Դեպի Կիրանց ճանապարհի կառուցման նախագծանախահաշվային փաստաթղթերի մշակմանը կուղղվի 9,613 մլն դրամ

Արմինֆո. Դեպի Տավուշի մարզի սահմանամերձ Կիրանց գյուղ ավտոճանապարհի կառուցման նախագծանախահաշվային փաստաթղթերի մշակման համար ՀՀ պետական բյուջեից կհատկացվի 9,613 մլն դրամ: Այդ մասին որոշում է կայացվել ՀՀ կառավարության այսօրվա նիստում:

Որոշման նախագծի հիմնավորման մեջ նշվում է, որ նոր ճանապարհի երթուղին նախագծող ընկերությանը կընտրեն առանց համապատասխան մրցույթի՝ ժամանակ խնայելու համար:

Նշենք, որ խոսքը երկու ճանապարհների մասին է, որոնցից մեկը՝ 750 մետր երկարությամբ, նոր է կառուցվում։ Աշխատանքները վարող ճանապարհային ընկերությունները պարտավորվել են ներգրավել լրացուցիչ մարդկային ռեսուրսներ, որպեսզի ճանապարհը հանձնեն 2 ամսվա ընթացքում։ Երկրորդ ճանապարհի երկարությունը, որը Կիրանց կանցնի Աճարկուտ գյուղով, կկազմի 3,5 կմ: Այն միայն անհրաժեշտ կլինի վերանորոգել՝ նույնպես երկու ամսում:

Հիշեցնենք, որ Կիրանց-Աճակուրտ ճանապարհը պետք է այլընտրանք դառնա ճանապարհի այն հատվածին, որն անցնելու է Ադրբեջանի վերահսկողության տակ ։ Սահմանագծման և սահմանազատման հանձնաժողովի որոշումների համաձայն՝ Կիրանց գյուղի շրջանում Ադրբեջանին պետք է անցնեն երկու տուն, կամուրջը, դեպի Վրաստան տանող ճանապարհահատված և մոտ 50 հողամաս: