Հայաստանն ու ԱՄԷ-ն քննարկել են փոխադարձ առևտրի ծավալների ավելացման հնարավորությունները

Արմինֆո.Էկոնոմիկայի նախարար Գևորգ Պապոյանն ապրիլի 19-ին ընդունել է Հայաստանի Հանրապետությունում Արաբական Միացյալ Էմիրությունների (ԱՄԷ) նորանշանակ արտակարգ և լիազոր դեսպան Նարիման Մուհամմեդ Շարիֆ Ալ Մուլլային: Հանդիպմանը ներկա են եղել նաև նախարարի տեղակալներ Նարեկ Տերյանն ու Նարեկ Հովակիմյանը։

Էկոնոմիկայի նախարարության հաղորդագրության համաձայն, քննարկվել են երկու երկրների միջև ապրանքաշրջանառության ծավալների ավելացման հեռանկարները, գործարար համայնքների համագործակցության հնարավորությունները։

Բարձր է գնահատվել հատկապես վերջին տարիներին էմիրաթական ընկերությունների կողմից Հայաստանի տնտեսությունում ակտիվորեն ներդրումներ իրականացնելու փաստը։

Կողմերն անդրադարձել են նաև միջազգային և մասնագիտացված ցուցահանդեսների և գործարար համաժողովի կազմակերպման հնարավորություններին, ինչը նոր հարթակներ կստեղծի գործարարների համագործակցության համար։

Երկուստեք կարևորվել է ՀՀ-ԱՄԷ միջկառավարական համատեղ հանձնաժողովի հարթակը՝ երկկողմ տնտեսական հարաբերություններն առավել զարգացնելու նպատակով։

Մտքեր են փոխանակվել երկու երկների միջև տնտեսական կապերի զարգացման և տարբեր ոլորտներում ներդրումային ծրագրերի իրականացման վերաբերյալ։

Նախարարը հյուրերին ներկայացրել է նաև ՀՀ կառավարության «Խաղաղության խաչմերուկ» նախագիծն ու դրա սկզբունքները:

Նշենք, որ ըստ ՀՀ վիճակագրական կոմիտեի տվյալների ՝ Հայաստանի և ԱՄԷ-ի միջև առևտրաշրջանառությունը 2023 թվականին աճել է 3.9 անգամ ՝ կազմելով 2.3 մլրդ դոլար: Մասնավորապես, արտահանումն աճել է 2.4 անգամ ՝ հասնելով 2.2 մլրդ դոլարի ՝ ներմուծման 24.6% կամ մինչեւ 73.5 մլն դոլար աճի դեպքում:

2023թ. ԱՄԷ-ից Հայաստան  ստացվել է 104.3 մլրդ դրամի կամ 257.6 մլն դոլարի ընդհանուր օտարերկրյա ներդրում ՝ տարեկան 48 անգամ աճելով (դոլարային արտահայտությամբ)։ Իսկ ՕՈՒՆ-ի տեսքով ԱՄԷ-ից ստացվել է 100.8 մլրդ դրամ կամ 248.9 մլն դոլար ՝ տարեկան 66 անգամ աճով ։ Ընդ որում, ԱՄԷ-ից ներդրումների գերիշխող մասը կապված է ֆինանսական միջնորդության հետ, եւ միայն փոքր ծավալներն են ուղղված ծխախոտի, էլեկտրասարքավորումների արտադրությանը, մանրածախ առեւտրին, ընդ որում, կրճատվել են ներդրումները օդային տրանսպորտի ոլորտում, եւ ամբողջությամբ զրոյացվել են ներդրումները սննդի արդյունաբերության մեջ ։