Դիանա Հակոբյան. Ամերիաբանկի MyInvest հարթակի բրոքեր-հաճախորդների թիվը 2023 թվականին 3 անգամ աճել է

Արմինֆո. Ամերիաբանկի MyInvest հարթակի բրոքեր-հաճախորդների թիվը 2023 թվականին 3 անգամ աճել է: Այդ մասին ապրիլի 3-ին Doing Digital համաժողովի հարթակներում հայտարարել է Ամերիաբանկի արժութային և բրոքերային գործառնությունների գծով համա-տնօրեն Դիանա Հակոբյանը՝ պատասխանելով ԱրմԻնֆո-ի թղթակցի հարցին:

"Հաճախորդները շատ ակտիվ անցյալ տարի օգտվել են հարթակից, այդ աճը շարունակվում է նաեւ հիմա", - ընդգծել է նա:

Ամերիաբանկի արժութային և բրոքերային գործառնությունների գծով համատնօրենը նշել է, որ գործարկումից ի վեր MyInvest հարթակի MyAmeria բջջային հավելվածում լուրջ զարգացում է դիտվում նոր ֆունկցիոնալների ներդրման շնորհիվ: «Ընդհանուր առմամբ, հետաքրքրությունը և ակտիվությունը հարթակում բարձր տեմպերով աճում է, ինչպես գործարքների համատեքստում, այնպես էլ հետաքրքված հաճախորդների գծով», - պարզաբանել է նա։

Սակայն, Հակոբյանը նկատել է, որ հաճախորդները դեռեւս չեն ցանկանում մեծ ռիսկերի դիմել եւ նախընտրում են ներդրումներ կատարել ինչպես հայաստանյան, այնպես էլ արտասահմանյան թողարկողների պարտատոմսերում: Որպես օրինակ նա հաղորդել է, որ մեր քաղաքացիներն ակտիվորեն ներդրումներ են կատարում ամերիկյան պետական պարտատոմսերում, աճ է նկատվում նաև միջազգային բաժնետոմսերի և ներդրումային ֆոնդերի գծով: «Եվ այս առումով՝ կարծում ենք, որ հետաքրքիր զարգացում է սպասվում», - ընդգծել է բանկի ներկայացուցիչը:

Խոսելով հետագա անելիքների մասին՝ նա տեղեկացրել է, որ սպասվում է նոր ֆունկցիոնալի ներդրում: Բացի այդ, բանկը մտադիր է ռեսուրսներ ուղղել կրթական բաղադրիչին, որպեսզի հասարակայնությունը պատկերացում ունենա իր խնայողությունների այլընտրանքների մասին: Դիանա Հակոբյանը պատմել է, որ բանկն այդ նպատակով գործարկել է ալիք, որտեղ Ամերիաբանկի մասնագետներն անվճար զետեղում են ներդրումների եւ շուկայի զարգացման վերաբերյալ ուսուցողական բովանդակություն, ինչպես նաեւ նորություններ: «Սա շատ կարեւոր է սկսնակ ներդրողների համար, քանի որ ոլորտը նոր է զարգանում», - նշել է նա:

Ամերիաբանկի արժութային և բրոքերային գործառնությունների գծով համատնօրենը, գնահատելով շուկան, նշել է, որ այս տարի ակնկալում է բարձր ակտիվություն IPO շուկայում, քանի որ պետությունը գործարկել է համապատասխան աջակցության ծրագիր: Այդ առնչությամբ նա հիշեցրել է, որ Ամերիաբանկը նախնական հրապարակային առաջարկի (IPO) միջոցով տեղաբաշխել է Team Telecom Armenia-ի 40 մլն բաժնետոմս ՝ 8.240 մլրդ դրամ ընդհանուր արժեքով, ինչպես նաեւ "Հայաստանի էլեկտրական ցանցեր" ՓԲԸ-ի 320 հազար արժեկտրոնային պարտատոմսեր՝ 32 մլրդ դրամ ծավալով:

Նշենք, որ Ամերիաբանկի MyInvest հարթակը հնարավորություն է տալիս օգտատերերին առցանց ռեժիմով կատարել արժեթղթերին առնչվող գործարքներ, մշտական հասանելիություն ունենալ ներդրումային պորտֆելին և ստանալ մանրամասն տեղեկատվություն դրա վերաբերյալ: MyInvest-ը շուկայում առաջին հարթակն է, որտեղ միաժամանակ հասանելի են ավելի քան 30 միջազգային շուկաներ և արտասահմանյան ընկերությունների ավելի քան 15000 բաժնետոմսեր և պարտատոմսեր, ինչպես նաև հայկական բաժնետոմսեր, կորպորատիվ և պետական պարտատոմսեր, այդ թվում ՝ եվրապարտատոմսեր: MyInvest-ը ներդրումների հնարավորություն է ընձեռում բոլոր նրանց, ովքեր փնտրում են խնայողությունների ներդրման այլընտրանքային տարբերակներ, քանի որ հարթակի միջոցով բաժնետոմսերին, պարտատոմսերին և այլ ֆինանսական գործիքներին առնչվող հետ գործարքների կնքման գործընթացը հնարավորինս պարզեցված է: Մեկ սեղմումով ներդրողը հնարավորություն ունի տեղաբաշխել և հետևել բաժնետոմսերի, պարտատոմսերի, ETF-ների գնման կամ վաճառքի հայտերին, ինչպես նաև ցանկացած պահի վերահսկել իր ներդրումային պորտֆելի փոփոխությունները և կնքված գործարքները:

Ամերիաբանկը առաջատար ֆինանսատեխնոլոգիական հաստատություն և կարևոր դեր է խաղում Հայաստանի տնտեսությունում: Հետևելով թվայնացման ուղուն՝ բանկը ներդրել է մի շարք նորարարական լուծումներ և հարթակներ և շարունակում է կատարելագործել դրանք ՝ ձևավորելով դինամիկ զարգացող ֆինանսատեխնոլոգիական միջավայր ՝ ուղղված մարդու տարբեր պահանջմունքների բավարարմանը: Ամերիան առաջինն է Հայաստանում ստեղծել էկոհամակարգեր ՓՄՁ-ների և անհատների համար ՝ ապահովելով "մեկ պատուհանի" սկզբունքով մի շարք բանկային և ոչ բանկային ծառայությունների հասանելիություն. Estate.ameriabank.am, Automarket.ameriabank.am, Business.ameriabank.am. Լինելով հաճախորդամետ ընկերություն՝ Ամերիան ձգտում է լինել հուսալի ֆինանսատեխնոլոգիական տարածք, որը տրամադրում է համալիր լուծումներ՝ կյանքի որակի բարելավման համար: Հիշեցնենք, որ Ամերիաբանկը Doing Digital համաժողովի Fintech գործընկերն է, որը կոչված է մեկ հարթակում հավաքելու ոլորտի առաջատարներին ՝ թվային փոխակերպման վերջին միտումները բացահայտելու և առաջատար փորձը կիսելու համար: Համաժողովը նպատակ ունի դառնալ լավագույն հարթակ նոր գաղափարների և տեխնոլոգիաների բացահայտման, մասնագիտական կապերի ձևավորման համար: Առաջին անգամ Doing Digital-ն անցկացվել է 2023 թվականին Երևանում ՝ Ամերիաբանկի աջակցությամբ: