Ռուսական կապիտալի արտահոսքը կարող է իր բացասական հետքը թողնել տնտեսությունում. Հայաստանի արդյունաբերողների և գործարարների միություն

Արմինֆո. «Հայաստանի տնտեսության զարգացման միտումները և դրան առնչվող հիմնախնդիրները» հարցն էր ներառված Հայաստանի արդյունաբերողների և գործարարների միության՝ մարտի 28-ին կայացած խորհրդի ընդլայնված նիստի օրակարգում։ Նիստին մասնակցելու հրավիրվել էին նաև տնտեսության բնագավառի վերլուծաբաններ, ակադեմիական ոլորտի տեսաբաններ։

ՀԱԳՄ հաղորդագրության համաձայն, միության նախագահ Արսեն Ղազարյանի խոսքով՝ Հայաստանի արդյունաբերողների և գործարարների միության՝ ՀՀ գործադիր իշխանության տարբեր բարձրաստիճան պաշտոնյաների ու ստորաբաժանումների հետ վերջին շրջանում ունեցած հանդիպումների արդյունքում ձևավորվել է այն համոզմունքը, որ Հայաստանի տնտեսության բարեփոխումը և դրան միտված տարբեր ոլորտներում ռազմավարությունների մշակումը դարձել են օրվա հրամայական։ Նա անդրադարձել է ժամանակին Միության կողմից իրականացրած տեսական, վերլուծական շոշափելի գործունեությանը, որոնք ամփոփվեցին «Ի՞նչ անել» ընդհանուր խորագրով երկու ժողովածուներում։ «Ցավոք պատերազմը և համավարակը ընդհատեցին այս գործընթացը, սակայն մենք պարտավոր ենք մեր ներդրումն ունենալ երկրի տնտեսությունը զարգացման ուղով տանելու առաքելությանը, նոր սերնդին ժառանգելու մեր բացթողումներից ու թերություններից քաղած դասերը, նաև՝ մեր փորձը, կարողությունը, ներուժը», – նշել է Արսեն Ղազարյանը։ Նա կարևորել է գործարար համայնքի, գիտական շրջանակների մասնակցությամբ վերլուծական աշխատանքների աշխուժացումը՝ Հայաստանի տնտեսության բարեփոխման ու զարգացման առնչությամբ մոտեցումներն ու տեսլականն ամբողջացնելու նպատակով։

Գործարարներն իրենց ելույթներում տնտեսության զարգացման խնդրում ընդգծել են երկրի անվտանգային խնդիրները, առկա աշխարհաքաղաքական գործընթացները։ Համոզմունք է հայտնվել, որ տնտեսությունն այն բաղադրիչներից է, որ իր հերթին նպաստում է անվտանգության ապահովմանը, ուստի, բոլոր դեպքերում, գործարարները պետք է ուղիներ գտնեն բնականոն գործունեության, աշխատանքների շարունակական կատարելագործման համար։ Կարծիք է հնչել, որ անհնար է ունենալ առողջ հասարակություն՝ առանց առողջ տնտեսության։

Կարևորվել է համանման հարթակների գործունեությունը, որտեղ կգեներացվեն հանրության տարբեր խմբերի մոտ առկա գաղափարները, կստեղծվեն եղած ներուժը համախմբող ծրագրեր։ Մտահոգություն է հնչել, որ տարբեր ժամանակներում մշակվող ռազմավարություններն ու ծրագրերն իրենց նպատակային հանգրվանին չեն հասցվում, իրավիճակի փոփոխությամբ՝ էապես փոխվում է նաև մինչ այդ որդեգրած տնտեսական քաղաքականությունը։

Ընգծվել է երկրի արդյունաբերությունը վերակենդանացնելու անհրաժեշտությունը, որն աստիճանաբար իր դիրքերը զիջում է տնտեսության ընդհանուր կառուցվածքում։ Մեր տնտեսության վրա իր բացասական հետքը կարող է թողնել ռուսական կապիտալի արտահոսքը, որի միտումներն արդեն իսկ նկատվում են։

Կարևորելով գործադիր իշխանության հետ երկխոսությունը, ներկաները նշել են, որ հաճախ ներկայացվող ծրագրերն ու առաջարկները ժամանակին և անհրաժեշտ արձագանք չեն ստանում պատկան մարմիններից։ Որոշ դեպքերում տնտեսական բնույթի որոշումների մասին գործարարները տեղեկանում են այն ընդունվելուց հետո միայն։

ՀԱԳՄ նախագահ Արսեն Ղազարյանն ամփոփելով այս և բարձրացված այլ հարցերը՝ նպատակահարմար է համարել հետագայում տնտեսական ուղղվածության այլ հասարակական կառույցների հետ համատեղ համանման քննարկման անցկացումը՝ կարևորելով հավաքական կարծիքի ձևավորումը։

Խորհրդի նիստում Միության անդամի կարգավիճակ շնորհվեց «Էլէ սոլար» ՍՊԸ–ին (տնoրեն` Կարեն Ասրյան)։