Արմինֆո.Հայաստանն ու Իրանը քննարկում են սահմանային Արաքս գետի վրա երկրորդ կամրջի կառուցման նախագիծը: Սույն ծրագիրը դարձել է "Ճանապարհային դեպարտամենտ" հիմնադրամի գործադիր տնօրեն Գոռ Ավետիսյանի և Իրանի Իսլամական Հանրապետության (ԻԻՀ) ճանապարհների և քաղաքաշինության նախարարության պաշտոնատար անձանց միջև կայացած քննարկումների առարկա:
Ինչպես հաղորդում է հիմնադրամի մամուլի ծառայությունը, Արաքս գետի վրա առաջին կամուրջը շահագործման է հանձնվել 1996 թվականին՝ "Մեղրի" սահմանային անցակետում: Դրա երկարությունը 192 մետր է։
Իրանցի մասնագետների կողմից իրականացված վերջին ուսումնասիրությունների համաձայն, 2023 թվականի չորրորդ եռամսյակում զգալիորեն աճել են Մեղրիի սահմանային անցակետում ուղևորափոխադրումների և բեռնափոխադրումների ծավալները ։ Հաշվի առնելով հայ - իրանական սահմանը հատող տրանսպորտային միջոցների քանակի ավելացումը, ինչպես նաև Ագարակ - Քաջարան ճանապարհահատվածի շինարարության արդյունքում կանխատեսվող ուղևորահոսքի և բեռնափոխադրումների արագ տեմպերը, անհրաժեշտություն է առաջացել կառուցել երկրորդ կամուրջը Հայաստանի և Իրանի միջև:
Հանդիպման ընթացքում Հայաստանի և Իրանի ներկայացուցիչները քննարկել են կամրջի կառուցման նախագծի մշակման նպատակով աշխատանքային խումբ ստեղծելու հարցը: Հայկական կողմն ուղարկել է մասնագետների առաջարկվող ցանկն՝ ընդգրկելու համար աշխատանքային խմբում, որը կքննարկի և կմշակի կամրջի կառուցման հայեցակարգը:
