ՀՀՀ-ի "դստերը" կթույլատրվի հեռարձակել ոչ միայն Երևանում, այլև՝ ողջ հանրապետությունում

Արմինֆո.Հայաստանի Հանրային հեռուստաընկերության Առաջին լրատվական ալիքին կթույլատրվի հեռարձակել ոչ միայն Երևանում, այլև ողջ հանրապետությունում: Ազգային ժողովն ապրիլի 30-ի լիագումար նիստում երկրորդ ընթերցմամբ քննարկում է "Տեսալսողական ԶԼՄ-ների մասին" օրենքում փոփոխությունները:

Փաստաթղթի հեղինակ, ԱԺ պատգամավոր Սիսակ Գաբրիելյանի խոսքով ՝ օրենքով առաջարկվում է, որ հանրային հեռարձակողն ունենա առավելագույնը երկու տեսալսողական ծրագիր՝ համազգային տարածմամբ: "Քանի որ Հանրային հեռուստաընկերության ֆինանսավորման հիմնական աղբյուրը ՀՀ պետական բյուջեն է, արդարացի կլիներ, որ Հայաստանի Հանրապետության բոլոր քաղաքացիները, անկախ իրենց բնակության վայրից, հնարավորություն ունենային դիտելու այն հեռուստաալիքը, որի համար վճարում են", - ընդգծել է Գաբրիելյանը:

Օրենքի նախագծի անցումային դրույթներում նշվում է, որ մայրաքաղաքում հեռարձակում ապահովող ալիքը, օրենքի ուժի մեջ մտնելուց հետո 30 օրվա ընթացքում, կփոխարինվի ամբողջ հանրապետության ծածկույթն ապահովող ալիքով:

Նշենք, որ Ֆինանսների նախարարության տվյալների համաձայն, նախագծի ընդունումը կհանգեցնի պետբյուջեի համար 64,8 մլն դրամ լրացուցիչ ծախսերի անհրաժեշտության, սակայն ոչ ընթացիկ տարվա բյուջեում, ոչ էլ ՀՀ 2024-2026 թվականների պետական միջնաժամկետ ծախսերի ծրագրում այդ նպատակով միջոցներ չկան:

Ավելի վաղ Գաբրիելյանը նշել էր, որ փոփոխությունները բյուջեից լրացուցիչ ծախսեր չեն պահանջի։