Ռուսաստանից բենզինի արտահանման ժամանակավոր արգելքը Հայաստանին չի վերաբերվի

Արմինֆո. Ռուսաստանից բենզինի արտահանման ժամանակավոր արգելքը Հայաստանին չի վերաբերվի։

«ՌԲԿ»-ի հաղորդագրության համաձայն, պահանջարկի սեզոնային աճի ֆոնին ժամանակավոր արգելքը կգործի մարտի 1-ից, համապատասխան առաջարկին հավանություն է տվել Միխայիլ Միշուստինը: Սակայն, ինչպես նշվում է հաղորդագրության մեջ, ժամանակավոր արգելքը չի վերաբերում ԵԱՏՄ երկրներ (Հայաստան, Բելառուս, Ղազախստան և Ղրղզստան), Մոնղոլիա, Ուզբեկստան, Աբխազիա և Հարավային Օսիա մատակարարումների համաձայնեցված ծավալներին:

Բենզինի արտահանման ժամանակավոր արգելք սահմանելու առաջարկով կառավարության նախագահին դիմել է փոխվարչապետ Ալեքսանդր Նովակը ։ Փետրվարի 21-ի նամակում նա նշել է, որ ներքին շուկայում շուտով կսկսվի վառելիքի նկատմամբ պահանջարկի մեծացման սեզոնը, որը կապված է գարնանային դաշտային աշխատանքների ժամանակահատվածի, նավթավերամշակման գործարանում պլանային վերանորոգման, ինչպես նաև ամառային արձակուրդների հետ:

Նշենք, որ անցած տարվա հոկտեմբերից Ռուսաստանը սկսել է ինդիկատիվ հաշվեկշռի շրջանակներում հաստատված ծավալներից բացի Հայաստան մատակարարել 15 հազար տոննա բենզին և 20 հազար տոննա դիզելային վառելիք: Ընդհանուր առմամբ, 2023 թվականի հունվար - հուլիս ամիսներին Հայաստան է մատակարարվել 307 000 տոննա նավթամթերք, այդ թվում ՝ 77 տոկոսը՝ Ռուսաստանից (235 000 տոննա) ։ Խոշոր մատակարարներ են նաև Հունաստանը (8%) և Իրանը (8%): Հունվար-հուլիս ամիսներին Ռուսաստանը Հայաստան է մատակարարել 106 000 տոննա ԱԻ-92 բենզին և 34 000 տոննա բարձր օկտանային բենզին, ինչպես նաև 69 000 տոննա ամառային դիզվառելիք և 26 000 տոննա միջսեզոնային դիզել: