդրական նախաձեռնությունը՝ լրացուցիչ մեկնաբանություններով, հրապարակվել է իրավական ակտերի միասնական e-draft.am պորտալում:

Հիշեցնենք, որ ավելի վաղ ժամանակավոր աշխատանքի նպատակով Ռուսաստան մեկնող հազարավոր քաղաքացիներ, վերադառնալով տուն, ՊԵԿ-ից նամակներ էին ստացել, որ ունեն 100 հազարից մինչև 1 միլիոն դրամի հարկային պարտք: Ռուսաստանում եկամտահարկի դրույքաչափը կազմում է 13%, իսկ Հայաստանում ՝ 20% ։ Տարբերությունը 7% է և պետք է վճարվի աշխատանքային միգրանտների կողմից, գումարած յուրաքանչյուր չվճարված օրվա համար 0,04% ուշացում (տույժեր և տուգանքներ): Հատկանշական է, որ քաղաքացիները նախապես տեղյակ չեն եղել այդ մասին։

Կոմիտեում հիշեցրել են, որ 2020 թվականին Հայաստանի Հանրապետությունը միացել է "Հարկային վարչարարության նպատակով ԱՊՀ անդամ պետությունների միջեւ տեղեկատվության էլեկտրոնային փոխանակման մասին" արձանագրությանը, որի շրջանակներում հարկային մարմինն առաջին անգամ տեղեկատվություն է ստացել ԱՊՀ մասնակից պետություններում ֆիզիկական անձանց կողմից ստացված եկամուտների մասին, որի հիման վրա ֆիզիկական անձինք տեղեկացվել են ՀՀ օրենսդրությանը համապատասխան եկամտային հարկի հաշվարկման եւ վճարման վերաբերյալ (ավելի վաղ ՊԵԿ նախագահ Ռուստամ Բադասյանը լրագրողներին հաղորդել էր, որ այդ կարգավորումը հրամայական բնույթ չի կրում – խմբ.):

Իսկ հիմա, արձագանքելով քաղաքացիների դժգոհությանը, հարկայինները որոշել են չհարկել աշխատանքային միգրանտներին, բայց՝ որոշակի վերապահումներով։ Այսպես, նախագծով առաջարկվում է սահմանել, որ քաղաքացիաիրավական պայմանագրերի շրջանակներում աշխատանքների կատարման և/կամ ծառայությունների մատուցման համար ՀՀ ռեզիդենտ ֆիզիկական անձանց կողմից ՀՀ տարածքից դուրս աղբյուրներից ստացված եկամուտը չի համարվում հարկվող եկամտային հարկ, եթե հաշվետու տարվա ընթացքում նշված եկամուտները չեն գերազանցում 12 միլիոն դրամը, և եթե աշխատանքային միգրանտներն արդեն իսկ եկամտահարկ են վճարել եկամուտ ստանալու երկրում: Ընդ որում, նշված դրույթը չի տարածվում այն ռեզիդենտ ֆիզիկական անձանց վրա, որոնք վերը նշված եկամուտները հեռակա կարգով ստացել են Հայաստանի Հանրապետության տարածքում աշխատանքների կամ ծառայությունների կատարման համար, ինչպես նաեւ այն ռեզիդենտ ֆիզիկական անձանց վրա, որոնք համապատասխան եկամուտներ են ստացել կառավարության կողմից սահմանված հարկման հատուկ ազատական համակարգեր ունեցող երկրներում (աշխարհագրական գոտիներում) գրանցված կազմակերպություններից:

Օրենսդրական նորմը, հաստատվելու դեպքում, կտարածվի 2020-2023 թվականներին ծագած (իրականացված) աշխատանքային հարաբերությունների վրա: