Երեթշաբթի, 14 Մայիսի 2024 14:17

Արմինֆո.Մայիսի 14-ին Երեւանում մեկնարկել է Վերակառուցման եւ զարգացման եվրոպական բանկի (ՎԶԵԲ) 33-րդ տարեկան ժողովը: Միջոցառման շրջանակներում, որը կտևի մինչև մայիսի 16-ը, տեղի կունենա ՎԶԵԲ-ի գործարար համաժողովը' <Ազդեցություն ունենալով միասին> (Delivering Impact Together) կարգախոսով:

 

Ինչպես ավելի վաղ հաղորդվել էր բանկի մամլո հաղորդագրության մեջ, միջոցառումը կդառնա իր տեսակի մեջ ամենամեծը՝ Հայաստանում երբևէ անցկացվածներից, և տեղի ընտրությունը ցույց է տալիս ՎԶԵԲ-ի շարունակական աջակցությունը երկրին և կովկասյան տարածաշրջանին: Ֆինանսական ոլորտում Հայաստանի համար աննախադեպ միջոցառումը մեկ հարկի տակ կհավաքի շուրջ 2000 մասնակիցների, այդ թվում՝ 74 երկրների բարձրաստիճան պաշտոնական պատվիրակությունների, միջազգային և մասնավոր հատվածի կազմակերպությունների ներկայացուցիչների:

 

Այսօր՝ մայիսի 14-ին, միջոցառումը համախմբելու է կառավարական պաշտոնյաների, ֆինանսական և կորպորատիվ ղեկավարների, ձեռներեցների, քաղաքացիական հասարակության և լրատվամիջոցների ներկայացուցիչների՝ ՎԶԵԲ-ի կողմից սպասարկվող բոլոր տարածաշրջաններից:

 

"Դվին" համալիրում ելույթ կունենան բանախոսներ. ՎԶԵԲ նախագահ Օդիլ Ռենո-Բասսոն, բանկի ֆինանսական հաստատությունների գծով տնօրեն Ֆրենսիս Մալիջը: Տեղի կունենան քննարկումներ բնապահպանական և սոցիալական քաղաքականության և ՎԶԵԲ-ի տեղեկատվական քաղաքականության հասանելիության, արդյունաբերության, առևտրի և ագրոբիզնեսի վերաբերյալ: Քննարկվելու է Հարավային Կովկասի դերը կայուն առևտրային, էներգետիկ և լոգիստիկ երթուղիների զարգացման գործում: «Թումո» ստեղծարար տեխնոլոգիաների կենտրոնում զեկույցներով հանդես կգան ամերիկյան Moderna կենսատեխնոլոգիական ընկերության համահիմնադիր Նուբար Աֆեյանը և Microsoft - ից Բեն Քրոմփթոնը:

 

Մայիսի 15-ին ՎԶԵԲ-ը կհրապարակի նաև իր "Տարածաշրջանային տնտեսական հեռանկարներ" զեկույցը, որում կներկայացվեն տարածաշրջանների համար վերջին մակրոտնտեսական կանխատեսումները: Նույն օրը գործարար համաժողովի հիմնական պահերից մեկը կլինի "Հայաստանի ներդրումային կանխատեսում" նստաշրջանը:

 

Նույն օրը սպասվում է ՀՀ վարչապետ Նիկոլ Փաշինյանի ելույթը Երևանի ազգային օպերային թատրոնում կառավարիչների խորհրդի նիստի բացմանը: Բացման խոսքով հանդես կգան կառավարիչների խորհրդի փոխնախագահ, Լիտվայի ֆինանսների նախարար Գինտարե Սկայստեն և ՎԶԵԲ նախագահ Օդիլ Ռենո-Բասսոն:

 

Հինգշաբթի՝ մայիսի 16-ին,  կառավարիչները կընտրեն ՎԶԵԲ-ի նախագահին, որը կղեկավարի բանկը առաջիկա 4 տարիներին: Տիկին Ռենո-Բասոն այդ պաշտոնում առաջին անգամ ընտրվել է Բանկի 2020 թվականի տարեկան ժողովում, և նրա ժամկետը մոտենում է ավարտին: Ռենո-Բասոն այս տարի այս պաշտոնում առաջադրված միակ թեկնածուն է: Ընտրություններն ապահովելու համար թեկնածուները պետք է ստանան ձայների կրկնակի մեծամասնություն ՝ ինչպես կառավարիչների, այնպես էլ անդամների ընդհանուր թվից:

 

Կառավարիչները նաեւ կսկսեն դիտարկել բանկի հաջորդ "ճանապարհային քարտեզը" ՝ Ռազմավարական եւ կապիտալ շրջանակային ծրագիրը, որը կսահմանի բանկի առաջնահերթությունները 2026-2030 թթ. ժամանակահատվածի համար:

 

Գործարար համաժողովում քննարկվելու է թեմաների լայն շրջանակ, ինչպիսիք են տարածաշրջանային կապերի և արժեքի ստեղծման շղթաների կարևորությունը, ֆինանսական տեխնոլոգիաները, արհեստական բանականությունը և կիբերանվտանգությունը, էներգետիկ անվտանգությունը և էներգիայի վերականգնվող աղբյուրները, Ուկրաինայում պատերազմի հետևանքով առաջացած մարտահրավերները, զարգացող շուկաներում թվայնացումը և ֆինանսական մատչելիությունը:

 

Պանելային նստաշրջանին հրավիրված բանախոսների թվում են Moderna-ի համահիմնադիր Նուբար Աֆեյանը, Meridiam-ի գլխավոր գործադիր տնօրեն Թիերի Դո, Financial Times-ից՝ Մարտին Վոլֆը, Եգիպտոսի միջազգային համագործակցության նախարար Ռանիա Ալ-Մաշատը, «Թումո»-ի գլխավոր տնօրեն Մարի Լու Փափազյանը, քաղաքագետ Մելանի Գարսոնը, պրոֆեսոր և պատմաբան Հարոլդ Ջեյմսը, ԱՄՆ միջազգային առևտրի և գանձապետարանի զարգացման գծով քարտուղարի օգնական Ալեքսիա Լատորտյուն:

 

Վերջին 5 տարիների ընթացքում ՎԶԵԲ-ը Հայաստանում ներդրել է 640 մլն եվրո ՝ նպաստելով մասնավոր հատվածի զարգացմանը, ենթակառուցվածքների բարելավմանը, վերականգնվող էներգիայի արտադրությանը և գյուղական բնակավայրերի թվայնացմանը: Նախագծերի ընթացիկ պորտֆելը գնահատվում է 339 մլն եվրո։ ՎԶԵԲ-ն ավելի քան 2,1 մլրդ եվրո է ներդրել Հայաստանի ողջ տարածքում 210 նախագծերում: