Երկուշաբթի, 24 Հունիսի 2024 17:03

Արմինֆո.Այսօրվա փոխկապակցված աշխարհում հարկերի վճարումից խուսափելուն և ապօրինի ֆինանսական հոսքերին առնչվող խնդիրները պահանջում են հավաքական գործողություններ և համագործակցություն: Այդ մասին հունիսի 24-ին հայտարարել է ՀՀ փոխվարչապետ Տիգրան Խաչատրյանը՝ Երեւանում մեկնարկած Ասիական բարձր մակարդակի նախաձեռնության 6-րդ նիստում։

 

Նրա ասելով՝ Ասիական նախաձեռնությունն առանցքային դեր է խաղում այդ խնդիրների լուծման գործում ՝ միավորելով աշխարհի տարբեր մայրցամաքների երկրներին: "Մեր ընդհանուր պարտավորությունների և համագործակցության շնորհիվ մենք զգալի առաջընթաց ենք գրանցել հարկային թափանցիկության բարձրացման և ամբողջ աշխարհում ավելի արդար հարկային միջավայրի ստեղծման գործում", - ասել է փոխվարչապետը:

 

Իր հերթին՝ ՏՀԿ գլոբալ ֆորումի քարտուղարության ղեկավար Զաիդա Մանատան, որի հովանու ներքո ընթանում է նիստը, նշել է, որ Ասիական նախաձեռնության ձևավորումից անցել է ընդամենը 2 տարի, և այսօր Հայաստանում անցկացվում է արդեն 6-րդ բարձր մակարդակի հանդիպումը: <Կարճ ժամանակահատվածում Ասիական նախաձեռնության շնորհիվ զգալի առաջընթաց է գրանցվել. ավելի ու ավելի շատ ասիական երկրներ են քաղում հարկային թափանցիկության պտուղները: Բարձր մակարդակի արդյունքները հաստատեցին այս օրակարգին տրված կարևորությունը", - ասել է Զաիդա Մանատան:

 

ՀՀ ֆինանսների նախարարի տեղակալ Արման Պողոսյանի ասելով՝ Ասիական նախաձեռնությունը կարևոր դեր է խաղում տարբեր մայրցամաքների երկրների միավորման գործում՝ ընդհանուր խնդիրների լուծման, լավագույն փորձի փոխանակման և հարկերի վճարումից խուսափելու և ապօրինի ֆինանսական հոսքերի դեմ պայքարի նորարարական լուծումների մշակման գործում: <Հանդիպման հիմնական թեմաներից մեկը տեղեկատվության փոխանակման (EOI) կարևորությունն է: EOI ստանդարտների արդյունավետ ներդրումը կարեւոր նշանակություն ունի հարկերի վճարումից խուսափելու դեմ մեր պայքարում>, - ընդգծել է փոխնախարարը:

 

Նշենք, որ հանդիպմանը մասնակցում են նախաձեռնության լիիրավ անդամ երկրների, ինչպես նաև դիտորդ երկրների, գործընկեր կառույցների, միջազգային կազմակերպությունների, այդ թվում՝ Ասիական զարգացման բանկի (ԱԶԲ) և Միջազգային ֆինանսական կորպորացիայի (IFC) բարձր մակարդակի պատվիրակություններ: Հունիսի 24-ի նիստում ներկայացվել է "Հարկային թափանցիկությունն Ասիայում 2024" զեկույցը, որը հրապարակվում է երկրորդ անգամ՝ Ասիական նախաձեռնության գործարկումից հետո: Այդ զեկույցը Բալինյան հռչակագրի հիմնական արդյունքն է։ Դրա նպատակն է ցույց տալ ասիական երկրների առաջընթացը 2023 թվականին, գնահատել նախաձեռնության շրջանակներում իրականացվող գործունեությունը և նախանշել ապագայի խնդիրները:

 

Հիշեցնենք, որ նախաձեռնության լիիրավ անդամ են 17 երկրներ և վարչական շրջաններ՝ Բրունեյը, Չինաստանը, Հոնկոնգը, Հնդկաստանը, Ինդոնեզիան, Ճապոնիան, Ղազախստանը, Կորեան, Մակաոն, Մալայզիան, Մալդիվները, Մոնղոլիան, Պակիստանը, Ֆիլիպինները, Սինգապուրը և Թաիլանդը: